Try faktary, čamu Trampu cikavy Łukašenka. Mierkavańnie Šrajbmana

Na pohlad Šrajbmana, zvanok Donalda Trampa Alaksandru Łukašenku 15 žniŭnia staŭ histaryčnaj padziejaj u historyi źniešniaj palityki Biełarusi: upieršyniu za 31 hod kiraŭnictva biełaruski palityk mieŭ razmovu pa telefonie z prezidentam ZŠA.

Analityk ličyć, što heta byŭ praryŭ paśla piacihadovaj izalacyi Minska na Zachadzie. Miesiacy aściarožnych kantaktaŭ i nievialikich žestaŭ z boku Łukašenki narešcie dali vynik — kamanda Trampa vyrašyła, što taki dyjałoh moža stać karysnym u jaho pieramovach z Pucinym.

Jak padkreślivaje Šrajbman, amierykanski lidar nie tolki nazvaŭ Łukašenku «hłybokapavažanym prezidentam», ale i dekłaravaŭ hatoŭnaść sustrecca, navat u Minsku.

Pry hetym jon niekalki razoŭ publična zaklikaŭ vyzvalić palitviaźniaŭ, nazyvajučy ich kolkaść — 1300 čałaviek. Na dumku analityka, takaja ŭvaha da zamiežnych palitźniavolenych dla amierykanskich prezidentaŭ źjaŭlajecca vyklučeńniem.

Pryčyny cikavaści Vašynhtona

Šrajbman adznačaje try faktary, jakija padsiłkoŭvajuć uvahu ZŠA.

Pa-pieršaje, Łukašenka ŭžo doŭhi čas vyzvalaŭ viaźniaŭ maleńkimi hrupami, u tym liku amierykancaŭ, što pierakanała Vašynhton u mahčymaści damovicca ź Minskam nievialikim koštam.

Pa-druhoje, praca hramadzianskaj supolnaści zrabiła temu palitviaźniaŭ centralnaj u adnosinach Biełarusi i Zachadu. Da jaje ŭžo šmat hadoŭ pryviazany sankcyi i dypłamatyčnyja namahańni suśvietnych lidaraŭ.

«Dysidenty ŭ turmach Azierbajdžana, Uźbiekistana, Turcyi, Jehipta, Rasii i mnohich inšych krain, napeŭna, chacieli b być na paradku pierahavoraŭ takoha ŭzroŭniu, jak akazalisia biełarusy», — piša analityk.

Pa-treciaje, klučavy faktar — heta pieramovy pra spynieńnie rasijska-ŭkrainskaj vajny.

Jak adznačaje Šrajbman, mienavita ŭ hetym kantekście Łukašenka, niahledziačy na paciarpiełuju za apošnija piać hadoŭ subjektnaść, zdoleŭ pryciahnuć uvahu ZŠA, prademanstravaŭšy siabie jak patencyjna karysnaha surazmoŭcu ŭ ich sprobach naładzić adnosiny z Rasijaj.

Asabliva blizki

Jak adznačaje Šrajbman, pakul niezrazumieła, jak doŭha administracyi Trampa buduć cikavyja hetyja razmovy ź Minskam i čym kankretna Łukašenka ich napaŭniaje.

U intervju Time biełaruski palityk padkreślivaŭ, što lepš za ŭsich viedaje Pucina i moža navučyć Trampa, jak razmaŭlać z Kramlom. Ciapier, kali Tramp i Pucin adnavili pramy dyjałoh, patreba ŭ Łukašenku moža źniknuć, adnak sam fakt zvanka pierad sustrečaj u Alascy pakazaŭ, što jon svaju partyju ŭ hetym siužecie jašče nie adyhraŭ.

Hety «startavy kredyt davieru» ad Biełaha doma biełaruski palityk moža pasprabavać kanviertavać u realny prahres u adnosinach z ZŠA, asabliva ŭličvajučy, što Tramp vyrazna abaznačyŭ svajo hałoŭnaje čakańnie — vyzvaleńnie palitviaźniaŭ.

«Heta zanadta zvykły dla Łukašenki tavar, kab nie skarystacca zaprašeńniem da handlu na vyšejšym uzroŭni», — piša analityk.

Nie ŭpuścić šaniec

Jak adznačaje Šrajbman, vyniki samitu na Alascy stali dobraj navinoj dla Łukašenki: pakul iduć pieramovy z Rasijaj, Minsk moža spakojna rychtavać kroki ŭ adnosinach z Vašynhtonam. Kali b Tramp i Pucin pasvarylisia, akno mahčymaściaŭ dla Biełarusi mahło b chutka zakrycca.

Adnak biełaruskija ŭłady niezadavoleny tym, što «ich kormiać tolki tvitami, vizitami i inšymi vietlivaściami». Łukašenka ŭ intervju Time nazvaŭ dźvie svaje hałoŭnyja mety — narmalizacyju dypłamatyčnych adnosin i źniaćcie sankcyj.

«Užo ŭviečary paśla sazvonu z prezidentam ZŠA Łukašenka pahavaryŭ z Koŭłam i abmierkavaŭ «mahčymyja sustrečnyja kroki», vierahodna, pieravodziačy handal na bolš pradmietnyja rejki», — zaŭvažaje Šrajbman.

Ciapier bolš vierahodna, što Minsk budzie praciahvać vyzvalać palitviaźniaŭ, a ZŠA ŭ adkaz adnoviać pracu pasolstva i pačnuć vybaračna zamarožvać sankcyi, jakija cikaviać Łukašenku.

U toj ža čas, adznačaje analityk, ryzyki zastajucca vysokimi. Impulsiŭny Tramp moža chutka stracić cikavaść, kali Łukašenka budzie mienš padatlivy, čym čakajuć u Vašynhtonie. A poŭnaje vyzvaleńnie palitviaźniaŭ Minsk hatovy rabić tolki pry ŭdziele ES, bo mienavita jeŭrapiejskija sankcyi najbolš balučyja.

«Dla aficyjnaha Minska važna, kab Tramp dapamoh pierakanać Jeŭrasajuz uklučycca ŭ pierazahruzku adnosin ź Biełaruśsiu. Addavać svoj hałoŭny kozyr u handli z adnym tolki dalokim Vašynhtonam było b dla Łukašenki zanadta nieabdumana», — davodzić Šrajbman.

Analityk padkreślivaje, što šmat zaležyć ad hłabalnaha kantekstu: kali amierykana-rasijskija pieramovy sarvucca, kaštoŭnaść Biełarusi ŭ vačach ZŠA ŭpadzie, a ŭ Maskvie sastupki Minska pačnuć vyklikać razdražnieńnie. Tamu zadača Łukašenki — padtrymlivać cikavaść ZŠA, nie raspradajučy zanadta mnoha, i paśpieć atrymać vynik, pakul u Vašynhtonie jašče jość uvaha da Minska.

Uličvajučy ŭsio heta, padsumoŭvaje analityk, «zadača pierad Minskam staić nietryvijalnaja, navat niahledziačy na spadarožny viecier ad zvanka Trampa.

Z adnaho boku, treba praciahvać niejak padtrymlivać cikavaść ZŠA da Biełarusi ŭnutry rasijska-ŭkrainskaha siužetu. Ź inšaha — nielha ad ejfaryi tanna pradać sastupki, abmianiaŭšy ich tolki na pryjemnyja, ale biaspłodnyja znaki ŭvahi. I narešcie, hetuju dylemu treba paśpieć vyrašyć za toj nievialiki čas, pakul da biełaruskich ustupak uvohule jość cikavaść u Biełym domie».

• 5
• 3
• 6
• 1
• 0
• 1
• 0
• 0