Zamiest Bondar — Adamčyk

Zamiest Bondar — Adamčyk

Mirasłaŭ Adamčyk pryznačany v.a. hałoŭnaha redaktara časopisu “Vsiemirnaja litieratura”. Sam časopis pierachodzić na biełaruskuju movu i budzie nazyvacca “Suśvietnaja litaratura”. Taisa Bondar i Nina Čajka — u adstaŭcy. Chołdynh daŭ raskolinu.

Viadomy piśmieńnik Mirasłaŭ Adamčyk, syn Viačasłava Adamčyka, źmianiŭ na čale časopisa zamiežnaje litaratury Taisu Bondar. Byłaja redaktarka, niahledziačy na svoj pensijny viek, taksama nie zastajecca biaz pracy. Pavodle našaj infarmacyi, razam ź blizkimi joj pa duchu ludźmi jana pracuje nad stvareńniem novaje słavianafilskaje hazety, jakaja moža atrymać nazvu “Słavianski śviet”.

Mirasłaŭ Adamčyk, jaki ŭsie minułyja hady zajmaŭsia vydavieckim biznesam, pryvioŭ u časopis novuju kamandu. Jahonym namieśnikam, chutčej za ŭsio, stanie doŭhačasovy suaŭtar Maksim Klimkovič — da niadaŭniaha času redaktar na BT.

Za redaktarstvam T.Bondar časopis vychodziŭ pa-rasiejsku i davaŭ prytułak cichim słavianafiłam. Jašče niekalki numaroŭ, padrychtavanych staroj kamandaj, vyjduć pa-rasiejsku. Najpierš heta kitajski numar, plon vizytu redaktarki ŭ KNR. U im buduć vieršy Mao Czeduna i tvory Łao Še, achviary Mao. Spynić vychad numaru niemahčyma: heta vyklikała b dyplamatyčny skandał, bo častka nakładu zahadzia vykuplenaja kitajskim pasolstvam u Biełarusi.

Hetyja tydni Mirasłaŭ Adamčyk pracuje ŭ Maskvie i ad kantaktaŭ z presaj uchilajecca. Nam tolki stała viadoma, časopis “Suśvietnaja litaratura” budzie drukavać najpierš chrestamatyjnyja tvory i aryjentavacca na patreby navučalnych ustanovaŭ Biełarusi.

Redaktarstva M.Adamčyka — šyroki žest u bok niezaležnickaj intelihiencyi. Adnačasovaja adstaŭka N.Čajki ź “Niomanu” (mierkavany nastupnik — V.Praŭdzin) i A.Piśmiankova ź “LiMu” (zamiest jaho pryjdzie, musić, V.Šnip), abiacańni ad imia Alaksandra Ryhoraviča dać na litaraturnyja vydańni stolki hrošaj, kolki jany zapatrabujuć, i sustreča kiraŭnikoŭ chołdynhavych vydańniaŭ z kiraŭnikom dziaržavy, pryznačanaja na vierasień, — vidavočny flirt uładaŭ ź litaratarami. Nia vyklučana, što takija ščodryja abiacanki razdajucca vyklučna pierad źjezdam Sajuzu piśmieńnikaŭ. Jość infarmacyja, što idealahičnaja vertykal zhodnaja bačyć u kreśle staršyni arhanizacyi byłoha ministra kultury i pasła Anatola Buteviča abo paeta Leanida Drańka-Majsiuka. Miarkujučy pa tym, što dva arhkamitety — na čale ź dziejnaj staršynioj Volhaj Ipatavaj i alternatyŭny na čale z akademikam Hniłamiodavym — rychtujuć dva asobnyja źjezdy, jany hatovyja navat da raskołu arhanizacyi.

Niekatoryja naziralniki paśpiašalisia abviaścić pra źmienu dziaržaŭnaha kursu — pavarot da biełarusizacyi. Prajavy hetych źmienaŭ nievialikija, niahledziačy na pahroźlivy dla biełaruskaj niezaležnaści ton zajavaŭ Pucina. Z peŭnaściu pra pavarot u biełaruskaj palitycy možna budzie kazać tolki ŭ vypadku, kali va ŭładnych strukturach adbuducca choć niejkija kadravyja źmieny na karyść niezaležnikaŭ. Skandał vakoł złačynnaj hrupoŭki rabotnikaŭ KDB i MUS u Bieraści moža dać nahodu dla kadravych pieramienaŭ u siłavych strukturach. Pryznačeńnie M. Adamčyka stvaraje placoŭku dla aprabacyi novych padychodaŭ da kulturnaj palityki.

Pryznačeńnie M.Adamčyka — heta palityčny krok. Ale nielha skidvać z rachunkaŭ i prostaje imknieńnie łukašenkaŭcaŭ da zbližeńnia ź dziełavymi ludźmi Biełarusi va ŭsich sferach. M.Adamčyk, jak viadoma, źjaŭlajecca prafesijnym menedžeram vydavieckaje spravy.

Mikoła Buhaj

Redakcyja vinšuje M.Adamčyka z pryznačeńniem na adkaznuju pasadu.