U Rasii hramadzianina Aŭstralii asudzili na 13 hadoŭ turmy za ŭdzieł u vajnie na baku Ukrainy
U akupavanym Rasijaj Łuhansku sud pryhavaryŭ 33-hadovaha aŭstralijca Oskara Dženkinsa da 13 hadoŭ kałonii strohaha režymu. Pavodle śćviardžeńnia rasijskich uładaŭ, jon vajavaŭ na baku ŭkrainskaj armii jak najomnik.
Na videazapisach, apublikavanych rasijskimi dziaržaŭnymi ŚMI, były vykładčyk bijałohii ź Mielburna pakazany ŭ šklanoj kletcy dla padsudnych u momant abviaščeńnia prysudu, piša Bild.
Maskva tradycyjna ličyć zamiežnych dobraachvotnikaŭ, što vajujuć za Ukrainu, nie vajskoŭcami, a najomnikami. Tamu na ich nie raspaŭsiudžvajucca pałažeńni Ženieŭskaj kanviencyi — suprać dobraachvotnikaŭ raspačynajucca kryminalnyja spravy.
Ułady Aŭstralii nieadnarazova patrabavali vyzvaleńnia Dženkinsa. Jaho los doŭhi čas zastavaŭsia nieviadomym — tolki ciapier, padčas sudovaha pracesu, źjavilisia paćvierdžańni, što jon žyvy.
Ministr zamiežnych spraŭ Aŭstralii Pieni Vonh zajaviła, što ŭrad krainy «ŭ šoku ad fiktyŭnaha sudovaha pracesu i 13-hadovaha terminu źniavoleńnia».
«Dženkinsu pavinna być zabiaśpiečanaja abarona, jakaja praduhledžvajecca dla vajennapałonnaha. Rasija abaviazana abychodzicca ź im u adpaviednaści ź mižnarodnym humanitarnym pravam, uklučajučy humannaje abychodžańnie», — dadała jana.
Kamientary