Mytniki pravierać pryznačeńnie transpartu, što ŭvozicca fizičnymi asobami

Biełaruskija mytniki ŭzmacniajuć kantrol za pryznačeńniem transpartnych srodkaŭ, što ŭvoziacca fizičnymi asobami.

Jak paviedamlaje pres-słužba Dziaržaŭnaha mytnaha kamiteta, analiz statystyki pra ŭviezienyja ŭ pieryjad sa studzienia pa sakavik hetaha hoda aŭtamabilaŭ pakazaŭ, što jurydyčnymi asobami ŭvieziena ŭ piać razoŭ mienš hruzavych transpartnych srodkaŭ i hruzapasažyrskich mikraaŭtobusaŭ poŭnaj masaj da 5 ton u paraŭnańni z anałahičnym pieryjadam 2009 hoda. U toj ža čas kolkaść takich transpartnych srodkaŭ, uviezienych fizičnymi asobami, uzrasła ŭdvaja.

Pavodle mierkavańnia DMK, hetyja źviestki śviedčać pra toje, što pad vyhladam transpartu dla asabistaha karystańnia ŭvoziacca transpartnyja srodki, pryznačanyja dla vykarystańnia ŭ pradprymalnickaj dziejnaści. U suviazi z hetym DMK vyrašyŭ uzmacnić kantrol.

U pryvatnaści, ciapier načalniki mytniaŭ ci asoby, jakija ich zamiaščajuć, nadzielenyja pravam vyznačać pryznačeńnie zhadanaj katehoryi transpartnych srodkaŭ.

DMK źviartaje ŭvahu, što pry pradstaŭleńni da mytnaha afarmleńnia asobie nie spatrebicca pravodzić dadatkovych dziejańniaŭ abo pradjaŭlać dadatkovyja dakumienty i piśmovyja zajavy. Usie pravieračnyja mierapryjemstvy pravodziacca ŭ ramkach apieracyj mytnaha kantrolu. Pry hetym paśviedčańnie pra mytnaje afarmleńnie vydajecca nie paźniej jak praz adzin rabočy dzień, što idzie za dniom pačatku mytnaha afarmleńnia (rehistracyi mytnaj dekłaracyi na tavary dla asabistaha karystańnia).

Pry vyznačeńni pryznačeńnia hruzavych transpartnych srodkaŭ i hruzapasažyrskich mikraaŭtobusaŭ asnoŭnymi kryteryjami, jakija prymajucca da ŭvahi, źjaŭlajucca:

— piśmovyja tłumačeńni pra metu i sposaby vykarystańnia takoha transpartnaha srodku, a taksama pradjaŭlenyja dakumienty, jakija tłumačać nieabchodnaść nabyćcia transpartnych srodkaŭ;

— infarmacyja pra najaŭnaść zarehistravanych na hetu asobu anałahičnych transpartnych srodkaŭ;

— inšyja akaličnaści, što paćviardžajuć nieabchodnaść vykarystańnia takich aŭtamabilaŭ fizičnaj asobaj u jakaści asabistaj majomaści;

— vyniki ahladu transpartnych srodkaŭ.

Pry hetym prymajucca da ŭvahi adsutnaść abo najaŭnaść prykmiet, jakija dazvalajuć charaktaryzavać pradstaŭleny transpartny srodak jak śpiecyjalny. Śpiecyjalnyja transpartnyja srodki (naprykład, takija, jak aŭtarefryžeratary, transpartnyja srodki, abstalavanyja śpiecyjalnymi miechanizmami, macavańniami, manipulatarami i inš.) pa svaim charaktary nie mohuć być adniesieny da tavaraŭ dla asabistaha karystańnia.

Jak adznačajuć u DMK, z ulikam taho, što praviadzieńnie zhadanych pravieračnych mierapryjemstvaŭ niemahčyma ažyćciavić u pahraničnych punktach mytnaha afarmleńnia, takija transpartnyja srodki nakiroŭvajucca ŭ viedamasnyja punkty mytnaha afarmleńnia, najbližejšyja da miesca žycharstva.

U vypadku niazhody z rašeńniem mytni asoba, jakaja ŭviezła transpartny srodak, moža źviarnucca ŭ Dziaržaŭny mytny kamitet.

• 0
• 0
• 0
• 0
• 0
• 0
• 0
• 0