Adziny asudžany, jaki vyrašyŭ abskardzić prysud pa spravie Pieliko, atrymaŭ bolš praciahły termin
Sud na poŭdni Francyi pavialičyŭ na hod termin turemnaha źniavoleńnia adzinamu mužčynu, jaki abskardziŭ prysud za zhvałtavańnie Žyzel Pieliko.
44‑hadovy Chusamiecin Dahan śćviardžaŭ, što jon nievinavaty, niahledziačy na šakavalny videazapis taho, jak jon zajmajecca seksam ź nieruchomaj Žyzel Pieliko, pakazany ŭ sudzie, piša Bi-bi-si.
Jak i mnohija inšyja mužčyny, asudžanyja ŭ śniežni minułaha hoda, Dohan śćviardžaŭ, što nie moža być vinavaty va zhvałtavańni Žyzel, tamu što nie viedaŭ, što muž nakačaŭ jaje narkotykami suprać voli.
Dohan adchiliŭ abvinavačvańni ŭ zhvałtavańni, choć pryznaŭ, što Žyzel stała vidavočnaj achviaraj dziejańniaŭ svajho muža.
«Ja ździejśniŭ seksualnaje dziejańnie, ja nikoha nie hvałtavaŭ, — skazaŭ jon. — Dla mianie zhvałtavańnie — heta kali kahości prymušajuć, źviazvajuć, ja nie viedaju… Ja — achviara».
Žyzel Pieliko zajaviła sudu, što jana «adzinaja achviara», admaŭlajučy, što kali-niebudź davała zhodu.
Źviarnuŭšysia da Dahana, jana skazała: «Ty nie razumieješ, što heta było zhvałtavańnie. Kali ty pryznaješ, što heta złačynstva? Mnie soramna za ciabie».
Dahan pasprabavaŭ pierakłaści vinu na Daminika Pieliko i skazaŭ, što ŭ niejki momant u jaho byli «padazreńni», što situacyja była nie zusim narmalnaj, ale Pieliko jaho supakoiŭ.
«Hety čałaviek — manipulatar», — skazaŭ Dahan.
Słuchańni ŭ Nimie faktyčna ŭjaŭlali saboj paŭtorny sudovy razhlad, ale, u adroźnieńnie ad pieršapačatkovaha pracesu ŭ śniežni minułaha hoda, hetuju spravu razhladała žury ź dzieviaci hramadzian i troch prafiesijnych sudździaŭ.
Dziaržaŭny abvinavaŭca Daminik Śje nastojvaŭ na 12‑hadovym terminie dla Dahana, bo jon «nie hatovy pryznać svaju adkaznaść» za «žachlivy akt, jaki razburyŭ asobu žančyny i pazbaviŭ jaje čałaviečaj hodnaści».
U vyniku apielacyjny sud pavialičyŭ pieršapačatkovy termin źniavoleńnia ź dzieviaci da dziesiaci hadoŭ. U śniežni minułaha hoda Dahan byŭ pryznany vinavatym u zhvałtavańni pry abciažvajučych abstavinach u ramkach pracesu, pa vynikach jakoha byli asudžany jašče 50 mužčyn.
Z 51 mužčyny (uklučajučy muža Pieliko), jakija atrymali turemny termin, 17 pieršapačatkova padali apielacyi, ale nieŭzabavie adklikali ich.
Chusamiecin Dahan staŭ adzinym, chto davioŭ svaju apielacyju da suda.
Pieliko, jaki prysutničaŭ u sudzie ŭ jakaści śviedki, admaŭlaŭ, što kali-niebudź prykidvaŭsia, byccam jaho žonka budzie ŭ śviadomaści.
Usie mužčyny, jakich jon znachodziŭ u čatach, «byli papiaredžany, što jana budzie pad dziejańniem narkotykaŭ», zajaviŭ Pieliko, dadaŭšy, što jon naŭprost skazaŭ Dahanu, što šukaje «kahości, chto źniavažyć maju śpiačuju žonku bieź jaje viedama».
Ciapier čytajuć
Nasta Bazar pastupiła na prahramu Kalinoŭskaha i choča stać sacyjałahiniaj: «Vučoba paśla 40 hadoŭ — svojeasablivy eliksir maładości»69
Kamientary