Zorka «Biełsata» Valer Rusielik raskazaŭ, čym ryba ŭ Polščy adroźnivajecca ad biełaruskaj
Błohier i viadučy «Biełsata» Valer Rusielik chodzić na rybu z samaha dziacinstva. Užo prajšło piać hadoŭ z momantu, jak jon źmianiŭ rodny Nioman na Visłu. Dla «Našaj Nivy» rybak padzialiŭsia ŭniviersalnymi łajfchakami dla dobraha ŭłovu i hatavańnia ryby, a taksama raskazaŭ, čym takoje chobi dapamahaje.
«Vychodžvaješ svaje stresy»
Da 2020 hoda Valer časta rybačyŭ u Hrodnie i jaho vakolicach. U dziacinstvie jany z bratam łavili rybu na Niomanie — navat rukami, na kamianistym pierakacie, dzie toje było mahčyma.
Kali ŭ Biełarusi pačalisia pratesty, žurnalist užo pracavaŭ na «Biełsacie» z Varšavy. Vychodnych u Valera amal nie było, tamu, kab adpačyć, jon staŭ chadzić rybačyć na raku Visła.
«Vychodziš tak na hadzin piać. Paŭhadzinki łoviš, a čatyry z pałovaj — prosta chodziš, słuchaješ ptušak, vadu. I tak vychodžvaješ svaje stresy. U mianie ad Visły za hetyja piać hadoŭ takoje ŭražańnie, što možna voś tak dla dušy pasiadzieć, adstresavacca», — tłumačyć žurnalist.
Kab rybačyć u Polščy, treba mieć śpiecyjalny dazvoł, kaža jon. Dla hetaha Valer raić źviarnucca ŭ bližejšuju rybackuju kramu — supracoŭniki ŭsio rastłumačać i padkažuć, dzie možna zdać nievialički ekzamien. Časta apytańnie pra techniku łoŭli ryby, dazvolenyja miescy i inšyja techničnyja momanty možna prajści adrazu ŭ kramie.
U vyniku vydajecca maleńkaja siniaja knižka — dazvoł na łoŭlu, dzie jość vaš fotazdymak, jašče raz prapisany asnoŭnyja praviły, a taksama tablica, jakuju treba zapaŭniać pierad kožnym pachodam na rybu. Vydajecca jana na kankretny termin i vajavodstva (anałah vobłaści ŭ Polščy — NN). Apošniuju hadavuju licenziju biełarus atrymlivaŭ pryblizna za 100 jeŭra (kala 345 rubloŭ).
Łavić rybu možna ceły hod, ale jość terminy, kali nie dazvolena turbavać niejki asobny vid. Naprykład, nierast u ščupaka — z Novaha hoda da 1 maja, u hety čas jaho čapać nielha.
«Ryba — heta pryjemny bonus»
Kab daviedacca bolš pra dobryja miescy, Valer raić hladzieć admysłovyja polskija hrupy na fejsbuku, a taksama nie saromiecca padychodzić da samich rybakoŭ — jany vielmi zyčlivyja. Kala varšaŭskaj Visły možna sustreć i šmat biełarusaŭ — praŭda, sam žurnalist starajecca vychodzić na rybu sam-adzin, kab adpačyć.
Valer kaža, što dla jaho hałoŭnaje — praces. U śniežni 2024 hoda rybak vyłaviŭ try vielizarnyja ščupaki, adzin ź jakich byŭ 3,6 kiłahrama, ale ahułam za trafiejami jon nie honicca.
«Pamknieńnia dakazvać niešta niama. Jedzieš dla kajfu, najpierš — dla spakoju. Ryba — heta pryjemny bonus», — kaža Rusielik.
Pry hetym zaŭvažaje, što jeści zdabytki vielmi lubić. Šmat hatuje z ryby, sušyć jaje.
Valer dzielicca łajfchakam, jak praściej pačyścić rybu ad łuski: jaje treba niekalki razoŭ ablić kipniem — ale akuratna, kab miasa nie abvaryłasia.
«Hety zaniatak u hatavańni samy lubimy — łusku čyścić. Treba prosta ŭmieć. Troški kipniu — i budzie kajf», — tłumačyć biełarus.
Pachody na rybu šmat nahadvajuć jamu pra rodnuju biełaruskuju viosku. Adnojčy ŭ Varšavie mužčyna viartaŭsia z paśpiachovaj łoŭli dadomu — treba było prajechać na rovary praz pryvatny siektar. Vidovišča tak nahadała jamu biełaruskaje junactva, što jon navat padzialiŭsia tym ź blizkimi.
«Užo źjaŭlajucca fajnyja miescy, jakija da dušy prykładajucca. Lahčej z depresijaj spraŭlacca, z hetaj tuhoj pa radzimie. Tak što, možna skazać, dziakujučy rybie ŭdajecca davać rady tuzie pa Biełarusi».
Ciapier čytajuć
Redaktara niezaležnaj baranavickaj haziety «Inteks-Pres» Janukieviča prysudzili da 14 hadoŭ kałonii, jaho namieśnika Pakalenku — da 12 hadoŭ4
Kamientary
Žal što tolki niechta razumieje ab tikaŭnaści i hrošach.