Siońnia adznačajecca Mižnarodny dzień abarony žyvioł

Zakon ab abaronie pravoŭ žyvioł u Biełarusi dahetul nie pryniaty. Zakonaprajekt byŭ raspracavany ŭžo daŭno i niekalki razoŭ razhladaŭsia parłamientam.

Pradstaŭniki arhanizacyj, jakija zajmajucca abaronaj žyvioł, ličać, što hety dakumient nie adpaviadaje mižnarodnym standartam.

Jak zajaviła ŭ intervju BiełaPAN staršynia hramadskaha abjadnańnia abarony žyvioł «Ehida» Natalla Bialanava, u hetym zakonie pavinien być dakładna prapisany miechanizm stvareńnia prytułkaŭ praciahłaha i pažyćciovaha ŭtrymańnia žyvioł, a taksama praduhledžana raspracoŭka dziaržprahramy pa ich sterylizacyi.

Nieabchodna vyznačyć praviły pracy dzriažpradpryjemstvaŭ pa časovym utrymańni biazdomnych sabak i katoŭ, paradak adłovu žyvioł i pracesu eŭtanazii.

Aprača taho, zakon pavinien vyznačyć miechanizm raźmierkavańnia hrošaj, što iduć ad padatku na ŭtrymańnie svojskich žyvioł.

Pavodle słoŭ Bialanavaj, usiaho hetaha ŭ adchilenym prajekcie zakona nie było i kali b jon byŭ pryniaty, to moh by naškodzić žyviołam.

Razam z tym členy arhanizacyj, jakija zajmajucca abaronaj žyvioł, upeŭnieny: zakon ab abaronie žyvioł u Biełarusi nieabchodny. Tolki pavodle aficyjnych źviestak Ministerstva žyllova-kamunalnaj haspadarki, u 2009 hodzie ŭ Biełarusi było adłoŭlena kala 80 tysiač biazdomnych sabak i katoŭ, ź ich kala 10 tysiač — u Minsku. Bolšaść hetych žyvioł byli zabity.

Pradstaŭniki arhanizacyj, jakija zajmajucca abaronaj žyvioł, źviartajuć uvahu na prablemu niehumannaha adłovu, utrymańnia i zabivańnia žyvioł u krainie. Tak, pavodle słoŭ Bialanavaj, u nievialikich nasielenych punktach badziažnych sabak i katoŭ adstrelvajuć prosta na vačach u ludziej.

Jak paviedamiŭ staršynia kamisii pa prablemach čarnobylskaj katastrofy, ekałohii i pryrodakarystańnia parłamienta Siarhiej Kanoplič, zaraz viadziecca padrychtoŭka inicyjatyŭnaj hrupy dla raspracoŭki novaha zakonaprajekta ab abaronie žyvioł.

Dakumient praduhledžvajecca ŭnieści ŭ płan zakonaprajektnaj dziejnaści na 2011 hod. Deputaty, zapeŭniŭ Kanoplič, nie suprać, kab u stvareńni zakona «maksimalna brali ŭdzieł ŭsie zacikaŭlenyja». «Zakon pavinien maksimalna ŭličvać zapyty hramadzian i sapraŭdy vyrašać prablemu abarony žyvioł», — padkreśliŭ parłamientaryj.

Pavodle jaho słoŭ, raspracoŭščyki zakona majuć namier vykarystać vopyt krain SND i ES.

• 0
• 0
• 0
• 0
• 0
• 0
• 0
• 0