Pierachodzim na ptušku

Urad Biełarusi zaćvierdziŭ prahramu raźvićcia ptuškahadoŭli ŭ Biełarusi na 2011–2015 hady. Adpaviednaje rašeńnie pryniata pastanovaj Savieta ministraŭ № 1395 ad 28 vieraśnia 2010 hoda.

Jak paviedamiła pres-słužba ŭrada, na realizacyju mierapryjemstvaŭ prahramy płanujecca nakiravać bolš za 4,2 trłn. rubloŭ. Pry hetym z respublikanskaha biudžetu praduhledžana vydzielić 72,6 młrd. rubloŭ, kredyty bankaŭ składuć bolš za 3,5 trłn., srodki sielhasarhanizacyj — 630,8 młrd. rubloŭ.

Praduhledžvajecca pakryćcio arhanizacyjam častki pracentaŭ za karystańnie bankaŭskimi kredytami za košt srodkaŭ respublikanskaha biudžetu i nakiravańnia na hetyja mety 95,1 młrd. rubloŭ. Termin akupnaści prahramy raźličany na piać hadoŭ.

Finansavańnie raschodaŭ na realizacyju prahramy budzie razhladacca ŭradam pry farmiravańni respublikanskaha biudžetu na čarhovy finansavy hod z udakładnieńniem finansavych układańniaŭ na padstavie prajektna-kaštarysnaj dakumientacyi, indeksaŭ źmianieńnia cen i taryfaŭ.

Va ŭradzie ličać, što realizacyja prahramy dazvolić poŭnaściu vyklučyć impart u respubliku plemiannoha maładniaka ptuški baćkoŭskich form, miasnoj i jaječnaj ptuški, kuraniat-brojleraŭ i finalnych form jaječnaj ptuški, a taksama zadavolić patreby nasielnictva i fiermierskich haspadarak u maładniaku miasnych i jaječnych kur, indykoŭ, kačak, husiej. Ukaranieńnie ajčynnych krosaŭ ptuški dazvolić źnizić raschody na impart plemiannoj pradukcyi na sumu 21,5 młrd. rubloŭ.

Pastaŭka jajek na ekspart pavialičycca da 0,7 młrd. štuk u hod, što na 40% bolš u paraŭnańni z 2009 hodam, miasa ptuški — da 100 tys. t u hod, ci ŭ piać razoŭ.

Čakajecca, što za pieryjad realizacyi prahramy budzie vyrablena miasa i jajek ptuški na sumu 15,1 trłn. rubloŭ. Vyručka pavialičycca ŭ 2,4 razu ŭ miasnoj ptuškahadoŭli i ŭ 1,9 razu — u jaječnaj. Prybytak składzie 2,9 trłn. rubloŭ, u tym liku 2,4 trłn. — u miasnoj ptuškahadoŭli i 489 młrd. — u jaječnaj. Budzie zabiaśpiečana prybytkovaje viadzieńnie miasnoj ptuškahadoŭli z rentabielnaściu ŭ 2011–2015 hadach 26,6%, u 2015 hodzie — nie mienš jak 40%, a ŭ jaječnaj ptuškahadoŭli — adpaviedna 15,2% i 20%. Rentabielnaść uzraście na 10,1 pracentnaha punkta ŭ miasnoj ptuškahadoŭli i na 9,9 — u jaječnaj. Ekspartnaja vyručka ŭ nastupnaj piacihodcy za košt prodažu miasa ptuški składzie 670 młn. dołaraŭ, pa jajku — 209,3 młn., što adpaviedna ŭ piać i ŭ paŭtara raza bolš, čym u 2006–2010 hadach.

Maryna Nosava, BiełaPAN.

• 0
• 0
• 0
• 0
• 0
• 0
• 0
• 0