Polšča abvinavaciła rasijskija śpiecsłužby ŭ padpale handlovaha centra, jaki zhareŭ hod tamu
Hihancki pažar, jaki zdaryŭsia ŭnačy 12 traŭnia 2024 hoda ŭ varšaŭskim handlovym centry na vulicy Maryvilskaj, 44, byŭ vynikam padpału, ździejśnienaha ahientami rasijskich śpiecsłužbaŭ.
Pra heta aficyjna zajavili ministr justycyi Polščy Adam Bodnar i ministr unutranych spraŭ Tomaš Siemaniak.
«Na padstavie sabranych dokazaŭ my ciapier dakładna viedajem, što pažar staŭ vynikam padpału, arhanizavanaha rasijskimi śpiecsłužbami. My vałodajem padrabiaznaj infarmacyjaj pra paśladoŭnaść i miechanizm dziejańniaŭ, a taksama majem dakumientacyju, zroblenuju samimi złačyncami. Ich dziejnaściu kiravaŭ čałaviek, jaki znachodzicca na terytoryi Rasijskaj Fiederacyi. Častka złačyncaŭ užo zatrymanaja, astatnija ŭstanoŭlenyja i znachodziacca ŭ vyšuku», — havorycca ŭ aficyjnaj zajavie.
Paźniej premjer-ministr Polščy Donald Tusk taksama abvinavaciŭ rasijskija śpiecsłužby i paabiacaŭ, što ŭsie vinavatyja paniasuć adkaznaść.
U vyniku pažaru handlovy centr zhareŭ całkam: ahoń achapiŭ 63 tysiačy kvadratnych mietraŭ, źniščanyja byli paviljony i tavary amal 1400 arandataraŭ. Pažar doŭžyŭsia bolš za piać hadzin. Adrazu paśla zdareńnia śpiecyjalisty adznačali, što połymia raspaŭsiudziłasia nadzvyčaj chutka, što nietypova dla vypadkovych uzharańniaŭ.
Raniej zajaŭlałasia, što siarod padazravanych u padpale byli dva biełarusy. Adzin ź biełaruskich hramadzian moža być eks-supracoŭnikam MUS, druhi — raniej sudzimym byłym bajcom MMA.
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie31
Kamientary
Jak za svajo dyk mirnyja ludzi, a jak za rasiejskaje dyk navat dyviersii i na front.