Adzin ukoł — i słych viartajecca. Navukoŭcy zrabili praryŭ u lačeńni hłuchaty
Vučonyja zdoleli zrabić sapraŭdny praryŭ u lačeńni pryrodžanaj hłuchaty. Daśledčyki z Karalinskaha instytuta razam z kalehami z Kitaja praviali kliničnaje vyprabavańnie, u jakim udzielničali dziesiać čałaviek va ŭzroście ad adnaho da dvaccaci čatyroch hadoŭ. Usie jany mieli parušeńnie słychu z-za hienietyčnaj mutacyi. Vyniki daśledavańnia apublikavanyja ŭ časopisie Nature Medicine.
Udzielnikam vyprabavańnia zrabili adzin ukoł — unutry vucha ŭviali virus z vypraŭlenym hienam, jaki adkazvaje za vypracoŭku białku atafierlinu. Hety białok važny dla pieradačy hukavych sihnałaŭ u mozh.
Užo praź miesiac udzielniki pačali lepš čuć, a ŭ niekatorych — asabliva ŭ dziaciej — vyniki byli vielmi ŭražlivymi. Naprykład, siamihadovaja dziaŭčynka praź niekalki miesiacaŭ paśla terapii zmahła svabodna razmaŭlać z maci.
Palepšyłasia i jakaść słychu ŭ darosłych: hučnaść hukaŭ, jakuju jany mahli ŭsprymać, źniziłasia z 106 da 52 decybiełaŭ. Pabočnych efiektaŭ pry hetym nie nazirałasia, akramia niaznačnaha i časovaha źnižeńnia kolkaści peŭnych kryvianych cielcaŭ.
Daśledčyki padkreślivajuć, što heta tolki pačatak. Nastupnym etapam stanie raspracoŭka lačeńnia dla inšych, bolš raspaŭsiudžanych vidaŭ spadčynnaj hłuchaty.
Hetaje adkryćcio moža źmianić padychod da lačeńnia słychavych parušeńniaŭ u budučyni.
Kamientary