A što, voźmuć dyj skanstrujujuć u nas dźviuchpartyjnuju systemu a-la Zachad: "Biełaja Ruś" — kiroŭnaja, ŁDP — kanstruktyŭnaja apazycyja :-)) Čym horaj za Štaty ź ichnimi słanom dy asłom?
Stvareńnie rehijanalnych strukturaŭ "Biełaje Rusi" idzie ŭ klasyčnym rečyščy savieckich "inicyjatyvaŭ źnizu". Jak viadoma, tady navat ceny ŭzdymali na šmatlikija prośby pracoŭnych.
Zrazumieła, kali spatrebicca, to pierarabić HA ŭ palityčnuju kvazipartyju — jak dvojčy dva. A moža spatrebicca ŭžo nieŭzabavie. Apazycyjnyja lidery zahamanili: nastupnyja parlamenckija vybary mohuć prajści pa źmiašanaj systemie! Aficyjna, nahadaju, jana nazyvajecca praparcyjna-mažarytarnaj. Heta — kali ŭ akruhach vybirajecca tolki častka deputataŭ, astatnija ž — pavodle partyjnych śpisaŭ.
A što, voźmuć dyj skanstrujujuć u nas dźviuchpartyjnuju systemu a-la Zachad! "Biełaja Ruś" — kiroŭnaja, ŁDP — kanstruktyŭnaja apazycyja :-)) Čym horaj za Štaty ź ichnimi słanom dy asłom?
A jak nahladny dapamožnik — dośvied vialikaj uschodniaj susiedki ź jejnaj "Adzinaj Rasiejaj" i ŭvohule davoli razhalinavanaj systemaj pseŭdapartyjnaj "suverennaj demakratyi".
Kaniešnie, vožyku zrazumieła: usia hetaja postsaŭkovaja butaforyja — dziela advodu vačej. Zachodnikam adčepnaha dać. Ajčynnaja publika, jašče nie zabyŭšy časy KPSS, dobra viedaje canu takomu partbudaŭnictvu.
Inšaja reč, što mnohija pojduć jak hałubki. Niekatoryja navat pabiahuć. Bo partbilet niesumnienna stanie adčyniać dadatkovyja perspektyvy. I nia tolki čynoŭnikam, prahnym da karjery. Ad farmalizavanaha śviedčańnia lajalnaści moža zajmieć svoj plon i biznesoviec, i artyst, i litaratar…
Takoje było ŭ fazie poźniaj KPSS. Leźli i žuk i žaba. Škurny intares nia nadta i ŭtojvali. Zrešty, sama "kiroŭnaja i nakiroŭnaja" sparadziła hety cynizm, bo ŭsie bolš-mienš prystojnyja pasady raźmiarkoŭvalisia vyklučna miž čalcami partyi.
Fanatyčnaha hieroja, hatovaha biaz rozdumu pakłaści žyćcio za partyjnyja ideały, na toj čas možna było pabačyć chiba ŭ filmie "Kamunist" režysera Rajzmana. Ale kali na pačatku 90-ch kamunistyčnaja imperyja pasypałasia, nichto z dvaccaci miljonaŭ čalcoŭ "pieradavoha atradu" nia vyjšaŭ na vulicy jaje abaraniać. Kalaps nazirali absalutna indyferentna.
Aficyjny biełaruski lider dobra pamiataje toj praces i tamu, badaj, nia nadta daje viery novaj palittechnalohii. Niekali ŭvohule kazaŭ: našto nastupać na tyja samyja hrabli?! Ale užo ŭ pasłańni-2006 zahučali akordy psychalahičnaj padrychtoŭki: maŭlaŭ, kali heta budzie źnizu, niazmušana, dyk u peŭnych varunkach — čamu b i nie…
Nu kaniešnie, źnizu dyk źnizu, što za pytańnie! :-))
A varunki byli abmalavany tady ž, u 2006-m: "Kali mahčymy taki praces? Napeŭna, u samyja ciažkija dy vostryja momanty, što pieražyvaje kraina ŭ svajoj historyi". Tak što ciapierašniaje arhanizacyjnaje ščyravańnie možna traktavać i jak symptom taho, što ŭžo prypiakło.
Ale vo jakaja supiarečnaść! U biełaruskaj partyi ŭłady, stvoranaj pad kryzys, nia budzie samaachviarnych hierojaŭ u styli režysera Rajzmana. Jana zmoža niešta imitavać, ale apryjory niazdolnaja stać bajavym atradam, hetkaj hvardyjaj Banaparta. Bo struktura adrazu nabudzie rysy poźniaha savieckaha ampiru.
Jak raspaŭzajecca hetaja hlina, my ŭžo bačyli.
Ciapier čytajuć
U Varšavu pryjechała sotnia biełaruskich palitviaźniaŭ3
Kamientary