Biełarus zapuściŭ dabračynny fłešmob u padtrymku dziaŭčynki ź Biełastoka
Aleś Kudrycki, aŭtar knihi «Kazik z Kamiennaj Horki», zapuściŭ fłešmob u padtrymku dabračynnaha zboru dla dziaŭčynki ź Biełastoka. Takim čynam jon prapanuje nie prosta dapamahčy dziciaci, ale i pakazać palakam salidarnaść biełarusaŭ, niahledziačy na paharšeńnie staŭleńnia da inšaziemcaŭ, piša Most.
«Łavi piać ad Volnaj Biełarusi»
Ideju fłešmobu Aleś Kudrycki ahučyŭ u Facebook.
«Ja vypadkova pabačyŭ na Siepomaga (płatforma dla zboru srodkaŭ.— Most) abjavu dziaŭčynki Kasi ź Biełastoka. Baćki źbirajuć joj na kurs reabilitacyi — kab navučyć jaje lepiej chadzić […]. Hrošy treba adnosna nievialikija, ale dapamoha budzie darečy. Prapanuju pieraličyć choć by nievialikuju sumu dla padtrymki Kasi i padpisać jaje tak: Piąteczka od wolnej Białorusi! («Łavi piać ad Volnaj Biełarusi!»)», — napisaŭ jon.
Ahulny podpis dazvolić adroźnić biełaruskija achviaravańni ad inšych u ahulnym śpisie danataŭ.
Pa słovach aŭtara, meta takoha fłešmobu nie tolki dapamahčy dziciaci, ale i prademanstravać palakam svaju salidarnaść:
«Zaraz šmat abmierkavańniaŭ pra paharšeńnie staŭleńnia da čužaziemcaŭ u Polščy — dyk chočacca dać na heta asabisty adkaz z pazicyi nie kryŭdy, ale lubovi».
U kamientaryjach da pasta ŭdzielniki fłešmobu pakidajuć plusiki — heta dapamoža paźniej padličyć, kolki ŭdałosia sabrać mienavita dziakujučy biełaruskaj inicyjatyvie.
Kasia z naradžeńnia mieła patrebu ŭ miedycynskaj dapamozie
Historyja maleńkaj Kasi ź Biełastoka raźmieščana na sajcie Siepomaga. Jana naradziłasia na 30-m tydni ciažarnaści i z samaha naradžeńnia mieła patrebu ŭ miedycynskaj dapamozie. U 2023 hodzie joj praviali apieracyju na tazaściehnavym sustavie i ŭstalavali mietaličnuju płaścinu, jakuju nieŭzabavie treba budzie vydalić. Paśla hetaha spatrebicca intensiŭnaja trochtydniovaja reabilitacyja ŭ varšaŭskim centry Olinek, dzie dziaŭčynka ŭžo dasiahnuła značnaha prahresu raniej.
Usiaho dla Kasi zaraz sabrana kala 2191 złoty (511 jeŭra — heta ŭsie danaty, a nie tolki biełaruskija, ci 19% ad nieabchodnaj sumy ŭ 11490 złoty — 2680 jeŭra)
Kamientary
što mnie kasie pasłać?