Nie lubicie kinošnych supierhierojaŭ? Novy «Supiermien» (Superman) moža prymusić vas źmianić mierkavańnie. Raskazvajem, jak DC Studios udychnuli novaje žyćcio ŭ staruju jak śviet historyju.
U kinakampanii DC Studios, adkaznaj za kultavych supierhierojaŭ nakštałt «Betmiena» i «Supiermiena», apošnija hady nie zadalisia. Apošnija stužki pra Fłeša, Akvamiena, Šazama i inšych supierhierojaŭ prynosili kampanii adny straty i ŭ najlepšym vypadku źmiašanyja vodhuki. Samym haniebnym było toje, što ŭ prakacie pravaliŭsia doŭhačakany sikveł «Džokiera» — stužka «Džokier: Šalenstva na dvaich» sabrała bieźlič niehatyŭnych vodhukaŭ.
U takim vypadku nie abyścisia bieź pierazahruzki. DC Studios vyrašyli pačać jaje z mocnaj karty — kultavaha supierhieroja, jakoha viedajuć daloka pa-za miežami śvietu komiksaŭ. Z Supiermiena, inakš kažučy.
Jaho historyi ŭžo 87 hadoŭ. Jana pačynajecca na płaniecie Krypton, dzie budučamu supierhieroju, na toj čas niemaŭlatku, dajuć imia Kał-Eł. Tuju płanietu źniščajuć, ale baćka dziciaci paśpiavaje adpravić jaho na Ziamlu, dzie kryptoniec atrymlivaje imia Kłarka Kienta.
Kłark traplaje ŭ siamju amierykanskich fiermieraŭ, jakija vychoŭvajuć jaho i vučać prostaj ziamnoj etycy — dobrym učynkam, čałaviečnaści i pačućciam. Kient staleje, znachodzić sabie pracu žurnalista, siabroŭ i kachanuju. A paralelna z hetym adkryvaje ŭ siabie zvyščałaviečuju moc, tryvałaść, zdolnaść lotać i šmat usiaho inšaha, što Kłark vykarystoŭvaje, kab patajemna rabić dobryja spravy.
Tak naradžajecca Supiermien.
Šmat chto ŭsprymaje hetaha hieroja jak idealnuju istotu. Ale Džejms Han, ciapierašni bos DC Studios i režysior novaj stužki, licha raźmiataje hetyja šabłony.
Jaho Supiermien pieražyvaje niaprosty čas. Jon zdoleŭ spynić vajnu va Uschodniaj Jeŭropie, ale nijak nie moža abaranić siabie ad Leksa Lutara, maładoha miljardera-technakrata, jaki apantany idejaj źniščyć kryptonca.
Han nie saromiejecca taho, što i Supiermien byvaje ŭraźlivy. Jaho supierhieroj nie razdaje zadavolenyja intervju, a lažyć bieź sił, pieramožany vorahami, i nie moža znajści ahulnuju movu z kachanaj dziaŭčynaj. Zdolnaść Supiermiena rabić pamyłki — častka jaho čałaviečnaści, i jon sam pryznajecca ŭ stužcy, što ličyć heta pryhožym.
Kali ty supierhieroj, tvaje pamyłki mohuć kaštavać žyćcia miljonam, i baraćba Kienta ź Lutaram jakraz pierachodzić na hety ŭzrovień. Ale jak pieramahčy taho, kaho lubiać va ŭsim śviecie? Tolki praz publičnaje ckavańnie, na što i idzie Lutar. Dla Supiermiena heta vyklik jašče i tamu, što Lutar vyciahvaje ŭ publičnaść samaje patajemnaje — paviedamleńnie ad baćkoŭ kryptonca pra toje, što ich syn musić rabić na Ziamli.
Adnaho z hetych baćkoŭ hraje Bredli Kupier. U roli Supiermiena — sieryjalnaja zorka Devid Karenśviet. Syhrać kultavaha piersanaža — składanaja zadača, ale Karenśviet vydatna spałučaje ŭ svajoj pracy emacyjnaść Kłarka Kienta ź siłaj Supiermiena.
Heta film i pra čałaviečnaść, što chavajecca za komiksavymi adzieńniami supierhierojaŭ. Niekatoryja piersanažy mohuć padacca stereatypna admoŭnymi — uziać chacia b Vasila Hurko, prezidenta mifičnaj Baravii, jaki maryć uvarvacca ŭ susiedniuju krainu, što pad abaronaj Supiermiena.
Ale heta historyja nie pra ich. Heta historyja pra čužaka, jaki nie moža da kanca stać svaim i znajści siabie, ale śviadoma robić vybar na karyść svajho novaha atačeńnia, na karyść dabra. I kali heta — jaho hałoŭnaja moc, atrymlivajecca, što takim supierhierojem moža stać kožny.
«Naša Niva» — bastyjon biełaruščyny
PADTRYMAĆCiapier čytajuć
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać16
Kamientary