Vosiem čałaviek zatrymany ŭ Polščy pa padazreńni ŭ padrychtoŭcy dyviersij
Ahienctva ŭnutranaj biaśpieki Polščy zatrymała vosiem čałaviek, padazravanych u padrychtoŭcy dyviersij. Pra heta paviedamiŭ premjer-ministr krainy Donald Tusk.
«ABW u supracoŭnictvie ź inšymi słužbami zatrymała ŭ apošnija dni ŭ roznych častkach krainy vaśmiarych čałaviek, padazravanych u padrychtoŭcy dyviersij. Sprava raźvivajecca. Pravodziacca dalejšyja apieratyŭnyja mierapryjemstvy», — napisaŭ Tusk u sietcy X.
Ministr-kaardynatar śpiecsłužbaŭ Tomaš Siemoniak dapoŭniŭ polskaha premjera. Pavodle jaho słoŭ, havorka idzie pra raźviedku vajennych abjektaŭ i abjektaŭ krytyčnaj infrastruktury, padrychtoŭku srodkaŭ dla praviadzieńnia dyviersij i ich niepasrednuju realizacyju, piša Reform.news
«Ahienctva ŭnutranaj biaśpieki ciesna supracoŭničaje sa Słužbaj vajennaj kontrraźviedki, palicyjaj i prakuraturaj», — dadaŭ jon.
Ministr unutranych spraŭ i administracyi Polščy Marcin Kierviński ŭ efiry Radio Zet taksama paviedamiŭ, što havorka idzie pra dyviersii i zbor infarmacyi pra krytyčnuju infrastrukturu.
«My nazirajem heta ŭžo niekalki miesiacaŭ. Nazirajecca pavyšanaja cikavaść da takoha typu infrastruktury. Nu, jak ja ŭžo kazaŭ, śpiecsłužby tut vielmi, vielmi aktyŭnyja. Pieravažnaja bolšaść takich sprob spyniajecca na rańniaj stadyi», — adznačyŭ jon.
Pavodle jaho słoŭ, u bolšaści vypadkaŭ za takimi dziejańniami stajać rasijskija śpiecsłužby. Kierviński ličyć, što RF uvajšła ŭ stadyju «chałodnaj vajny» ź Jeŭrasajuzam, na što pakazvajuć zdareńni ź bieśpiłotnikami.
«Vidavočna, što Rasija pastajanna pravodzić pravierki, pastajanna sočyć za reakcyjaj dziaržaŭ-členaŭ. I my znachodzimsia na pieradavoj», — skazaŭ jon.
Kamientary