Izrailskaja hazieta: Apieracyju Dahanu rabiŭ francuzski chirurh, ale orhan byŭ biełaruski
Eks-kiraŭnik «Masada» zastajecca ŭ reanimacyi.
Eks-kiraŭnik izrailskaj raźviedki Mieir Dahan zastajecca ŭ chirurhičnaj reanimacyi. Bolš pra jaho stan nie paviedamlajecca. Ale jašče 17 kastryčnika jon aceńvaŭsia jak krajnie ciažki.
Timies of Israel paviedamiła, što ŭčora ŭviečary stan Dahana palepšaŭ. Apieracyju, pa infarmacyi vydańnia, u Biełarusi pravodziŭ francuzski doktar habrejskaha pachodžańnia Daniel Azułaj z Paryžskaha centra transpłantałohii. Chirurhu asistavali izrailskija śpiecyjalisty.
Pra toje, što apieracyju Dahanu praviali ŭ Minsku, pieršym abviaściŭ Alaksandr Łukašenka. Heta adbyłosia ŭ aŭtorak, 16 kastryčnika, u časie pres-kanfierencyi dla karespandentaŭ rasijskich ŚMI. Jon nazvaŭ praviedzieny biełaruskimi lekarami pieraščep piečani paśpiachovym. Pa słovach daktaroŭ, na dadzieny momant jašče rana kazać, ci pryžyłasia piečań.
Brytanskaja hazieta The Independent napisała, što kalehi, blizkija da siamji Dahana, krytykujuć Biełaruś za toje, što tam vydali miescaznachodžańnie eks-šefa izralskaj raźviedki.
Jany ŭpeŭnienyja, što ciapier jon znachodzicca ŭ niebiaśpiecy: maŭlaŭ, jość šmat ludziej, jakija chacieli b adpomścić Dahanu.
Rodnyja ž raźviedčyka zajavili, što
jon vybraŭ Biełaruś dla apieracyi tolki tamu, što ŭ Hiermanii i ZŠA jamu treba było praciahły čas čakać pierasadki piečani. A ŭ Izraili takija apieracyi asobam paśla 65 hadoŭ nie robiać. Miž tym u Biełarusi znajšoŭsia adpaviedny orhan.
Lehiendarny izrailski raźviedčyk Mieir Dahan naradziŭsia ŭ 1945 hodzie ŭ Navasibirsku, u siamji polskich habrejaŭ, jakija vyjechali ŭ Sibir.
Pasadu dyrektara zamiežnaj raźviedki Izraila «Masad», adnoj z samych mahutnych vyviedak śvietu, jon zajmaŭ u 2002–2011 hadach.
Z maja minułaha hoda źjaŭlaŭsia prezidentam kampanii «Hulivier Enerdžy» pa pošuku i raspracoŭcy naftavych i hazavych radoviščaŭ.
U Biełarusi isnuje adzin ź pieradavych u Jeŭropie centraŭ transpłantałohii, a biełaruskaje zakanadaŭstva ŭ hetaj halinie — adno z samych spryjalnych u śviecie.
Zhodna ź im, u luboha čałavieka paśla śmierci mohuć zabrać orhany dla vykarystańnia ŭ miedycynskich metach, kali tolki jon nie zabaraniŭ hetaha piśmova pry žyćci.
Ciapier čytajuć
Fatohraf-ahient z dvuma pašpartami zdymaje biełarusaŭ i ich mierapryjemstvy ŭ Varšavie10
Kamientary