«Užo sił niama hladzieć na hetyja ceny». Biełarusy skardziacca na košt aŭtobusnych biletaŭ u Litvu
U adnym z pamiežnych čataŭ razharełasia sprečka praz ceny na aŭtobusnyja bilety ź Biełarusi ŭ Litvu. Niekatoryja źviarnuli ŭvahu, što jany vyraśli z pačatku leta, chacia pieravozčyki abiacali ich nie padymać. Im adkazali tyja, chto ličyć, što z cenami ŭsio ŭ paradku. Nie padabajecca — siadzi doma. Taksama ludzi zaklikajuć źviartacca ŭ MARH, kab viedamstva źviarnuła ŭvahu na prablemu. Ale vyśvietliłasia, što jano biaśsilnaje. BGmedia raspaviadaje pra hetuju prablemu.
Čamu biełarusaŭ nie zadavalniajuć ceny na bilety ŭ Litvu
Sprečka pamiž biełarusami razharełasia paśla publikacyi spravazdačy ab pajezdcy z Hrodna ŭ Vilniu. Biełarus paprasiŭ zrabić ceny na bilety čałaviečymi. Jon adznačyŭ, što dabracca z Hrodna ŭ Vilniu na aŭtobusie, kali kuplać bilet zahadzia, kaštuje 230 rubloŭ.
Žurnalisty BGmedia pahladzieli ceny na aŭtobusy z Hrodna ŭ Vilniu na sieradu, 29 kastryčnika, na sajtach pieravozčykaŭ i ahrehataraŭ pa prodažy biletaŭ.
Samy tanny bilet sapraŭdy kaštuje 230 rubloŭ. Jość bilety pa 256 rubloŭ, a samy darahi kaštuje 316. Na 9 kastryčnika bilety za 230 rubloŭ možna znajści tolki na «Atłasie». U inšych ahrehataraŭ i pieravozčykaŭ ceny startujuć z 256 rubloŭ.
Biełarusy źviarnuli ŭvahu, što niekatoryja pieravozčyki abiacali nie padymać ceny, ale abiacańnia nie strymali:
«Kali jeździš praź Litvu pastajanna, to ŭ tvaim infapoli šmat navin na hety kont. I ŭ adnoj ź ich bos transpartnaj kampanii na pačatku leta 2025 hoda raspaviadaŭ, što niama nijakich padstaŭ dla pavyšeńnia cen. Adnak, kali na miažy RB — RP była čarha 100+ aŭtobusaŭ, cana vyrasła na 20 rubloŭ. Kali zakryli miažu [Polščy i Biełarusi] — na 10 rubloŭ. Ale nadydzie momant, kali Hrodna pierastanie być izalavanym ad miažy, tady my ŭbačym, jak hetyja sprytnyja chłapčuki buduć katać nas za 150 rubloŭ, a kali ŭ abodva baki kvitok kupić, to možna i za 200».
«Ja kuplaŭ bilet na pačatku červienia za 180 rubloŭ, a ŭ siaredzinie vieraśnia — za 230 rubloŭ. Vidać, u hety pieryjad času ŭsie pieravozčyki adrazu adkryli IP, atrymali dazvoł i h.d.? Paciešcie nas razumnaj dumkaj na hety kont».
«Kali dziaržava abmiažoŭvaje rejsy, to heta ŭžo nie kapitalizm i svabodny rynak. Tady jana pavinna patrabavać ad pieravozčykaŭ, jakim daje dazvoły, peŭnyja ŭmovy, u tym liku i ceny. A pierasiačeńnie miažy dla aŭtobusa nie padymaje sabiekošt nastolki, kab bilety daraželi ŭ dva razy. Ja da Vilni, pa Litvie, jedu za 15 jeŭra, a potym takuju ž adlehłaść pa Biełarusi — za 65 jeŭra. Pry tym, što paliva tam u dva razy tańniejšaje».
«Ja liču canu nieabhruntavanaj, jak, darečy, vielmi mnohija. Toje, što ŭ ludziej niama vyjścia chutka pierasiekčy miažu, nie značyć, što jany pavinny mirycca z cenavym samavolstvam. Na žal, pa roznych pryčynach mnohija nie mohuć admovicca ad pajezdak praź Litvu. Ale ŭpeŭnieny: pry pieršaj ža mahčymaści 80% padarožnikaŭ piarojduć na inšyja maršruty».
«Heta takaja łohika, napeŭna, i ŭ pieravozčykaŭ. Typu, a kudy jany padzienucca, buduć płacić, kolki skažam. Pieššu — zakryta, na rovarach — zakryta, čerhi, možna padymać ceny».
Arhumienty tych, kaho zadavalniaje ciapierašniaja situacyja ź biletami ŭ Vilniu, byli roznymi. Chtości ličyć, što 200 ci 230 rubloŭ — heta niadoraha:
«A čym vam cana ŭ 200 rubloŭ nie padabajecca? Norm cana. U adroźnieńnie ad usialakich «Ekałajnsaŭ», jany nie padymali ceny padčas zakryćcia Polščy. Ci vy chočacie biaspłatna jeździć? Kali vam i heta doraha, to navošta vam Jeŭropa?»
«Nu, 230 (krychu bolš, čym 200), jakaja roźnica? Kamu heta doraha, chaj siadzić doma. Voś i ŭsio».
Niekatoryja nahadali pra kapitalizm. Maŭlaŭ, «rynak vyrašyć»:
«Uličycie prachodžańnie miažy i toje, što rejsy litoŭcy paskaračali. Voś i cana adsiul. Ci firmy pavinny ŭ stratu pracavać? Kapitalizm usie chacieli? Voś i atrymali. Čaho ciapier płačaciesia, što doraha?»
«Ceny dyktuje rynak, nie chočacie płacić 65 jeŭra — šukajcie kaho-niebudź inšaha tańniej. Ale jaho niama. Voś i ŭsio. Kapitalizm u čystym vyhladzie».
«Kali vas niešta nie zadavalniaje, jeździcie na svaim aŭto. I adrazu paličycie, u kolki vam hety kamfort abydziecca! Nu i čas pierasiačeńnia miažy pamnožcie na piać».
Niekatoryja biełarusy ličać, što ŭ pavyšeńni cen na aŭtobusnyja bilety vinavataja Litva, jakaja skaraciła kolkaść aŭtobusnych rejsaŭ Vilnia — Minsk:
«Vyvučycie pytańnie, kolki było pieravozčykaŭ u červieni i kolki stała potym, jak litoŭcy abrezali i pačali praviarać dazvoły i kvoty. Plus da ŭsiaho dadajcie jašče siudy popyt z-za tych, kaho litoŭcy vykinuli za bort. Stała mała pieravozčykaŭ, pavysiŭsia popyt, voś i cana pajšła ŭvierch krychu.
Dalej spračacca i tłumačyć, čamu takija ceny, nie baču sensu, raju pierasieści na svoj lehkavy aŭtamabil i jeździć. Ci ž adkryć IP i vazić ludziej za kapiejki, a vašyja skarhi lepš nakiroŭvajcie ŭ Vilniu, kab dazvolili, jak raniej, turystyčnym aŭtobusam jechać biez dazvołu, a taksama dadali kvoty na kolkaść prajezdaŭ tym, chto jeździć ciapier. I budzie ščaście vam, jak raniej, usie pytańni nakiroŭvajcie ŭ Vilniu.
I tak, adkryju sakret, chodziać čutki, što paśla novaha hoda litoŭcy jašče ŭ 2,5 razy źniziać kolkaść dazvołaŭ i kvot, tak što ŭ novy hod z novymi cenami.
Ź biełaruskich pieravozčykaŭ, chto raniej jeździŭ ci ž jašče zaraz jeździć u Litvu, užo praktyčna 95% nie chočuć tudy jeździć i, chutčej za ŭsio, nie buduć. Tyja, chto ciapier jašče jeździć, adkatajuć dazvoły i kvoty, potym piarojduć na Polšču, jak i ŭsie».
Biełarusy prapanujuć skardzicca ŭ MARH, ale viedamstva nie dapamoža
Padčas abmierkavańnia cen na bilety niekatoryja biełarusy prapanoŭvali źviartacca ŭ Ministerstva antymanapolnaha rehulavańnia i handlu (MARH). Na ich dumku, kali zvarotaŭ budzie dziasiatki, to viedamstva źviernie ŭvahu na hetuju prablemu:
«Hetaje pytańnie padymajecca nie ŭ pieršy raz. U RB jość takoje viedamstva MARH, u ich jość telefon, kali zvarotaŭ budzie choć by bolš za 10, jość vierahodnaść, što na heta budzie źviernuta ŭvaha. Usio ŭ našych rukach».
Im adkazali, što źviartacca ŭ MARH niama sensu:
«Užo ŭ niekim z čataŭ kidali adkaz MARH. Typu ceny na mižnarodnyja maršruty — nie ich sprava i zajmacca imi jany nie buduć».
I heta sapraŭdy tak. 23 vieraśnia ŭ MARH prajšła sustreča z pradstaŭnikami pieravozčykaŭ «Minsktrans» i «Bajertrans». Padstava — publikacyi ŭ internecie pra rost cen na bilety pa maršrucie Minsk — Vilnia i zakryćcio miažy z Polščaj.
Pieravozčyki padčas sustrečy z čynoŭnikami zapeŭnivali, što z pryčyny zakryćcia miažy Polščy ź Biełaruśsiu «taryfy pa maršrucie Minsk — Vilnia nie pavialičvalisia».
U MARH adkazali, što «pasłuhi pa pieravozcy pasažyraŭ u rehularnym mižnarodnym paviedamleńni nie padlahajuć dziaržaŭnamu cenavamu rehulavańniu».
Ciapier čytajuć
Dziadok patłumačyŭ, čamu vyzvalili mienavita tych palitviaźniaŭ, kaho vyzvalili33
Kamientary