Tavaryš Ziuhanaŭ moža być spakojny
Siniavokaja nie pradałasia praklatym buržuinam. Kamentuje ŭ svaim błohu Alaksandar Kłaskoŭski.
Miensk naviedaŭ tavaryš Ziuhanaŭ. Lider KPRF stvaraje idealny fon dla pijaru, zaklikanaha davieści svajmu i rasiejskamu "ćviordamu" elektaratu, što pra niejkija ŭcioki Łukašenki na Zachad mohuć plavuzhać tolki vorahi.
Naturalna, prahučała bahata rytoryki na temu "My zaŭždy byli i budziem razam z rasiejskim narodam" (darujcie, historyki!).
I ŭsio ž praz hetyja napłastavańni ražnom vytyrknułasia teza-chit apošniaha času: my nadta doŭha lacieli na adnym kryle!
Hetaja metafara symbalizuje novuju liniju pavodzinaŭ aficyjnaha Miensku na mižnarodnaj arenie. Vyrašana balansavać miž Maskvoj i Zachadam.
Tut jość svoj raźlik. Kolki b Pucin ni brataŭsia z Bušami-Błerami, zachodnija palityki ŭsio adno buduć kasavurycca na vialikuju eŭrazijskuju krainu ź vielmi kiravanaj demakratyjaj dy enerhietyčnym dručkom. Miž Rasiejaj i Bruselami-Vašynhtonami jašče doŭha, kali nie zaŭždy, budzie isnavać niedavier, buduć tleć supiarečnaści.
Voś na ich možna i hulać.
Analityk Valer Karbalevič nahadvaje, što padobnuju hieapalityčnuju madel skarystoŭvali ŭ epochu chałodnaje vajny Juhasłavija dy Rumynija.
Ale ž ciapier, dziakuj bohu, trochi inšaja epocha. Dy i hulnia nia nadta chitraja.
Pa-pieršaje, haspadar sustrečy znoŭ nie ŭtrymaŭsia ad kamianioŭ ŭ kramloŭski harod. A tam i tak zakusili hubu.
Pa-druhoje, i ŭ Bruselach-Strasburach nia łykam šytyja.
"U Eŭropie razumiejuć, što adzin i toj samy tavar Miensk choča pradać adnačasna dvum pakupnikam, — zaznačaje Karbalevič. — Zachadu jon žadaje zbyć pa vyhadnaj canie svoj kanflikt z Rasiejaj, a Maskvie — svoj, tak by mović, raman z Eŭraźviazam".
Raman, viadoma, vielmi ŭmoŭny. Bo ajčynnaje kiraŭnictva naadrez admaŭlajecca dapuskać demakratyzacyju chacia b u hameapatyčnych dozach.
"Ja dobra viedaju, jak mianie ŭsprymajuć na Zachadzie i čaho Zachad ad nas choča", — paviedamiŭ haspadar surazmoŭcu-kamunistu. I zapeŭniŭ: "Ja ni z kim nie flirtuju. Ja prosta prapanuju: davajcie vy hetuju kamiennuju ścianu razburajcie...".
Kaniešnie, tavaryš Ziuhanaŭ moža być spakojny: siniavokaja respublika nie pradałasia praklatym buržuinam.
Inšaja reč, što ŭźnikajuć vialikija pytańni datyčna lotnych jakaściaŭ staroj biełaruskaj madeli z paśpiešliva prykručanym druhim kryłom.
Ciapier čytajuć
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»10
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary