Śledčy kamitet Moŭčanu: Moža vy sami nanieśli sabie hetyja traŭmy?
Źbity milicyjantami aktyvist «Jeŭrapiejskaj Biełarusi» Andrej Moŭčan naviedaŭ Śledčy kamitet.
«Hadzinu była tam razmova. Ale bolšaja častka hetaha času pajšła na toje, što supracoŭniki kamiteta sprabavali vyhnać z kabinieta maju siastru Volhu, jakaja pryjšła razam sa mnoj. I łajalisia na jaje, i ŭhavorvali. Urešcie skazali, što zaraz vykličam supracoŭnikaŭ milicyi i składziem na jaje pratakoł administratyŭnaha parušeńnia.
Nijakich dokazaŭ taho, što siastra nie moža znachodzicca sa mnoj razam u kabiniecie, jany pradjavić nie zmahli. Ale ŭ vyniku Volha vyjšła z kabinieta i čakała mianie zvonku», — paviedamiŭ Moŭčan.
Dalej Andrej raspavioŭ: «Pakazali mnie maje minułyja tłumačeńni pra toje, što adbyłosia 19 maja. I spytalisia: ci paćviardžajecie vy ich? Ja adkazaŭ: tak, paćviardžaju. Tady jany kažuć, što zaraz vypišuć mnie nakiravańnie na miedycynskuju ekśpiertyzu. Ja im skazaŭ, što znachodžusia na balničnym, što ŭsie dakumienty pra maje paškodžańni jość u špitali chutkaj dapamohi.
A jany tady kažuć: chto viedaje, moža vy sami nanieśli sabie hetyja traŭmy?
Było bačna pa ich pavodzinach, što jany ŭsialakimi mietadami buduć pakryvać milicyjantaŭ. I jak maha bolš zrabić vinavatym mianie».
***
19 maja Andrej Moŭčan razharnuŭ bieł-čyrvona-bieły ściah kala ŭniviersama «Pieršamajski» ŭ minskim mikrarajonie Uručča na znak salidarnaści ź Siarhiejem Kavalenkam. Milicyjanty zatrymali jaho i žorstka źbili. Pavodle papiaredniaj vysnovy lekaraŭ, u Andreja była čerapna-mazhavaja traŭma, pierałom nižniaj skivicy i rebraŭ, adbityja nyrki i nohi.
25 maja Andreja vypisali sa špitala chutkaj dapamohi, nakiravaŭšy na lačeńnie ŭ palikliniku. U epikryzie pry vypiscy paznačana tolki toje, što jon atrymaŭ lohkuju čerapna-mazhavuju traŭmu. Pierałom skivicy, a taksama inšyja traŭmy stajać pad pytańniem.
28 maja na Moŭčana ŭ milicyi skłali dva administracyjnyja pratakoły. Adzin — pavodle standartnaha ŭžo dla apazicyjanieraŭ artykuła 17.1, što nibyta łajaŭsia matam. Druhi — 23.34, niesankcyjanavanaje pikietavańnie. Da 11 červienia Andrej Moŭčan na balničnym.
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie31
Kamientary