Z 1 lipienia niekatoryja tavary na kasach samaabsłuhoŭvańnia treba budzie apłačvać pa-novamu
Z 1 lipienia 2025 hoda na kasach samaabsłuhoŭvańnia stanie abaviazkovym sčytvańnie kodaŭ markiroŭki dla peŭnych tavaraŭ. Pra heta paviedamili ŭ Ministerstvie pa padatkach i zborach, piša BiełTA.
Jak rastłumačyli ŭ viedamstvie, u miežach Jeŭrazijskaha ekanamičnaha sajuza ŭvodzicca markiroŭka tavaraŭ śpiecyjalnymi srodkami identyfikacyi — kab abmiežavać niezakonny handal i abaranić pakupnikoŭ ad padrobak i niajakasnaj pradukcyi.
Dla hetaha vykarystoŭvajecca dvuchmierny kod Data Matrix, padobny da QR-koda. U Biełarusi im užo markirujucca takija tavary, jak małočnaja pradukcyja, vada, soki, alej, piva, BADy, kansiervacyja, a taksama niekatoryja pramysłovyja tavary — abutak, parfuma, šyny i inšyja.
Pačynajučy ź lipienia, na ŭsich kasach, u tym liku samaabsłuhoŭvańnia, budzie nieabchodna skanavać hety kod, a taksama zvyčajny štrych-kod (GTIN). U niekatorych madelach kasavaha abstalavańnia GTIN moža aŭtamatyčna atrymlivacca z koda markiroŭki, tamu jahonaje asobnaje sčytvańnie nie patrabujecca.
Kupcam nie treba samastojna viedać, jakija tavary traplajuć pad markiroŭku — kasa sama paviedamić, kali skanavańnie spatrebicca. Kali ŭźniknuć ciažkaści, možna źviarnucca da kansultanta abo prajści praz zvyčajnuju kasu, dzie ŭsie dziejańni vykanaje kasir.
Kamientary