Aŭtar značka «Za Svabodu» raskryvaje svajo imia

Znački «Za Svabodu» stali absalutna papularnymi. Adnak da apošniaha času aŭtar brendu «Za Svabodu» zastavaŭsia nieviadomym. Pryjšoŭ čas raskryć imia. Karespandent «Našaj Nivy» hutaryć z kiraŭnikom hrupy, jakaja raspracoŭvała hety brend — mastactvaznaŭcam Vacłavam Areškam.

Praca cełaha kalektyvu

«Naša Niva»: Jak uźnikła ideja stvareńnia brendu «Za Svabodu»?

Vacłaŭ Areška: Brendmejkinham my zajmajemsia vielmi daŭno. Ja kažu «my», bo heta nie samotnaja praca, taksama heta praca mastakoŭ, sacyjolahaŭ. Pakul ja nie mahu nazyvać proźviščy tych, z kim ja pracavaŭ, ale kali‑niebudź heta budzie viadoma. Heta praca cełaha kalektyvu. Pieršym brendam, jaki byŭ stvorany pad maim kiraŭnictvam, byŭ brend kampanii «Vybiraj» u 2001 hodzie. Paśla byli «Piaciorka+», kampanija «Zrobim lepš», lahatyp Kanhresu, siońniašni značok Partyi BNF. Ale adčuvałasia, što patrebnyja novyja kroki. My praviali daśledavańni i vyrašyli, što, kab u hramadztvie byli pieramieny, treba pracavać ź mienšaściu, jakaja ŭ nas užo jość, zamacavać jaje. Heta tyja, chto nia ŭdzielničaje ŭ vuličnych akcyjach, nie źjaŭlajecca siabrami partyjaŭ, ale prychilny da nas. Treba, kab na hetych ludziej niešta padziejničała. Raniej my išli da ludziej, jak było ź «Piaciorkaj+», z tymi samymi lozunhami, što i Łukašenka. Ułady taksama nia śpiać u spravie z brendami, toj ža lozunh «Za Biełaruś!» čaho varty.

Z dapamohaj sacyjolahaŭ my praviali daśledavańnie, kab daviedacca, što dla ludziej najvažniejšaje. Pradstaŭlali peŭny śpis: svaboda, praŭda, spraviadlivaść, niezaležnaść, stabilnaść. I praktyčna va ŭsich apytańniach pieramahała svaboda. Tak i źjavilisia pieršyja lahatypy brendu «Za Svabodu».

«Abjadnała svaboda»

«NN»: Ale čamu mienavita svaboda nabyła takuju papularnaść u hramadztvie?

VA: Heta lozunh absalutna nieprymalny da Łukašenki. Jon moža być za Biełaruś, za niezaležnaść, za praŭdu, ale ni ŭ jakim razie nie za svabodu. Paśla my prapanavali hety brend u štab adzinaha kandydata. Pa našaj schiemie hety lozunh adrazu vyłučaŭ Milinkieviča siarod inšych kandydataŭ. Kožny ŭ svabodzie znachodzić niešta svajo: dla pradprymalnikaŭ svaboda — heta prava na ŭłasnaść, dla studenta — mahčymaść vučycca za miažoj, dla rabočych — svaboda ad kantraktaŭ. Adnak naša schiema nie była vykarystana padčas kampanii. Kolki my nia bilisia, što patrebny lozunh z adnym słovam, pieravaha była addadziena «Svabodzie. Praŭdzie. Spraviadlivaści». Adnak brend «Za Svabodu» pryžyŭsia. Raspaŭsiudžvańnie brendu «Za Svabodu» było jak virus. Paźniejšyja padziei dakazali, što my nie pamylilisia z brendam.

«NN»: Vy ličycie źjaŭleńnie brendu «Za Svabodu» najbolš paśpiachovym prajektam demakrataŭ za hety hod?

VA: Vyjšła tak, što Abjadnanyja demakratyčnyja siły pryniali hety brend, jaho pryniaŭ ź nievialikim spaźnieńniem Milinkievič. Z tymi ž «zubrami» damaŭlalisia, što my budziem padtrymlivać ich akcyi «16», «Dzień salidarnaści», a jany — «Za Svabodu». Urešcie, «zubry» pryznali, što heta naš supolny brend, jaki abjadnoŭvaje ŭsich prychilnikaŭ pieramienaŭ. Užo ładzilisia cełyja kancerty «Za Svabodu». Žyćcio paćviardžaje, što hety lozunh budzie aktualny da toj pary, pakul my nie zdabudziem tuju svabodu.

«NN»: Čamu Vaša imia jak aŭtara hetaha prajektu raniej nie hučała?

VA: Na heta jość ceły šerah pryčynaŭ. Najpierš tamu, što heta praca cełaha kalektyvu, a nie adnaho mianie, ja prosta byŭ kiraŭnikom analityčnaj hrupy. Pa‑druhoje, kali nia vielmi afišuješ svaju dziejnaść, spakajniej žyvieš. Jašče ja nie lublu być publičnym čałaviekam. Adnak ciapier vyrašyŭ, što hodzie chavacca.

«NN»: Što adčuvajecie Vy jak aŭtar, kali bačycie na vulicach ludziej sa značkami «Za Svabodu»?

VA: Mnie vielmi pryjemna. Ja baču, što heta najbolš udały symbal demsiłaŭ za apošnija hady, bo raniejšyja znački nie karystalisia takoj papularnaściu.

«My staim na parozie pieramienaŭ»

«NN»: Što pravilna, a što niapravilna rabiła ŭ hetym hodzie apazycyja?

VA: Pravilnym było ŭsio toje, što nia rušyła abjadnańnia, što išło da abjadnańnia. Bo zaraz najvažniejšym źjaŭlajecca mienavita naša adzinstva, niezaležna ad pohladaŭ. Samaja važnaja padzieja hodu — heta Viasna. Tut jość niekalki mierkavańniaŭ, ja nieadnarazova spračaŭsia ŭ hetym pytańni z Uładzimieram Mackievičam, jaki ličyć, što ŭ hramadztvie tady nie adbyłosia značnych źmienaŭ. Ja ž liču, što adbylisia jakasnyja źmieny ŭnutry hramadztva. Ludzi stali bolš hatovymi da pieramienaŭ i da ŭdziełu ŭ ich. My zrabili krok napierad, jaki nie rabili apošnija hady.

«NN»: Dumajecie, ludzi buduć znoŭ i znoŭ vychodzić na vulicu?

VA: Dla hetaha patrebny mocny źniešni faktar kštałtu vybaraŭ. Ludzi vyjduć na vulicy, kali ŭźniknie pahroza niezaležnaści Biełarusi. Biez takoha čyńnika vyvieści ludziej na vulicu budzie niemahčyma. Viasnoj my byli za paru krokaŭ ad pieramohi. Ja adčuvaju, što my staim na parozie niejkich pieramienaŭ, jakich dakładna, ja nia viedaju, ale ŭpeŭnieny, što jany buduć. Naša asnoŭnaja zadača ciapier — nie ŭpuścić mahčymy šaniec, nie akazacca ŭ marhinezie.

«Lidera musić vybrać vulica»

«NN»: Ci musić Milinkievič zastavacca lideram apazycyi?

VA: Sytuacyja ź liderstvam zaležyć ad samoha lidera. Uviesnu Milinkievič pakazaŭ, što mieŭ vialikija šancy stać ahulnanacyjalnym, a nia vybarnym lideram, ale Milinkievič nie skarystaŭ jaho. Ciapier ja liču, što jahony šaniec najchutčej stračany. Chacia Milinkievič zastajecca vielmi značnym aŭtarytetam, asabliva na Zachadzie.

«NN»: Dyk z kim my vyjdziem nastupnym razam na Płošču?

VA: Kali pačniecca novaja bojka, to pytańnie liderstva moža vyrašycca samo pa sabie i niečakana. Možna vybrać dziesiać lideraŭ, ale nivodzin nia stanie pravadyrom. Siońnia vuličny lider nie pavinien być abrany, jaho musić naradzić vulica. U Milinkieviča byŭ momant, kali jon išoŭ pa Płoščy padčas mitynhu, i ludzi razam kryčali: «Milinkievič!» Takoha nie było pry Hančaryku. Treba realna pryznać, što viasnoj nichto nie rychtavaŭ źmienaŭ u krainie, ale kali na vulicy akazałasia 20 — 30 tysiačaŭ čałaviek, to nivodzin z bakoŭ nia viedaŭ, što rabić u hetaj sytuacyi. Milinkievič nia viedaŭ u tym liku. Ciapier nam patrebnaja raspracavanaja stratehija, taktyka, kab viedać, što i jak rabić. U takim vypadku šancaŭ na pieramohu budzie bolej.

«Režym budzie chistacca»

«NN»: Vykazvajuć mierkavańnie, što apazycyi vyhadna žyć na hranty, i jana nia choča źmienaŭ u krainie. Što Vy možacie na heta skazać?

VA: Pryznajusia, što takija ludzi sapraŭdy isnujuć. Asabliva siarod lideraŭ apazycyi druhoha źviana. Navat siarod apazycyi jość ludzi, jakija bajacca pieramienaŭ, ale takich mienšaść, ja b navat skazaŭ, što vielmi niaznačny adsotak. Ja pierakanany, što takich ludziej uvohule niama siarod moładzi i siarod tych, chto chodzić na akcyi.

«NN»: Što musić u nastupnym hodzie rabić apazycyja, kab pieramahčy?

VA: Režym budzie chistacca. A my musim cisnuć na ŭładu, torhać jaje ŭvieś čas, tolki ŭ takim vypadku budziem mieć šancy na pieramohu. A taksama praciahvać dalejšaje abjadnańnie. Što datyčycca pytańnia stratehii i taktyki, dumaju, jano budzie pryniataje na chutkim užo Kanhresie.

«NN»: Jakuju asobu i padzieju 2006 hodu adznačyli b asabista Vy?

VA: Viadoma, Milinkieviča. Heta była absalutna novaja fihura ŭ palityčnym poli Biełarusi, jakaja zrabiła šmat. Jon zasłuhoŭvaje zvańnia čałavieka hodu. Što da padziei, to heta adnaznačna padziei 19 — 25 sakavika, bo heta było niešta absalutna novaje ŭ biełaruskaj historyi.

❏

Vacłaŭ Areška naradziŭsia ŭ 1955 h. u Rasiei. Dziacinstva prajšło pamiž horadam Śviardłoŭskam, dzie pracavaŭ baćka, i vioskaju Žarabkovičy ŭ Zachodniaj Biełarusi, dzie žyŭ dzied. Hetyja histaryčnyja miaściny vyznačyli dalejšuju daśledčuju dziejnaść — teatraznaŭstva, historyja kultury j mastactva Biełarusi. Navukovyja intaresy: teatralnaje baroka, šlachieckaja kultura. Pierakładčyk z polskaj movy.

• 0
• 0
• 0
• 0
• 0
• 0
• 0
• 0