Rasijanka raskazvała pra hłybinnuju moc Łukašenki — ciapier jana ŭ ślazach źjazdžaje ź Biełarusi

Volha — čuvaška pa nacyjanalnaści, jana pryjechała ŭ Biełaruś u 2015-m. Vierahodna, u našu krainu jana pierajechała praz šlub: u adnym z rolikaŭ žančyna kaža, što jaje muž maje biełaruskaje hramadzianstva.

Dniami Volha ahałomšyła svaich padpisčykaŭ navinami, što jana zapisvaje svoj apošni rolik na hetym kanale, bo vymušanaja emihravać ź Biełarusi. Usio praź źmieny ŭ Kodeksie ab adukacyi, jakija pačynajuć dziejničać u našaj krainie z 1 vieraśnia 2025-ha — pavodle ich usie dzieci zamiežnych hramadzian, jakija žyvuć u Biełarusi, musiać vučycca ŭ biełaruskich škołach. Žančyna vučyć svaich dziaciej sama i pryśviaciła hetamu 10 hadoŭ, ale novy zakon pazbaŭlaje jaje takoj mahčymaści ŭ Biełarusi. 

Volha patłumačyła ŭ ślazach, jak heta pracuje:

«Maje dzieci byli prymacavanyja da biełaruskaj škoły i zdavali tam atestacyju. Ale potym pačali začyniać tyja pryvatnyja škoły, bo skazali, što tam usie tolki zmahary. Našych ludziej, jakija padtrymlivajuć Alaksandra Ryhoraviča i zachoŭvali za saboj prava navučać dziaciej na siamiejnaj adukacyi, prosta pazbavili [hetaha prava].

Ja vymušanaja była prymacavać svaich dziaciej da rasijskaj škoły, kab zastavacca na siamiejnaj adukacyi i navučać ich u Biełarusi. Ja była zamiežnaj hramadziankaj, i ŭ mianie było prava navučać svaich dziaciej u Rasii i žyć pry hetym u Biełarusi».

Volha kaža, što biełaruskija hramadzianie, jakija žadajuć vučyć dziaciej doma, taksama pieravodzili ich u rasijskija škoły, chacia pieršapačatkova «vychoŭvali ich lubić svaju Radzimu i svajho prezidenta». U inšym vypadku, kaža rasijanka, hetyja biełarusy ryzykavali zastacca bieź dziaciej, bo dziaržava adabrała b ich. Samyja aktyŭnyja z tych baćkoŭ pisali listy Łukašenku, ale biezvynikova.

Pavialičyć

Reč u tym, što ŭ Biełarusi nielha pierajści na chatniaje navučańnie, kali prosta nie chočaš vieści dzicia ŭ škołu. Heta mahčyma, kali ŭ dziciaci jość miedyčnyja pakazańni, u takim vypadku treba atrymać adpaviednuju daviedku ŭ paliklinicy. 

Inšy varyjant — navučańnie pa indyvidualnym płanie, i tut dazvoł treba atrymlivać u kiraŭnictva škoły. U Kodeksie ab adukacyi prapisana dźvie nahody dla takoha dazvołu. Naprykład, jaho mohuć dać dziciaci, jakoje surjozna zajmajecca sportam, mastactvam ci navukaj, i tamu jamu treba hnutki hrafik. Mohuć być i inšyja istotnyja pryčyny, jakija nie dali b dziciaci rehularna chadzić u škołu — naprykład, častaja adsutnaść małoha pa siamiejnych abstavinach.

Baćki nakštałt Volhi, jakija majuć zamiežny pašpart i addanyja idei vučyć dzicia doma, apynulisia ŭ tupiku. Tamu žančyna vyrašyła pierajazdžać. Chutčej za ŭsio, jana pierabiarecca ŭ Rasiju.

Rolik Volhi mienš za dzień nabraŭ 48 tysiač prahladaŭ. U kamientarach žančyna dadała, što «śviet jaje dziaciej i jaje razburany». A jašče adznačyła, jak joj škada novych emihrantaŭ ź Biełarusi, kaho z krainy vyšturchnuła luboŭ da chatniaha navučańnia. Chacia, zdajecca, škadavańnie ŭ žančyny trochi adnabokaje: 

«Voś tamu biełaruskim hramadzianam i daviałosia źjazdžać sa svajoj Radzimy. Chacia jany nie byli bčbistami».

Raniej Volha apraŭdvała svajo niežadańnie vykarystoŭvać słova «Biełaruś»: maŭlaŭ, słova «Biełaruś» u ruskaj movie — heta vyklučeńnie, jakoje pajšło ź biełaruskaj, a jana biełaruskuju movu nie vyvučała, tamu budzie kazać «Biełoruśsija» «pa aficyjnych praviłach ruskaj movy».

U adnym z rolikaŭ Volha raskazvała pra svajo staŭleńnie da Łukašenki:

«Alaksandr Ryhoravič z vami, z narodam, nosicca, i stavicca da vas jak da svaich dziaciej. Realna, dzie vy jašče ŭ śviecie bačyli takoha prezidenta?

Voś realna, pahladzicie videa, jak Alaksandr Ryhoravič siabie pavodzić i trymaje, kali vakoł jaho vielmi šmat naroda. U im tak šmat hetaj baćkoŭskaj hłybinnaj mocy, Boh jamu padaryŭ prosta ahromnistuju zdolnaść być baćkam usiamu narodu, realna».

• 6
• 2
• 117
• 23
• 2
• 1
• 4
• 1