Dzieviać bankaŭ abviaścili pra novaŭviadzieńni ŭ pracy z klijentami
Dzieviać bankaŭ, što pracujuć u Biełarusi, paviedamili pra źmianieńni asobnych praviłaŭ absłuhoŭvańnia i nadali novyja mahčymaści dla klijentaŭ, śviedčyć praviedzieny vydańniem «Pozirk» manitorynh ich aktualnych pres-relizaŭ.
«Bank BiełVEB» pa 7 lipienia zabaraniŭ papaŭniać terminovyja adzyŭnyja depazity jurydyčnych asob i indyvidualnych pradprymalnikaŭ u rublach pa dziejnych dahavorach z pracentnaj staŭkaj ad 13% hadavych i vyšej. Pa astatnich układach umovy zastajucca raniejšymi.
«Biełarusbank» prypyniŭ zaklučeńnie novych dahavoraŭ pa niekatorych terminovych valutnych układach. Havorka pra adzyŭnyja depazity ŭ rasijskich rublach — «Kłasik Adzyŭny ź fiksavanaj pracentnaj staŭkaj» (3, 6, 9 miesiacaŭ), «Rublovy» (13, 18, 24, 36 miesiacaŭ), «Fiksavany Onł@jn» (3, 6, 9 miesiacaŭ), «Rublovy anłajn» (13, 18, 24, 36 miesiacaŭ); biezadzyŭny — «Na budučyniu» (3 i 4 hady), a taksama pra biezadzyŭny ŭ dołarach i jeŭra «Raściem razam». Papaŭnieńnie raniej adkrytych układaŭ nie spyniajecca.
«Bielinviestbank» daŭ mahčymaść zdymać hrošy va ŭłasnych bankamatach biez vykarystańnia kartak — šlacham skanavańnia QR-koda praz «Mabilny bankinh», ustalavany na smartfonie z apieracyjnaj sistemaj Android.
«Biełahraprambank» z 1 lipienia budzie spahaniać 40 kapiejek za pasłuhu «Infarmavańnie kredytaatrymalnikaŭ pra pamier płaciažu pa kredycie». Kredytaatrymalnik moža admovicca ad pasłuhi — piśmova.
«BNB-Bank» z 1 červienia źnižaje da 800 tysiač dołaraŭ abo jeŭra limit siaredniadzionnaha astatku, pry pieravyšeńni jakoha pačynaje naličvacca kamisija za absłuhoŭvańnie biahučaha (raźlikovaha) rachunku ŭ hetych valutach. Pa novych umovach kamisiju pačnuć spahaniać u lipieni — za červień.
«BSB Bank» 4 červienia pieraviadzie dziejnych klijentaŭ na novyja taryfy pa pasłuzie «Multyekvajrynh». Kamisija za pryjom płaciažoŭ pa kartach składzie 2,5%.
«Pryjorbank» paviedamiŭ, što pry atrymańni najaŭnych srodkaŭ pa kartcy ŭ kasach adździaleńniaŭ banka klijentu nieabchodna pakazvać pašpart abo inšy dakumient, što paćviardžaje asobu.
«Śbier Bank u Biełarusi» pa 14 červienia prapanuje baćkam aformić da svajho kart-rachunku asabistuju bankaŭskuju kartku dla dziciaci — za 1 kapiejku.
«Technabank» z 2 červienia ŭvodzić źmianieńni pa pakiecie raźlikova-kasavaha absłuhoŭvańnia «Jeŭrapiejski 4.8». Kamisija ŭ pamiery 1,6% sumy (minimum 75 dołaraŭ) budzie spahaniacca za pieravod srodkaŭ pa-za miežy banka na padstavie płaciežnaha daručeńnia klijenta, płaciežnaha patrabavańnia ŭ rasijskich rublach z kanviersijaj u indyjskija rupii na karyść bienieficyjaraŭ, jakija absłuhoŭvajucca ŭ bankach Indyi.
Na 1 traŭnia 2025 hoda ŭ Biełarusi byŭ zarehistravany 21 bank (try ź ich — sa 100-pracentnym zamiežnym udziełam). Ich statutny kapitał skłaŭ 10 miljardaŭ 103 miljony rubloŭ (0,8% za miesiac i +19,2% u hadavym vymiareńni), prybytak — 1 młrd 141,1 młn rubloŭ (+32,8% i +1,9% adpaviedna).
Kamientary