Rasija i Kitaj damovilisia ab budaŭnictvie «Siły Sibiry — 2». Heta kančatkova pieraaryjentuje rasijski haz ź Jeŭropy ŭ Aziju
U Piekinie pradstaŭniki Rasii, Kitaja i Manholii padpisali miemarandum ab budaŭnictvie hazapravoda «Siła Sibiry — 2». Hety trubapravod dazvolić hazavaj kampanii, jakaja z-za admovy Jeŭropy ad rasijskaha trubapravodnaha hazu paśla pačatku vajny sutyknułasia z surjoznymi finansavymi prablemami, davieści svaje pastaŭki ŭ Kitaj da pryblizna 100 młrd kubamietraŭ, piša «Ahienctva».
Pavodle słoŭ staršyni praŭleńnia kampanii Alaksieja Milera, miemarandum praduhledžvaje budaŭnictva hazapravoda, a taksama tranzitnaha hazapravoda praz terytoryju Manholii «Sajuz Uschod». «Hety prajekt dazvolić pastaŭlać z Rasii tranzitam u Manholiju 50 młrd kubamietraŭ hazu ŭ hod», — padkreśliŭ jon.
Damoŭlenaść, pavodle jaho słoŭ, raźličanaja na 30 hadoŭ. Cana pastavak pa hazapravodzie budzie nižejšaja, čym dla Jeŭropy, skazaŭ Miler, dadaŭšy, što razhladać jaje płanujecca paźniej.
Akramia taho, «Hazpram» padpisaŭ z kitajskaj kampanijaj CNPC dakumienty ab pavieličeńni pastavak hazu ŭ Kitaj pa «Sile Sibiry» z 38 młn kubamietraŭ u hod da 44 młn kubamietraŭ u hod, paviedamiŭ Miler.
Prajekt «Siła Sibiry — 2» dapamoža Maskvie pieranakiravać u Aziju častku hazu, jaki raniej pradavaŭsia ŭ Jeŭropu. Paśla jaho ŭvodu ŭ ekspłuatacyju Rasija zmoža pastaŭlać u Kitaj 98 młrd kubamietraŭ hazu. Heta pryblizna pałova ad taho, što da vajny Rasija pastaŭlała ŭ Jeŭropu (bolš za 200 młrd kubamietraŭ na piku).
Ciapier čytajuć
Były vykładčyk Iniaza pierajšoŭ na biełaruskuju ŭ emihracyi. Jon razvažaje pra los univiersiteta, biełarusaŭ za miažoj i adroźnieńnie nas ad palakaŭ4
Kamientary
Moža ja ničoha nie razumieju ŭ biznesie, ale najvažniejšaj častkaj etapu padrychtoŭki luboha inviestycyjnaha prajektu źjaŭlajecca biznes-płan. Asabliva kali sprava idzie ab šmatmiljardnych inviestycyjach. I tut raptam vyśviatlajecca, što hałoŭny pakaźnik - košty prodažaŭ, u hetym biznes-płanie adsutničajuć ŭvohule i buduć razhladacca niejak potym, a padmianić ich sprabujuć surahatam - abjomami prodažaŭ, jaki nijakim čynam nie dazvalaje acanić prybytkovaści inviestycyj. Miž tym viadoma, što daŭhaterminovyja košty pastavak hazu pa Siły Sibiry-1 nie dazvalać nikoli akupić vydatkaŭ navat na pabudovu hetaha hazapravoda. Faktyčna, uvieś cymies budavańnia čarhovaj Siły Sibiry ŭ tym, kab znoŭ raśpiłavać biudžetnyja hrošy (bo ŭłasnych hrošaŭ na stratnaha Hazprama vidavočna brakuje) na pabudovu, a potym addavać haz u Kitaj pa lubych koštach.