U Rasii razhladajecca mahčymaść uviadzieńnia padatku na vyjazny turyzm. Pra heta paviedamiŭ staršynia kamiteta Dziarždumy pa turyźmie i raźvićci turystyčnaj infrastruktury, deputat ad partyi «Novyja ludzi» Sanhadžy Tarbajeŭ, piša Moscow Times.
Pa jaho słovach, uviadzieńnie dadatkovaha zboru z kožnaj pucioŭki za miažu mahło b stać mieraj padtrymki ajčynnaj turystyčnaj haliny. «Heta miera całkam moža być uviedzienaja, ale treba pahladzieć, jak jana budzie ŭpłyvać na ekanomiku. Uvohule, hrošy, jakija ŭ nas sychodziać za miažu ŭ častcy vyjaznoha turyzmu, nakiroŭvać na raźvićcio ŭnutranaha turyzmu było b łahičnym i pravilnym [krokam]», — zajaviŭ jon.
Tarbajeŭ spasłaŭsia na danyja pa elektronnych pucioŭkach za 2024 hod, zhodna ź jakimi rasijanie vydatkavali na zamiežnyja pajezdki kala 700 miljardaŭ rasijskich rubloŭ (8,8 młrd dalaraŭ).
Jon patłumačyŭ, što pry dadatkovaj nacency ŭ 200—300 rubloŭ (2,5—3,8 dalara) na kožnuju pucioŭku mahčyma štohod akumulavać 5—7 miljardaŭ rasijskich rubloŭ (63,4 młn dalaraŭ — 88,7 młn dalaraŭ) na raźvićcio turystyčnaj infrastruktury ŭ Rasii.
Parłamientar taksama adznačyŭ nieabchodnaść spraviadlivaha raźmierkavańnia hetych srodkaŭ pamiž rehijonami, asabliva padkreśliŭšy važnaść padtrymki terytoryj z vysokaj pryrodnaj kaštoŭnaściu. Pavodle jaho mierkavańnia, u pieršuju čarhu dapamohu pavinny atrymać Bajkał, Ałtaj i Karelija — rehijony, što adčuvajuć surjoznuju ekałahičnuju nahruzku.
Ciapier čytajuć
Vyjšaŭ na svabodu były top-žurnalist ANT Dźmitryj Siemčanka7
Kamientary