«Stracili 5% sumy i try tydni». Jak biełarusy pazbaŭlajucca ad drennaj valuty i dzie jaje prymajuć

Dalary ŭ krainie patrochu starejuć, i banki prymajuć nie lubyja kupiury. Finustanovy damovilisia prytrymlivacca ŭ pracy ahulnych praviłaŭ — što prymajuć, a jakija kupiury viernuć, prapisana ŭ adzinym pieraliku prykmiet płaciožnaści valuty. Dakładna nie prymuć banknoty sa značnymi paškodžańniami, peŭnym śviačeńniem (heta moža być ćvil), prakołami, adarvanymi vuhłami, apalenymi, z nadpisami i malunkami.

Hetyja praviły dziejničajuć z 1 lutaha 2024 hoda. Pieryjadyčna bankaŭskaja supolnaść abmiarkoŭvaje, ci varta ich pierahladać, ale pakul nijakich źmienaŭ nie anansavali.

Ci prymajuć drennuju valutu ŭ Jeŭropie?

Dalary i jeŭra, jakija nie atrymałasia zdać u biełaruskich bankach, možna pasprabavać abmianiać za miažoj. Kali vyvozicie bujnuju sumu (ekvivalent $10 tys.), to na miažy treba zapaŭniać dekłaracyju.

Arciom sioleta jeździŭ adpačyvać u Italiju, znajomy paprasiŭ jaho pamianiać sapsavanyja kupiury. «Jon kazaŭ, što ŭsio banalna: hryzuny», — tłumačyć Arciom, adkul takija paškodžańni.

— Takich kupiur było vosiem štuk, abmianiać udałosia čatyry, ale dla hetaha vykarystoŭvali punkty apłaty daroh (brali mašynu ŭ arendu). Aŭtamat zabiraŭ kupiuru i spakojna vydavaŭ reštu, — raspavioŭ mužčyna.

— Byli jašče kupiury ź mienš prykmietnymi paškodžańniami (tolki pa krai abarvanyja), — takich było 22, ich pamianiali biez prablem.

Dźmitryj dvojčy mianiaŭ u Italii prablemnyja dalary na jeŭra. Pieršy raz — vosieńniu minułaha hoda ŭ abmieńniku ŭ Rymie. Heta było nie vielmi vyhadna, kaža mužčyna, bo ź jaho ŭziali kala €15 kamisii.

— Ale ja abmianiaŭ, bo ŭ Biełarusi hetuju kupiuru nidzie nie brali. I niadaŭna mianiaŭ taksama $100 sumaj roznymi kupiurami, jany ŭsie prablemnyja — na hety raz z pašpartam, jany zarehistravali mianie ŭ svajoj sistemie, kamisija skłała €5. Heta horad Ryva-del-Harda na poŭnačy Italii.

Adrazu niekalki čałaviek mianiali valutu ŭ Polščy. Adzin ź ich śćviardžaje, što jamu pašancavała pamianiać dla znajomaha valutu, jakuju nie brali ni ŭ adnym biełaruskim banku.

— Historyja takaja, što jašče ŭ kancy 2023 hoda dobry znajomy ŭ Minsku pradaŭ niejkaje abstalavańnie za dalary, pakupnik zusim nie tarhavaŭsia, adrazu zapłaciŭ za ŭsio najaŭnymi. Było ŭžo davoli ciomna, znajomy nie zajmaŭsia detalovym vyvučeńniem kožnaj kupiury, tolki pieraličyŭ. Na nastupny dzień vyśvietliłasia, što stos z šyrokaha boku apaleny, byccam niechta zapalničkaj vadziŭ, pryčym apalenyja miescy składali nie bolš za 3% ad usioj płoščy i nie pieraškadžali apaznańniu numaroŭ ci vadzianych znakaŭ.

Pretenzija da pakupnika ničoha nie dała.

Sprabavali zdać u niekalki dziasiatkaŭ abmieńnikaŭ, pakłaści na rachunak u banku, ale ŭsio daremna. Nichto nie braŭ na siabie adkaznaść, navat z kamisijaj nie prymali. U Polščy niekalki bujnych bankaŭ taksama admovilisia prymać takija banknoty, ale rašeńnie znajšłosia.

— Potym ja prabavaŭ zdavać u abmieńniki, ale ŭ pieršych troch udałosia zbyć tolki 15% sumy. Paźniej u hanlovym centry vyrašyŭ pasprabavać zdać pa nie vielmi vyhadnym kursie. Na majo ščaście, u abmieńniku złamałasia kasa i/ci aparat dla pieraliku, tamu supracoŭnik asabliva ničoha nie praviaraŭ. U vyniku z-za kanviersij stracili 5% sumy i try tydni času.

Pavialičyć

Hanna sprabavała ŭ Minsku abmianiać $1000 u abmieńniku kala doma, ź ich $500 zabrakavali. Pasprabavała zdać u inšych bankach — taksama atrymała admovu.

— My adkłali ich z raźlikam, što pamianiajem za miažoj. Viasnoj ja była ŭ haściach u siabroŭ u Hdańsku i ŭ pieršym ža abmieńniku — zdajecca, na vakzale — paprasiła abmianiać ich na jeŭra. Kanviersija išła praz dalary, tamu niejkuju sumu ja straciła na kursavaj roźnicy. Ale pretenzij da kupiur u polskim abmieńniku nie było.

Alaksiej časta jeździć za miažu i śćviardžaje, što prablemnuju valutu ŭ Jeŭropie zdać lohka.

— U nas nie biaruć dalary/ieŭra ź plamami, ćvillu (choć jaje vidać tolki ŭ prybory na praśviet), z adarvanymi kavałačkami kupiury, vymytyja/namočanyja, z maleńkimi mietkami (štampikami). U Polščy ŭ abmieńnikach možna naohuł biez prablem zdać lubuju valutu ź pieraličanych, — śćviardžaje mužčyna.

— U krainach Jeŭrasajuza, dzie asnoŭnaja valuta — jeŭra, naohuł možna jak abmianiać, tak i śmieła raźličvacca lubymi kupiurami. Naprykład, źniaŭ u Hiermanii €1500 u bankamacie, u Biełarusi ź ich pryniali tolki €1200. Jašče €300 pavioz abmianiać nazad u Polšču.

U Jeŭropie prablemy mohuć być z bujnymi naminałami: €200 i €500. U Ispanii zakład pakidaŭ kupiurami pa €200, dyk žančyna kazała, što naohuł upieršyniu bačyć takija banknoty. I nie va ŭsich kramach zhadžajucca brać pad pretekstam taho, što niama rešty.

Taksama niekatoryja znajomyja viazuć «drennyja» dalary na azijackija kurorty kštałtu Tajłanda — tam usio sychodzić na ŭra.

Bałharyja z 2026 hoda rychtujecca pierajści na jeŭra, ale tam z bujnymi naminałami prablem nie ŭźnikła, raspaviadaje čytač Alaksiej.

— Było €4000 kupiurami pa €500. U Biełarusi nie prymali z-za ćvili, a ŭ Bałharyi navat pytańniaŭ nie ŭźnikła pry abmienie.

A što ŭ inšych krainach?

Lizavieta mianiała prablemnyja $100 staroha ŭzoru ź plamami ŭ Vjetnamie ŭ krasaviku hetaha hoda, chacia jaje adhavorvali ad hetaj idei.

— Nam spačatku kazali, kab my navat nie brali ich z saboj, bo nichto ich tam nie prymie. Ale my vyrašyli pasprabavać. U vyniku dalary staroha ŭzoru prymajuć praktyčna va ŭsich abmieńnikach na vulicach, praktyčna ŭsie hidy, što pradajuć tury, i hetak dalej.

Roźnica tolki ŭ kursie, pa jakim ich prymajuć. Tak, jon nižej, čym dla dalaraŭ novaha ŭzoru, ale my znajšli juvielirnuju kramu, dzie roźnica ŭ kursach dla novych i starych dalaraŭ była krychu mienš $1. Mnie zdajecca, što heta naohuł udača.

Pavialičyć

Jašče adna čytačka adznačaje, što za abmien u tym ža Tajłandzie mohuć uziać kamisiju.

— Vypadkova hod tamu trapiłasia kupiura biez vuhła. Nivodny bank nie prymaŭ, tolki Biełarusbank pa inkassa moh pryniać, ale biez abiacańnia, što zmohuć pamianiać. Plus čakać u ich ledź nie paŭhoda i z kamisijaj.

U hetym hodzie źlatała ŭ Tajłand. Tam mnohija abmieńniki (asabliva ź liku bujnych sietkavych i z bolš vysokim kursam) taksama nie prymali. Ale ŭ vyniku ŭ adnym z abmieńnikaŭ pryniali z kamisijaj kala 10% — heta vyhadna, i čakać nie treba.

Pavieł kaža, što zmoh biez prablem abmianiać $1300 u Indaniezii — u biełaruskich bankach ich nie pryniali pad pretekstam zabrudžvańniaŭ na kupiurach.

Jašče adzin čałaviek niadaŭna sprabavaŭ abmianiać dalary ŭ Kitai — niekalki kupiur naminałam $100, jakija ŭ Minsku admovilisia mianiać z-za paškodžańniaŭ bolš za 1 milimietr.

— My z partnioram adpravilisia pa pracoŭnych spravach u Šanchaj i vyrašyli, što pamianiajem hrošy tam. Ale nie tut-ta było. Akazałasia, što mianiać dalary ŭ Kitai — heta jašče taja zaduma. My abyšli niekalki bankaŭ, u kožnym ź ich nas u vyniku adpraŭlali ŭ Bank of China.

U vyniku ŭ pieršym adździaleńni hetaha banka mieniedžar skazaŭ, što tolki jaho načalnica mahła b uchvalić takuju apieracyju z zamiežnikami, a jana jakraz u adjeździe. U inšym ofisie zhadzilisia abmianiać, ale z vykanańniem peŭnych farmalnaściaŭ.

— Hrošy ŭziali, razhladali z usich bakoŭ. Paśla hetaha — pašpart, štamp ab ujeździe ŭ Kitaj, adras, dzie spynilisia, elektronnaja pošta, adras rehistracyi ŭ Minsku — karaciej, usie piersanalnyja danyja. Kali heta było zapoŭniena, razdrukavali dakumient, treba było pastavić podpis i paćvierdzić. Tolki paśla hetaha dalary pamianiali.

Choć u niekatorych krainach nieachvotna prymajuć «staryja» dalary, u Siarhieja ŭźnikła inšaja prablema. U mai jon adpačyvaŭ ź siamjoj u Jehipcie i sprabavaŭ mianiać dalary ŭ aŭtamatyčnych terminałach.

— My sutyknulisia ź inšaj prablemaj: dalary staroha ŭzoru prymalisia ŭ takich abmieńnikach biez pytańniaŭ, a voś «novyja» dalary aparaty ŭ Šarm-el-Šejchu brać nie chacieli. To bok «staryja» dalary akazalisia karyśniejšymi, čym «novyja».

Reziume: abmianiać prablemnuju valutu za miažoj možna, ale treba być hatovym da kamisij, a časam i da biurakratyi z zapaŭnieńniem papier. Važny momant: praviły ŭnutry adnoj krainy ŭ roznych bankach mohuć adroźnivacca, tamu stoadsotkavuju harantyju abmienu zahadzia dać nielha.

Pavialičyć

Jakija varyjanty jość u Biełarusi?

Kali pajezdak za miažu ŭ płanach niama, to možna skarystacca varyjantami abmienu ŭnutry krainy.

Pieršy — nie palenavacca abyjści niekalki abmieńnikaŭ roznych bankaŭ. Heta samy prosty vychad, ale ŭsio roŭna pracajomki i niepradkazalny.

Choć u bankaŭ adzinyja standarty, na praktycy rašeńnie zaležyć ad acenki kasira. Kali paškodžańni nievialikija, rabotnik banka moža pahadzicca abmianiać kupiuru.

Druhi varyjant — inkassa. U hetym vypadku abmien zojmie peŭny čas, tamu što bank nakiroŭvaje kupiury ŭ bank-kantrahienta, a potym čakaje ich nazad.

U Biełarusbanku dla hetaj apieracyi prymajuć dalary, jeŭra, rasijskija rubli. Za pasłuhu treba zapłacić kamisiju — 5% ad sumy valutnaj apieracyi ŭ ekvivalencie ŭ biełaruskich rublach, ale nie mienš za 27 rubloŭ.

U Biełahraprambanku taksama jość apieracyja inkassa dla dalaraŭ, jeŭra i rasijskich rubloŭ. Kamisija — 5%, minimum — 25 biełaruskich rubloŭ.

Akramia taho, treba trymać u hałavie, što bank-kantrahient, praź jaki budzie prachodzić apieracyja inkassa, taksama voźmie ŭznaharodžańnie. Pry hetym małyja sumy budzie zdavać niavyhadna, kali minimalnaja kamisija składaje 25—27 rubloŭ.

Treci varyjant — zdać z kamisijaj u bankach, dzie jość pasłuha pa zamienie paškodžanaj valuty. U hetym vypadku rašeńnie ab abmienie prymaje kasir, i hrošy možna pamianiać adrazu.

Takoj pasłuhaj ciapier možna skarystacca ŭ niekalkich bankach, ale treba źviartać uvahu na pamier kamisii. Voś jak vyhladajuć aktualnyja taryfy:

U Biełhazprambanku kamisija za pasłuhu pa abmienie znošanych, paškodžanych banknot na płaciežnyja banknoty toj ža valuty składaje 9% ad sumy, minimum 3 rubli. Dla hetaj apieracyi prymajuć dalary, jeŭra i rasijskija rubli.

Abmien paškodžanych dalaraŭ, jeŭra, rasijskich rubloŭ na tuju ž valutu ŭ BNB-Banku budzie kaštavać 8%ad sumy, minimum 5 rubloŭ.

U Technabanku kamisija taksama składaje 9%, minimum 5 rubloŭ. Mahčymy abmien paškodžanych dalaraŭ, jeŭra i rasijskich rubloŭ.

Za zamienu znošanych kupiur u Banku RRB na tuju ž valutu voźmuć kamisiju 9% ad sumy.

Kamisija ŭ Alfa-Banku składzie 10% ad sumy apieracyi, minimum 6 rubloŭ.

U Biełahraprambanku abmien znošanych, paškodžanych banknot bieź inkassa kaštuje 3% ad sumy, ale nie mienš 5 rubloŭ.

U Biełarusbanku umovy anałahičnyja.

BSB Bank zamienić paškodžanyja i znošanyja dalary, jeŭra i šviejcarskija franki za 15% ad sumy, minimum 10 rubloŭ. Dla inšaj valuty, jakuju prymaje bank, dziejničaje kamisija 15% ad sumy, ale minimum 50 rubloŭ.

U Parytetbanku mohuć zamianić paškodžanyja dalary i jeŭra, treba zapłacić 9% ad sumy, minimum 5 rubloŭ.

Cepter Bank moža zamianić dalary i jeŭra z kamisijaj 9%.

U Banku BiełVEB mohuć zamianić paškodžanyja rasijskija rubli z kamisijaj 10% ad sumy abmienu, minimum 5 biełaruskich rubloŭ.

Rasijskija rubli z paškodžańniami mianiajuć i ŭ banku «Dabrabyt», kamisija — 3% ad sumy, minimum 1,5 rubla.

Zamiena paškodžanych rasijskich rubloŭ mahčyma ŭ Bielinviestbanku z kamisijaj 5% ad sumy, ale nie mienš 5 rubloŭ.

• 0
• 2
• 0
• 0
• 0
• 0
• 0
• 0