Karatkieviča ekranizujuć dvojčy

Na «Biełaruśfilmie» rychtujucca ekranizavać adrazu dva ramany piśmieńnika.

Stužka «Kałasy pad siarpom tvaim» stanie sumiesnym biełaruska-polskim prajektam, a «Čorny zamak Alšanski» biełarusy zdymuć samastojna.

Ab namierach źniać film pa «Kałasach pad siarpom tvaim» na ajčynnaj kinastudyi paviedamili jašče ŭ lutym. Nazvali i imiony režysiora i scenarysta. Imi stali adpaviedna Mikałaj Pinihin i Alaksandr Kačan. Ale praź niejki čas Pinihin, spasłaŭšysia na zaniataść, ad pracy admoviŭsia. Zamieny jamu nie znajšli. Ale ciapier na «Biełaruśfilmie» paviedamili, što

zdymać film usio-tki budzie Mikałaj Pinihin.

I režysior užo razhladaje mahčymyja varyjanty dla pracy ŭ svaim hrafiku. Moža źjavicca taksama i sarežysior.

Scenaryj filma ciapier znachodzicca na abmierkavańni. Pa im jašče nie vykazalisia polskija kinošniki. Nie vyklučana, što scenaryj pryjdziecca dapracoŭvać. U jaho pieršapačatkovym varyjancie hieroi pieravažna razmaŭlajuć pa-biełarusku. Vykarystoŭvajecca taksama rasijskaja, polskaja, francuzskaja movy.

Sumiesnaja praca nad filmam pa tvory Karatkieviča ŭ palakaŭ i biełarusaŭ užo była.

Heta rasijskamoŭnaja karciny «Sivaja lehienda», jakuju ŭ 1991 hodzie źniaŭ polski režysior Bahdan Paremba. U Biełarusi pra film mała chto viedaje, a hladzieła jaho jašče mienš ludziej. Z-za adsutnaści prakatnaj licenzii na film jaho nie mohuć pakazvać u kinateatrach krainy. Chacia ŭ internecie stužku možna spampavać bieź ciažkaściaŭ. Źnialisia ŭ «Sivoj lehiendzie» Ivar Kałnyńš, Hienadź Harbuk, Alaksandr Biaspały. Scenaryj pa adnajmiennaj apovieści napisali Siarhiej Bułyha i Uładzimir Maćviejeŭ.

Što tyčycca «Čornaha zamka Alšanskaha», to ŭ pravaŭładalnicy, plamieńnicy piśmieńnika Aleny Sinkievič kinastudyja vykupiła pravy na ekranizacyju ramana na try hady. Značycca film źjavicca nie paźniej za 2013. Ale jašče nie vyznačana, chto budzie pisać scenaryj. Letaś ab namiery źniać film pa hetym tvory vykazvaŭsia staršynia TRA Sajuznaj dziaržavy Ihar Uholnik. Jon navat paviedamlaŭ pra hatovy scenaryj. Ale ŭžo sioleta ŭ pres-słužbie Uholnika ničoha peŭnaha ab prajekcie skazać nie zmahli.

«Čorny zamak Alšanski» ekranizavaŭsia ŭ saviecki čas Michaiłam Ptašukom. Dvuchsieryjnaja rasijskamoŭnaja karcina vyjšła ŭ 1983 hodzie. Scenaryj napisaŭ sam Uładzimir Karatkievič.

Jakija jašče tvory piśmieńnika ekranizavalisia.

«Chrystos pryziamliŭsia ŭ Harodni» źniaty ŭ 1967 hodzie. Ale cenzary nie puścili film na ekrany. Vyjšaŭ jon tolki ŭ 1989. Režysiory — Uładzimir Byčkoŭ i Siarhiej Skvarcoŭ. Mova — rasijskaja, biełaruskaja.

Karotkamietražny film «Čyrvony ahat» (23 chviliny) vyjšaŭ u 1973 hodzie pa-rasijsku. Režysior — Alaksandr Połahaŭ, scenaryj Uładzimira Karatkieviča.

U 1979 hodzie Valeryj Rubinčyk skončyŭ pracu nad «Dzikim palavańniem karala Stacha». Scenaryj da rasijskamoŭnaj stužki stvaryli Karatkievič i Rubinčyk.

Teleśpiektakl «Liście kaštanaŭ» pavodle adnajmiennaj apovieści pastavili na telebačańni na biełaruskaj movie ŭ 1981 hodzie. Režysior Uładzimir Zabieła.

Paŭhadzinnaja stužka «Parom» pa apaviadańni «Parom pa burnaj race», vyjšła ŭ 1988 hodzie pa-biełarusku. Režysior — S. Ščyhłoŭ.

Sumiesny saviecka-čechasłavacki film «Maci ŭrahanu» źniali ŭ 1990 hodzie pa adnajmiennaj pjesie. Režysior — Juryj Maruchin, scenaryst — Uładzimir Hałavanaŭ. Mova — biełaruskaja.

• 0
• 0
• 0
• 0
• 0
• 0
• 0
• 0