Źmicier Bandarenka: «Biełaruś moža stać prykładam chryścijanskaha prymireńnia»

— Źmicier, Vy vyjšli na volu, adsiedzieŭšy hod i čatyry miesiacy. Naturalna, radaść, ščaście. A tut: «Dźvie hadziny — i jany ŭ kałonii». Jakija pačućci nachłynuli?

— Liču, što treba vielmi surjozna stavicca da słovaŭ Alaksandra Ryhoraviča, bo ŭ našaj krainie ŭsio vyrašaje adzin čałaviek, i, sapraŭdy, u luby momant my možam apynucca za kratami. Taksama razumieju, što ŭ mianie zusim vypadkova moža zdarycca infarkt, insult ci absalutna vypadkova mahu trapić pad mašynu.

— My viedajem, što ŭ turmie vy stracili zdaroŭje i mahli naohuł pazbavicca mahčymaści chadzić. Ciapier Łukašenka pryznaŭsia, što viedaŭ pra heta.

— Mahu vitać toje, što my byli vyzvalenyja. I toje, što ja byŭ vyzvaleny ŭ dzień vialikaha chryścijanskaha śviata — pravasłaŭnaha Vialikadnia. Što tyčycca zdaroŭja. Mnie rabili apieracyju na padstavie vynikaŭ tamahrafii chrybietnika (MRT). Była vyjaŭlena mižchrybietnikavaja hryža, jakaja zaciskała kareńčyk śpinna-mazhavoha nierva i z pryčyny jakoj u mianie była častkova paralizavanaja pravaja naha. Ja taksama adčuvaŭ mocnyja boli ŭ inšaj nazie. U lipieni była praviedzienaja apieracyja pa vydaleńni kiły i dekampresii nierva. Apieracyja prajšła paśpiachova: była stanoŭčaja dynamika… U žniŭni ja mieŭ prava na vyzvaleńnie ŭ suviazi z zamienaj režymu ŭtrymańnia, ale, tym nie mienš, byŭ adpraŭleny ŭ kałoniju. Vyzvaleńnia pa zamienie nie adbyłosia, taksama jak nie adbyłosia ŭmoŭna-daterminovaje vyzvaleńnie, na jakoje ja mieŭ prava ŭ śniežni. U krasaviku ŭ Mahiloŭskaj abłasnoj balnicy była zroblena paŭtornaja mahnitna-rezanansnaja tamahrafija, jakaja vyjaviła, što na siońniašni dzień u pajaśničnym adździele ŭ mianie ŭžo 4 mižchrybietnikavyja kiły, dźvie ź jakich zaciskajuć kareńčyki niervaŭ. Mnie adrazu skazali, što patrebna paŭtornaja apieracyja, a, moža być, navat nie adna. Dumaju, što, kali b nie było hetych dadzienych MRT, to mianie b, napeŭna, nie vyzvalili.

— Čym spravakavanaja takaja rezkaja reakcyja ŭ Łukašenki?

— Hałoŭnaje, što ja pačuŭ siońnia ŭ prahramie «Kontury»: «Jašče adzin cisk, i jany znoŭ viernucca ŭ kałoniju». Dumaju, što takaja ​​zajava, u pieršuju čarhu, źviazana ź dziejańniami Jeŭrasajuza.

— Łukašenka kaža pra niejkuju amnistyi letam hetaha hoda. Heta namiok, što inšych vyzvalać tady?

— Viedajecie, ja ad usioj dušy vitaju takuju ​​zajavu, bo amnistyja — heta toje, što źniavolenyja Biełarusi, dyj luboj inšaj krainy, zaŭsiody čakajuć ź nieciarpieńniem. Na pačatku hetaha hoda było niekalki zajavaŭ kiraŭnikoŭ prakuratury i Departamienta vykanańnia pakarańniaŭ ab tym, što sioleta amnistyja nie płanujecca. I ciapier jasna, što jana adbudziecca i heta vydatna.

A palitviaźni vinnyja być vyzvalenymi ŭ Vielikodny pieryjad.

— Niekatoryja ličać, što adpuścić Łukašenka palitviaźniaŭ i nastupić niejkaja «libieralizacyja», choć na hod-dva. Vy vierycie, što Łukašenka moža choć na čas asłabić lejcy da nastupnych, naprykład, prezidenckich vybaraŭ?

— Łukašenka padkreśliŭ svaju prychilnaść dadzienym abiacańniam. Znachodziačysia jašče na Vaładarskaha ŭ žniŭni, ja ŭ radyjokropcy pačuŭ zajavu Alaksandra Ryhoraviča, što jon hatovy ŭ samy bližejšy čas pačać pramyja pieramovy z apazicyjaj. Ciapier Arhanizacyja Abjadnanych Nacyj zaklikaje biełaruskija ŭłady nieadkładna vyzvalić usich palitviaźniaŭ i pačać pramy dyjałoh z apazicyjaj. Dumaju, kali ŭsie našy tavaryšy buduć na voli, apazicyja budzie hatovaja da pieramovaŭ z uładaj. I takija pieramovy mohuć być pačaty pry pasiarednictvie Kaścioła i Pravasłaŭnaj carkvy. Biełaruś mahła b stać u hetym vypadku prykładam sapraŭdy chryścijanskaha prymireńnia.

— Što moža prymusić dyktatara pajści na prymireńnie z apazicyjaj?

— Apošnija 18 hadoŭ Biełaruś maje samyja nizkija ŭ Jeŭropie ceny na enierhanośbity. I ŭsie hetyja hady zajmaje apošniaje miesca pa ŭzroŭni zarobkaŭ, piensij u Jeŭropie. U minułym hodzie adbyŭsia abvał VUP z 54 miljardaŭ dołaraŭ da 40. My nazirali krach ekanomiki, i zaraz prablemy tolki narastajuć. Ekanamičnyja, demahrafičnyja, technałahičnyja. Kali nie budzie pieramovaŭ pamiž uładaj i apazicyjaj, to ŭ krainie całkam mahčymy livijski abo siryjski varyjant. Vialikaj prablemaj źjaŭlajecca stanovišča biełaruskich vajennych i supracoŭnikaŭ MUS. Ludzi sa zbrojaj majuć siońnia zarpłaty ŭ 5–7 razoŭ mienšyja, čym ich kalehi ŭ Rasijskaj Fiederacyi. Heta pramaja pahroza nacyjanalnaj biaśpieki i samoj ułady. Doŭha tak praciahvacca nie moža, tamu lepšym vychadam byli b mienavita pieramovy ŭnutry krainy, praviadzieńnie svabodnych vybaraŭ i pačatak realnaj madernizacyi z dapamohaj Zachadu i Uschodu.

— Jakija ŭ vas płany? Što možacie i źbirajeciesia rabić u takich umovach?

— Zaraz razhladaju niekalki prapanoŭ lačeńnia za miažoj. Biezumoŭna, płanuju sustrecca i ź biełaruskimi lekarami, jakija mianie lekavali. Maja siamja zanadta šmat pieražyła, pakul ja znachodziŭsia ŭ źniavoleńni, i nie chaciełasia b stanavicca kłopatam dla maich blizkich na voli. I, viadoma, ja spadziajusia na stanoŭčyja źmieny ŭ našaj krainie.

• 0
• 0
• 0
• 0
• 0
• 0
• 0
• 0