U Litvie znajšli 10 z 25 aerastataŭ, praź jakija zakryvali aeraport Vilni. Niekalki kantrabandystaŭ zatrymanyja
Kiraŭnik Nacyjanalnaha centra kiravańnia kryzisami Vilmantas Vitkaŭskas zajaŭlaje, što znojdziena dziesiać mietearałahičnych bałonaŭ, jakija parušyli pavietranuju prastoru Litvy, a pravaachoŭniki zatrymali i padazravanych kantrabandystaŭ, paviedamlaje LRT.
«Jość (znojdzienyja bałony) krychu bolš, ciapier — dziesiać, iduć aktyŭnyja dziejańni palicyi, tyja, chto arhanizuje takija rečy, kantrabandysty — taksama iduć peŭnyja pošuki, viedaju, što jość paśpiachovyja naviny pra hetu apieracyju», — skazaŭ u paniadziełak V. Vitkaŭskas u efiry LRT Radijas
Pavodle jaho, jość zatrymanyja asoby, jakija, jak padazrajecca, jechali zabrać hruz kantrabandnych cyharet, dastaŭleny bałonami.
Pavodle kiraŭnika NCKK, padobna na toje, što ŭ noč na paniadziełak novych bałonaŭ, jakija zalacieli, zafiksavana nie było.
«Zvodnych dadzienych pakul niama dakładnych, ale pavodle pieršasnaj infarmacyi, aerastataŭ vizualna nie było zafiksavana, radary pakazvali adzin, ale heta moža być peŭnaja pamyłka», — skazaŭ V. Vitkaŭskas. «Heta była spakojnaja noč, taho nalotu, jaki byŭ učora, niama», — adznačyŭ jon.
U noč z suboty na niadzielu pavietranuju prastoru Litvy parušyli 25 mietearałahičnych bałonaŭ, zapuščanych kantrabandystami ź Biełarusi. Imi pieravozilisia cyharety.
Z 13 bałonaŭ, što dasiahnuli Vilni, dva ŭvajšli ŭ pavietranuju prastoru staličnaha aeraporta — jon byŭ začynieny z 22:16 da 4:50 ranicy. Abmiežavańni zakranuli ŭ ahulnaj składanaści kala 30 rejsaŭ i 6 tysiač pasažyraŭ.
Słužba achovy dziaržaŭnaj miažy raniej u niadzielu paviedamiła BNS, što aerastaty mahli zalacieć tak daloka ŭhłyb krainy z-za spryjalnaha vietru, a kantrabandysty pačali zapuskać ich nie z samaj miažy ź Litvoj, a krychu hłybiej z terytoryi Biełarusi: pakolki jany ŭźlatajuć pa peŭnaj trajektoryi, u drennaje nadvorje pamiežniki ŭžo nie zaŭvažajuć ich vysoka ŭ niebie.
Pavodle dadzienych słužby, uklučajučy apošnija 25 latalnych aparataŭ, sioleta zafiksavana ŭsiaho 501 kantrabandyscki bałon — u 2,2 raza bolš, čym za ŭvieś minuły hod (226).
Takimi aerastatami pieravoziacca tolki cyharety.
Kamientary