«Ciapier ni ad kaho nie zaležu». Z «SB. Biełaruś siehodnia» zvolniłasia čarhovaja prapahandystka
U hałoŭnaj prapahandysckaj haziecie Julijana Leanovič rabiła štotydniovyja intervju z telezorkami i dziejačami kultury. Kožnaha raspytvała pra padziei 2020 hoda — jak hetym ludziam nibyta pahražali i jak mužna jany pieraadolvali hetyja składnaści. Ciapier eks-žurnalistka znajšła inšy zaniatak.
Julijana Leanovič pisała dla «SB. Biełaruś siehodnia» bolš za 10 hadoŭ. Apošnija jaje teksty byli apublikavany na sajcie vydańnia ŭ lutym 2025 hoda.
Leanovič hadami rabiła intervju z prapahandystami. Kali skončylisia paznavalnyja, to pierajšła da małaviadomych. Ale što było abaviazkovym, dyk heta raspytvańnie surazmoŭcaŭ pra «ŭroki 2020 hoda».
Julijana taksama pisała ody artystam z praŭładnaha «Marafona adzinstva». A kali Łukašenka ŭručyŭ čarhovuju ŭznaharodu svajoj niaviestcy, Leanovič daručyli rabić intervju z Hannaj Siałuk.
Karaciej, karjera Julijany ŭ «SB. Biełaruś siehodnia» składvałasia davoli paśpiachova. Što ž prymusiła jaje dumać pra źmienu prafiesii?
Imavierna, adna z pryčyn — luboŭ da padarožžaŭ («Naša Niva» niejak pisała pra jaje vandroŭku ŭ Italiju). Jašče ŭ 2022 hodzie Leanovič prajšła atestacyju na hida ŭ Nacyjanalnym ahienctvie pa turyźmie. Jana śćviardžała, što pieršapačatkova nie płanavała ničoha z hetym rabić, bo mieła asnoŭnuju pracu. Ale potym pačała pravodzić ekskursii — i zrazumieła, što joj heta vielmi padabajecca.
Sioleta ŭ krasaviku jana źmianiła pracu. Prapahandystka radavałasia ŭ sacyjalnych sietkach: «Aficyjna ni ad kaho nie zaležu i aficyjna maju mahčymaść telepartavacca ŭ roznyja harady i krainy». Darečy, zrabiła dziaŭčyna hety dopis, kali była ŭ kamandziroŭcy-padarožžy ŭ Japonii.
Ciapier Leanovič pravodzić ekskursii pa Minsku. Košt jaje pasłuh dla hrupy składaje ad 250 da 530 rubloŭ. Samy darahi varyjant — heta hibryd ekskursii i fotasiesii.
Julijana abiacaje, što turysty nie tolki daviedajucca cikavyja fakty pra Minsk, ale i atrymajuć 30 fotazdymkaŭ ad prafiesijnaha fatohrafa. Ideja ludziam padabajecca — niechta navat hatovy apranucca zhodna z dres-kodam «dzievianostyja», kab narabić atmaśfiernych fota ŭ savieckim styli.
U instahramie Julijana piša, što ŭ jaje moža być da piaci ekskursij za dzień. Rejtynh Leanovič na tematyčnych sajtach davoli vysoki. Jana moža pravodzić ekskursii na biełaruskaj, ruskaj, anhlijskaj, francuzkaj i iŭrycie.
U Rasiju z turami eks-prapahandystka taksama jeździć. U Sankt-Pieciarburhu jaje ŭraziŭ miemaryjalny prajekt «Apošni adras» — na fasadach damoŭ byli ŭstalavany sotni šyldaŭ ź imionami ludziej, jakija zahinuli praz palityčnyja represii. Represii ŭ Biełarusi Julijana ŭ publikacyjach nie zaŭvažała.
Raniej z «SB. Biełaruś siehodnia» paśla 12 hadoŭ pracy zvolniłasia inšaja prapahandystka — Śviatłana Isajonak (jana niaviestka byłoj ministarki infarmacyi i deputatki Lilii Ananič). Isajonak znajšła pracu nie bi lažačaha — u sakrataryjacie Pałaty pradstaŭnikoŭ.
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža
Prapahandystka ANT Natalla Stelmach źmianiła imia na Naci Ryšna i zarablaje ŭ Mieksicy na šamanach i narkatyčnych hrybach
Kiraŭnica internet-prajektaŭ ANT raspaviała, čamu raptoŭna zvolniłasia ŭ 2022 hodzie i jak źjechała ŭ Aŭstraliju
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary