Adzin ź biełaruskich haradoŭ zastaŭsia biez aciapleńnia, bo akurat ciapier dajšli ruki da zamieny ciepłatrasy
U dvuch nasielenych punktach Minskaj vobłaści nie ŭklučyli aciapleńnie, jakoje pavinny byli pa hrafiku zapuścić 29 vieraśnia. Bieź ciapła zastalisia žychary horada Fanipal i pryharadnaj vioski Viazań. Pryčyna ŭ zamienie akurat ciapier adzinaj ciepłatrasy, jakaja idzie ad kacielni da žyłoj častki horada i vioski, piša Tochka.by.
Što pryviało da situacyi, u jakoj biełarusy zastalisia biez aciapleńnia ŭ chałady, raskazaŭ pradstaŭnik padradnaj arhanizacyi TAA «MalesBud» Vital Čyrkoŭski.
Čamu ramantujuć vosieńniu
Ciepłatrasa zamacavanaja na kanstrukcyjach piešachodnaha mosta praz čyhunku. Ciapier adnačasova prachodziać jaho rekanstrukcyja i pieraŭrezka sistemy ciepłazabieśpiačeńnia.
Ale i most, i ciepłatrasa daŭno znachodziacca ŭ avaryjnym stanie. Pieršy byŭ zakryty pa hetaj pryčynie jašče ŭ 2018 hodzie.
Ciepłatrasu, pa słovach Čyrkoŭskaha, prakłali ŭ 1981-m, a termin jaje ekspłuatacyi nie pavinien pieravyšać 30 hadoŭ. Atrymlivajecca, skončyŭsia jon prykładna ŭ 2011 hodzie.
«Truba ŭžo mieła 100%-ny znos, jana ciakła. Rana ci pozna jaje ŭsio adno daviałosia b mianiać», — adznačyŭ pradstaŭnik padradnaj arhanizacyi.
Pavodle infarmacyi partała fanipol.by, rekanstrukcyju mosta tak doŭha nie pravodzili, tamu što nie mahli vyznačyć, kamu jon naležyć. Hetaje pytańnie vyrašyli ŭ 2020 hodzie praz sud — kanstrukcyju pieradali na bałans Dziaržynskaj ŽKH. Paśla hetaha źjaviłasia pravavaja asnova dla ramontu, ale raboty pačalisia tolki praź piać hadoŭ, u 2025-m.
I rekanstrukcyju mosta, i pieraŭrezku ciepłatrasy pravodziać vosieńniu pa płanie, bo pieranieści hetyja raboty na zimu technična niemahčyma, a pačać raniej nie dazvalali ŭzhadnieńni ź Biełaruskaj čyhunkaj.
Kali daduć aciapleńnie
Pa słovach Čyrkoŭskaha, aktyŭnyja raboty na moście pačalisia ŭ žniŭni, adrazu paśla atrymańnia dazvołu ad BČ.
Choć dla rabot i zadziejničali vialikuju kolkaść śpiecyjalistaŭ, praces uskładniajecca ŭmovami. Pakolki ciepłatrasu prakładvajuć nad čyhunačnymi puciami, padradčyki pracujuć tolki ŭ karotkija technałahičnyja «vokny» — pa dźvie hadziny dniom i dźvie hadziny nočču. Akramia taho, u niepahadź pracy spyniajucca, bo z-za daždžu moža źjavicca niebiaśpiečnaja elektryčnaja duha.
Narmatyŭny termin zamieny ciepłatrasy składaje 40 kalandarnych dzion, ale padradčyki i Dziaržynskaja ŽKH imknucca paskoryć praces. Pavodle ich prahnozu pa stanie na 30 vieraśnia, aciapleńnie ŭ Fanipali i Viazani płanujuć zapuścić da 4‑5 kastryčnika, kali rabotam nie pieraškodziać umovy nadvorja.
«U Viciebsku zachodziŭ u tralejbus i kazaŭ «Słava Ukrainie!». Ukrainca ŭ 67 hadoŭ pasadzili za kamienty, napisanyja paśla hibieli chrosnaj dački pad abstrełam u Kijevie1010
Kamientary