«Цяпер ні ад каго не залежу». З «СБ. Беларусь сегодня» звольнілася чарговая прапагандыстка
У галоўнай прапагандысцкай газеце Юліяна Леановіч рабіла штотыднёвыя інтэрв'ю з тэлезоркамі і дзеячамі культуры. Кожнага распытвала пра падзеі 2020 года — як гэтым людзям нібыта пагражалі і як мужна яны пераадольвалі гэтыя складнасці. Цяпер экс-журналістка знайшла іншы занятак.
Юліяна Леановіч пісала для «СБ. Беларусь сегодня» больш за 10 гадоў. Апошнія яе тэксты былі апублікаваны на сайце выдання ў лютым 2025 года.
Леановіч гадамі рабіла інтэрв'ю з прапагандыстамі. Калі скончыліся пазнавальныя, то перайшла да малавядомых. Але што было абавязковым, дык гэта распытванне суразмоўцаў пра «ўрокі 2020 года».
Юліяна таксама пісала оды артыстам з праўладнага «Марафона адзінства». А калі Лукашэнка ўручыў чарговую ўзнагароду сваёй нявестцы, Леановіч даручылі рабіць інтэрв’ю з Ганнай Сялук.
Карацей, кар'ера Юліяны ў «СБ. Беларусь сегодня» складвалася даволі паспяхова. Што ж прымусіла яе думаць пра змену прафесіі?
Імаверна, адна з прычын — любоў да падарожжаў («Наша Ніва» неяк пісала пра яе вандроўку ў Італію). Яшчэ ў 2022 годзе Леановіч прайшла атэстацыю на гіда ў Нацыянальным агенцтве па турызме. Яна сцвярджала, што першапачаткова не планавала нічога з гэтым рабіць, бо мела асноўную працу. Але потым пачала праводзіць экскурсіі — і зразумела, што ёй гэта вельмі падабаецца.
Сёлета ў красавіку яна змяніла працу. Прапагандыстка радавалася ў сацыяльных сетках: «Афіцыйна ні ад каго не залежу і афіцыйна маю магчымасць тэлепартавацца ў розныя гарады і краіны». Дарэчы, зрабіла дзяўчына гэты допіс, калі была ў камандзіроўцы-падарожжы ў Японіі.
Цяпер Леановіч праводзіць экскурсіі па Мінску. Кошт яе паслуг для групы складае ад 250 да 530 рублёў. Самы дарагі варыянт — гэта гібрыд экскурсіі і фотасесіі.
Юліяна абяцае, што турысты не толькі даведаюцца цікавыя факты пра Мінск, але і атрымаюць 30 фотаздымкаў ад прафесійнага фатографа. Ідэя людзям падабаецца — нехта нават гатовы апрануцца згодна з дрэс-кодам «дзевяностыя», каб нарабіць атмасферных фота ў савецкім стылі.
У інстаграме Юліяна піша, што ў яе можа быць да пяці экскурсій за дзень. Рэйтынг Леановіч на тэматычных сайтах даволі высокі. Яна можа праводзіць экскурсіі на беларускай, рускай, англійскай, французкай і іўрыце.
У Расію з турамі экс-прапагандыстка таксама ездзіць. У Санкт-Пецярбургу яе ўразіў мемарыяльны праект «Апошні адрас» — на фасадах дамоў былі ўсталяваны сотні шыльдаў з імёнамі людзей, якія загінулі праз палітычныя рэпрэсіі. Рэпрэсіі ў Беларусі Юліяна ў публікацыях не заўважала.
Раней з «СБ. Беларусь сегодня» пасля 12 гадоў працы звольнілася іншая прапагандыстка — Святлана Ісаёнак (яна нявестка былой міністаркі інфармацыі і дэпутаткі Ліліі Ананіч). Ісаёнак знайшла працу не бі ляжачага — у сакратарыяце Палаты прадстаўнікоў.
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа
Прапагандыстка АНТ Наталля Стэльмах змяніла імя на Наці Рышна і зарабляе ў Мексіцы на шаманах і наркатычных грыбах
Кіраўніца інтэрнэт-праектаў АНТ распавяла, чаму раптоўна звольнілася ў 2022 годзе і як з'ехала ў Аўстралію
Цяпер чытаюць
«Губазікаўцы схіляюць Калеснікаву да высылкі, але яна не хоча»4
Каментары