Toj samy Laškievič: vystava viadomaha biazdomnaha mastaka adkryłasia ŭ Homieli
Bolš za 30 rabot biazdomnaha mastaka Valeryja Laškieviča možna ŭbačyć u hetyja dni ŭ Karcinnaj halerei Vaščanki ŭ Homieli. Žurnalisty «Biełki» schadzili na vystavu i daviedalisia, čamu jon źnik z haradskich vulic.
Jaho viedaje, badaj, kožny žychar Homiela. Amal tryccać hadoŭ Valeryja Laškieviča možna było sustreć u luboje nadvorje na Kijeŭskim spusku abo ŭ pačatku vulicy Savieckaj. Jon nie prosta pradavaŭ svaje karciny, a pa ŭłasnym pryznańni — vykonvaŭ važnuju misiju — dałučaŭ minakoŭ da mastactva.
Na vulicach horada Valeryj Laškievič źjaviŭsia ŭ 1996 hodzie, kali viarnuŭsia siudy z Sankt-Pieciarburha. U rodnaj vioscy Čarapoŭcy pad Homielem jaho ŭžo nichto nie čakaŭ. Baćki pamierli, a ŭ chacie žyŭ jaho brat ź siamjoj. Tady mastak prosta pasialiŭsia na vulicy: kali načavaŭ na čyhunačnym vakzale, kali spaŭ na łaŭkach.
Uvieś hety čas vuličny fiłosaf nie pierastavaŭ malavać svaje niezvyčajnyja karciny, dzie mudrahielista pieraplatajucca siužety. I pastupova staŭ simvałam horada.
Valeryja Laškieviča zaŭvažyli i acanili. U 2014 hodzie ŭ Nacyjanalnym mastackim muziei adkryłasia vystava biazdomnaha mastaka. Tady ž telekanał ANT źniaŭ pra jaho dakumientalny film «Skryžavańnie», jaki zavajavaŭ mižnarodnyja ŭznaharody. U im pakazana, jak talent moža iści nasupierak zvykłym normam i zaviadzionkam.
Pra siabie Valeryj raskazvaje, što jon skončyŭ Branskaje mastackaje vučylišča i źjechaŭ skarać paŭnočnuju stalicu Rasii. U Sankt-Pieciarburhu mastak niekalki razoŭ sprabavaŭ pastupać u Akademiju mastactvaŭ imia Illi Repina, ale nie pastupiŭ. Tady jon uładkavaŭsia ŭ akademiju dvornikam i niejki čas žyŭ pry joj u padsobcy. Kali heta stała niemahčymym, pryniaŭ rašeńnie viarnucca na radzimu.
Valeryju sprabavali dapamahčy z žyllom ułady i nieabyjakavyja ludzi. Nacyjanalny mastacki muziej vykupiŭ niekalki jaho rabot. Ale jon usio roŭna viartaŭsia na vulicu.
7 studzienia mastaku spoŭniłasia 76 hadoŭ. Zaraz Valeryj žyvie na zdymnaj kvatery, jamu dapamahajuć maładaja homielskaja mastačka Anastasija Tałstaja z mužam i prychilniki jaho tvorčaści. U Valeryja navat źjaviŭsia ŭłasny akaŭnt u instahramie, dzie možna sačyć za jahonym žyćciom i tvorčaściu.
Na vystavu ŭ Karcinnuju halereju Vaščanki pryjšło šmat nieabyjakavych hamielčukoŭ, jakija sustrakali mastaka na haradskich vulicach i zastalisia pad uražańniem ad jaho asoby i tvorčaści. Praŭda, sam mastak prysutničać na adkryćci nie zmoh — padviało zdaroŭje.
«U Valeryja prablemy z nahami i z sercam. U śniežni, kali my rychtavali vystavu da adkryćcia, jon trapiŭ u balnicu i byŭ u ciažkim stanie. Dziakuj bohu, usio abyšłosia», — adkazała na pytańnie prychilnikaŭ tvorčaści mastaka Anastasija Tałstaja.
Z-za taho, što ŭ Valeryja Laškieviča niama biełaruskaha hramadzianstva, jamu davodzicca apłačvać vialikija rachunki za lačeńnie.
Mastak pa-raniejšamu maluje i pradaje svaje karciny. Ciapier jon lepš uładkavany ŭ pobytavym płanie.
Ubačyć vystavu «Toj samy Laškievič» možna pa adrasie: vuł. Karpoviča, 4. Darečy, niekatoryja karciny možna budzie paźniej vykupić.
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary