Vajar ź Biełaruskaha dobraachvotnickaha korpusa: Ja žyŭ u ružovaj burbałcy
«Ja dumaŭ: voś ja zaraz pryjedu, my tut paŭhodzika pavajujem, i ja pajedu vyzvalać Biełaruś. Ale napraŭdzie ŭsio inakš», — kaža bajec Biełaruskaha dobraachvotnickaha korpusa.
Intervju z adnym z bajcoŭ Biełaruskaha dobraachvotnickaha korpusa (BDK) źjaviłasia na ŭkrainskim 24-m kanale. Siarod inšaha, bajec pryznajecca, što pieraasensavaŭ svaje raniejšyja ŭjaŭleńni pra palityčnuju situacyju.
«Ja žyŭ u ružovaj burbałcy. Ja dumaŭ: voś ja zaraz pryjedu, my tut paŭhodzika pavajujem, i ja pajedu vyzvalać Biełaruś. Ale napraŭdzie ŭsio inakš.
Ja ciapier razumieju, što, pakul nie budzie poŭnaha razvału Rasii, Biełaruś nie budzie nikoli volnaj. Bo Biełaruś ciapier — pad pratektaratam Rasii.
Kali byli adnosna mirnyja časy, to Biełaruś adnosna volna siabie adčuvała. Tady ŭłada taksama namahałasia niejkija svaje intaresy zachoŭvać i kamunikavać nie tolki z Rasijaj, ale i ź Jeŭropaj. Ale ciapier u ich tolki adzin sajuźnik, i
ciapier kazać ab prajekcie «vyzvalić Biełaruś» — heta prosta iluzija tych palitykaŭ [jakija pra heta havorać]. Moža jany razumiejuć, moža nie razumiejuć. Mnie zdajecca, tolki paśla razvału Rasii možna [budzie kazać] pra Biełaruś. Nielha prosta tak uvajści na tankach i zvolnić: heta tak nie adbudziecca», — pierakanany jon.
Ale hety realizm myśleńnia nie pieraškadžaje bajcu maryć pra biełaruskuju, niezaležnuju, spraviadlivuju Biełaruś.
Jakoj bačycca bajcu Biełaruś budučyni?
«Takija bazavyja rečy, jak kultura, mova, historyja, pavinny być biełaruskimi, — kaža bajec. — Ale [kab hetaha dabicca], ja navat uvohule nie viedaju, heta vielmi składanaje pytańnie. Mnie chaciełasia b, kab Biełaruś była krainaj, dzie kožny čałaviek mieŭ by prava na svabodnaje žyćcio. Kab nichto nie moh pryjści da ciabie, pahladzieć u telefon i skazać: «Usio, ty jedzieš u turmu prosta tamu, što ty tam skazaŭ nie toje». Kab ludzi adčuvali siabie spakojna».
Ciapierašniaja Biełaruś dalokaja ad ideału hetaha vajara.
«U Biełarusi situacyja horšaje. Represii rastuć. Sistema nikoha nie škaduje», — adznačyŭ bajec.
Biełaruski dobraachvotnicki korpus — abjadnańnie biełaruskich dobraachvotnikaŭ, jakija zmahajucca z rasijskaj ahresijaj u šerahach Uzbrojenych sił Ukrainy. Jak usie zamiežnyja dobraachvotnickija farmavańni, BDK padparadkavanyja Hałoŭnamu ŭpraŭleńniu raźviedki Ministerstva abarony Ukrainy.
Pra stvareńnie Biełaruskaha dobraachvotnickaha korpusa zajavili 25 śniežnia 2022 hoda dobraachvotniki Ihar Jankoŭ (pazyŭny «Janki»), Andrej Traceŭski (pazyŭny «Bieśśmiarotny») i Radzijon Batulin («Hiena»). Raniej u 2022 hodzie apošni byŭ składzie pałka imia Kastusia Kalinoŭskaha.
U śniežni 2023 hoda ŭłady Biełarusi abviaścili BDK «ekstremisckim farmiravańniem» — jak i sotni inšych niepadkantrolnych prarasijskamu režymu struktur, ŚMI, hramadskich arhanizacyj i resursaŭ.
Kamientary