Schiemy, pa jakich dziejničaje HB. Vyjšła rasśledavańnie pra picierskich sieksotaŭ FSB
Žurnalisty raskryli dziejnaść hrupy ahientaŭ KDB i FSB, jakaja dziesiacihodździami raspracoŭvała praciŭnikaŭ režymu, moładź i ŁHBT-supolnaść, vykarystoŭvajučy pravakacyi, hvałt i šantaž.
Vydańnie «Prajekt» apublikavała film-rasśledavańnie ab hrupie ahientaŭ leninhradskaha KDB, jakija ŭ saviecki čas sačyli za dysidentami a paśla raspadu SSSR praciahnuli pracu na śpiecsłužby. U centry hetaj historyi — try postaci: Uładzimir Huščyn, Siarhiej Barkan i Uładzisłaŭ Ciarochin.
Saviecki ahient, jaki zastaŭsia «piedahoham»
Uładzimir Huščyn — klučavy hieroj rasśledavańnia. U 1980—90-ch hadach jon pracavaŭ pad kuratarstvam KDB, zajmajučysia «pieravychavańniem» niefarmalnaj moładzi i sačeńniem za dysidentami. U archivach litoŭskaha KDB zhadvajecca ahient pad psieŭdanimam «Šura». Rasśledavalniki ličać, što heta i byŭ Huščyn, detali bijahrafii jakoha supadajuć ź infarmacyjaj, jakuju śpiecsłužba raskryła ab dziejnaści svajho ahienta.
Paśla raspadu SSSR Huščyn nie tolki nie syšoŭ u cień, ale staŭ suzasnavalnikam Partyi zialonych i praciahnuŭ pracu ŭ śfiery moładzievaj palityki.
Da samaha 2024 hoda mužčyna aficyjna pracavaŭ u centry «Kantakt» pry kamitecie pa spravach moładzi Pieciarburha. Ale, jak śćviardžajuć žurnalisty, pad vyhladam piedahoha jon pieradavaŭ infarmacyju pra padletkaŭ u FSB i MUS, u tym liku ŭ adździeły pa baraćbie z ekstremizmam.
Huščyn vystupaŭ na telebačańni jak ekśpiert pa subkulturach, pisaŭ mietadyčnyja materyjały. U adnoj ź ich — knizie «Dzieci vulic» jon raskazvaje ab tym, što ŭ 1980—1990-ch hadach pad kiraŭnictvam KDB udzielničaŭ u prahramach pa pieravychavańni niefarmalnaj moładzi i razvažaje pra mietady ŭkaranieńnia ŭ moładzievyja ruchi.
Siarhiej Barkan: «zły palicejski»
U pary z Huščynym u centry «Kantakt» pracavaŭ Siarhiej Barkan, jakoha krynicy nazyvajuć prychilnikam žorstkich mietadaŭ. Jaho abvinavačvajuć u katavańniach i seksualizavanym hvałcie nad udzielnikami moładzievych subkultur. Adzin z byłych supracoŭnikaŭ centra raspavioŭ, što Barkan i Huščyn dziejničali pa pryncypie «dobry-zły palicyjant»: Huščyn źbiraŭ infarmacyju miakkimi mietadami, a Barkan zapałochvaŭ i ŭžyvaŭ fizičnuju siłu.
Asabliva viadomy aŭtobus «Sacyjalny patrul», jaki, pavodle surazmoŭcaŭ «Prajektu», vykarystoŭvaŭsia dla žorstkich dopytaŭ. Zatrymanych padletkaŭ padviarhali prynižeńniam, uklučajučy tak zvanaje «sadžańnie na butelku» — mietad, jaki, pa słovach krynic, byŭ «firmovym» dla Barkana.
Adzin z supracoŭnikaŭ centra nazvaŭ jaho adździeł «hiestapa», a Huščynu, pavodle ich słoŭ, padabałasia, što Barkana bajalisia, što ŭzmacniała ich kantrol nad moładździu.
Uładzisłaŭ Ciarochin: pravakacyi i kampramat
Jašče adzin fihurant rasśledavańnia — Uładzisłaŭ Ciarochin, viadomy jak Chazan abo Uład Lektar, daŭni znajomy Huščyna. U rasśledavańni śćviardžajecca, što razam z Huščynym jon sačyŭ za demakratami pačynajučy z 1980-ch hadoŭ. Ciarochin śpiecyjalizavaŭsia na pravakacyjach.
Adzin z epizodaŭ adbyŭsia ŭ pačatku 1990-ch: razam z Huščynym jany zamanili žurnalista leninhradskaha vydańnia ŭ kvateru, dzie taho apaili, a zatym šantažavali, śćviardžajučy, što ŭ ich jość kampramietujučyja fatahrafii.
U 2010—2020-ja hady Ciarochin praciahnuŭ źbirać kampramat na apazicyjanieraŭ i aktyvistaŭ. Jon naviedvaŭ mitynhi, zaprašaŭ udzielnikaŭ na sustrečy, u łaźni ci vypić, sprabujučy apaić ich i sfatahrafavać u kampramietujučych situacyjach.
Ciarochin u razmovie z «Prajektam» admaŭlaŭ abvinavačvańni ŭ hvałcie, šantažy i supracoŭnictvie ź siłavikami. Huščyn i Barkan admovilisia adkazvać na pytańni žurnalistaŭ.
Kamientary