Čały praanalizavaŭ detali ŭkrainskaj apieracyi «Pavucińnie» i pryjšoŭ da niečakanaj vysnovy
«A zaraz składziem 2 plus 2», — tłumačyć pa krokach svaju viersiju analityk.
Jak viadoma, 1 červienia SBU masiravana atakavała rasijskija aeradromy dronami. Śpiecapieracyja nazyvałasia «Pavucińnie». Pa infarmacyi z ukrainskaha boku, u vyniku jaje atrymałasia parazić 41 rasijski samalot. U Hiermanii zajaŭlajuć, što mahło być paškodžana kala 10% abjektaŭ stratehičnaj avijacyi Rasii.
U novym vypusku svajoj analityčnaj prahramy Siarhiej Čały praanalizavaŭ detali hetaj apieracyi.
Jon źviartaje ŭvahu na toje, što, miarkujučy pa fota, samaloty byli litaralna «źniščanyja da tła». Ukrainskija drony metanakiravana bili pa kryłach bambardziroŭščykaŭ, dzie znachodziacca paliŭnyja baki. «To-bok uzarvalisia zapraŭlenyja samaloty, tyja, što rychtavalisia da chutkaha vyletu», — tłumačyć Čały.
I zadajecca pytańniem: da jakoha vyletu rychtavałasia rasijskaja avijacyja?
Na prarasijskim sajcie «Caŕhrad» 31 maja — litaralna za dzień da ataki — źjaviŭsia artykuł pad hučnym zahałoŭkam «Małanka Zieŭsa — dziasiatki Tu-22 i Tu-95 VKS Rasii hatovyja da ŭdaru adpłaty».
U artykule zhadvałasia pra bujnuju pierahrupoŭku stratehičnaj i frantavoj avijacyi, jakuju zafiksavali spadarožnikavyja danyja i adkrytyja krynicy, «jakaja moža ŭkazvać na padrychtoŭku da adnoj z samych mahutnych apieracyj z pačatku kanfliktu va Ukrainie».
«Ekśpierty adznačajuć, što padobnaja łahistyčnaja avijacyjnaja aktyŭnaść nie nazirałasia z 2021 hoda», — cytuje analityk źmiest artykuła.
Aŭtary artykuła, spasyłajučysia na zachodnich analitykaŭ, pisali ab tym, što Rasija kancentravała siły dla kaardynavanaj rakietnaj ataki pa klučavych abjektach ukrainskaj infrastruktury — enierhietycy, transpartnych vuzłach i centrach pryniaćcia rašeńniaŭ.
«Padobnaja apieracyja, pa niekatorych danych, jakaja atrymała ŭmoŭnuju nazvu «Małanka Zieŭsa», moža być źviazana z chodam dypłamatyčnych pieramovaŭ. Jaje meta — prymušeńnie Kijeva da pryniaćcia rasijskich umoŭ pad pahrozaj pierachodu kanfliktu ŭ maksimalna žorstkuju i chutkapłynnuju fazu», — cytuje Čały.
U artykule taksama zhadvajecca, što «za apošnija dni tolki na adzin rasijski aeradrom było ździejśniena minimum vosiem rejsaŭ Ił-76, jak miarkujecca, dla dastaŭki bujnoj partyi rakietnaha ŭzbrajeńnia».
Analityk źviartaje ŭvahu, što ŭ zahałoŭku artykuła, jaki źjaviŭsia za dzień da apieracyi USU, prysutničaje słova «adpłata». Ale adpłata za što?
Ciapier artykuł vydaleny, ale zachavaŭsia ŭ archivach internetu.
Jak davodzić Čały, ukrainskaja ataka 1 červienia pierapyniła zapłanavanuju Rasijaj rakietnuju ataku pad vyhladam apieracyi «Małanka Zieŭsa», jakaja rychtavałasia pad čarhovy raŭnd pieramovaŭ u Stambule. I mienavita hetym tłumačacca «kisłyja tvary» rasijskaj delehacyi, jakaja raźličvała «pradjavić svaje karty».
Dziŭnaja reakcyja Pucina
Zamiest pryznańnia strat u avijacyi, rasijskaja prapahanda adreahavała inakš. Namieśnik ministra zamiežnych spraŭ Siarhiej Rabkoŭ zajaviŭ, što ŭkrainskija ataki byli sprobaj sarvać druhi raŭnd pieramoŭ u Stambule. Ale jakija mienavita ataki jon maje na ŭvazie?
Adkaz na heta pytańnie daje videa narady Pucina z členami ŭrada, jakoje, pa aficyjnych krynicach, adbyłosia 4 červienia.
Na im Pucin prosić staršyniu Śledčaha kamiteta Rasii Alaksandra Bastrykina zrabić spravazdaču ab vynikach rasśledavańnia padryvaŭ u noč z 31 maja na 1 červienia čyhunačnych mastoŭ u Branskaj i Kurskaj abłaściach, u vyniku jakich zahinuli 7 čałaviek. Hetyja incydenty, a nie ataka dronaŭ, stali asnoŭnaj temaj narady.
Analityk zaŭvažaje, što ŭsia narada vyhladaje jak pastanoŭka. Na ekranie źjaŭlajecca dziciačy doktar Leanid Rašal, jaki raptam pačynaje havaryć nie pra biahučuju situacyju, a pra toje, jak «pravilna zabrali Krym u 2014-m». Ni słova pra źniščanyja samaloty. Usie akcenty — tolki na «teraryzm».
Pad kaniec narady Pucin, čytajučy zahadzia padrychtavany tekst z suflora, kaža: «Ukraina pieraŭtvarajecca ŭ terarystyčnuju dziaržavu, a jaje sajuźniki — u sponsaraŭ teraryzmu. (…) Za što ich zaachvočvać, dajučy pieradyšku ŭ bajavych dziejańniach, jakija buduć vykarystanyja dla napampoŭvańnia režymu zachodniaj zbrojaj, dla praciahu hvałtoŭnaj mabilizacyi i padrychtoŭki inšych terarystyčnych aktaŭ, padobnych da tych, jakija byli ažyćcioŭleny ŭ Branskaj i Kurskaj abłaściach».
«Jon havoryć nie ab atakach na samaloty, a ab uzryvach mastoŭ», — adznačaje Čały.
«A zaraz składziem 2 plus 2. Na aeradromach Rasii stajali zapraŭlenyja, hatovyja da naniasieńnia rakietnych udaraŭ samalotaŭ. Udaraŭ adpłaty za terarystyčnyja akty, jakija zdarylisia niekalkimi hadzinami raniej, rakietami, jakija zavozilisia za niekalki dzion da nahody dla ŭdaraŭ hetymi rakietami», —
akcentuje ŭvahu analityk i pryhadvaje videa z dronaŭ, na jakim možna razhledzieć tyja samyja kryłatyja rakiety, užo padviešanyja pad kryłami samalotaŭ, što robicca niepasredna za paru hadzin da vyletu.
«Voś jaki zručny terakt, tak?» — iranična zaŭvažaje Čały.
Vialikaja hutarka z Franakam Viačorkam — pra kruhły stoł z Łukašenkam, pamyłki, chejtaraŭ i hałoŭnaje dasiahnieńnie26
Kamientary
Pod eti podryvy i proviedieno, zaranieje sntiaoje, sovieŝanije putina "4 ijunia".
Čałyj prav v tom, čto samoloty i udar s samolotov po Ukrainie, "mołnija zievsa", byli podhotovleny pod podryv FSB žieleznodorožnych putiej i mostov s žiertvami sriedi mirnoho nasielenija Rośsii.
I da, SBU opieriediło i pierieihrało okurka.