Hałoŭnaj temaj narady ŭ administracyi Juščanki na minułym tydni było pytańnie praciahu trubapravodu Adesa—Brody da polskaha Płocku i pampavańnie kaśpijskaj nafty dalej, da Bałtyki.
Viktar Juščanka źviarnuŭsia da pastaŭščykoŭ i pakupnikoŭ enerhanośbitaŭ z prapanovaju ab supracoŭnictvie zacikaŭlenych u hetym tranzycie dziaržaŭ. Praz adeski terminał kaśpijskaja nafta ŭ budučyni moža pryjści i ŭ Biełaruś.
Zhadany palityčny prajekt nia maje pakul investara. Da kanca traŭnia budzie vybrana firma, jakaja za hrošy Eŭraźviazu padrychtuje prajekt praciahu trubapravodu z Ukrainy da Polščy. Adnačasova raspačnucca pieramovy ź planavanymi investarami. U najlepšym vypadku nafta paciače pa tych trubach u 2008 h.
Trubapravod Adesa—Brody byŭ zbudavany dla pastaŭki va Ŭkrainu i ŭ inšyja eŭrapiejskija dziaržavy syraviny z radoviščaŭ basejnu Kaśpijskaha mora, što nie kantralujucca rasiejskimi firmami. Rasiejcy namahalisia hetuju ideju «zakapać», kab nia stracić manapolii na pastaŭki ŭ Eŭropu.
Naprykancy 2003 h. Polšča i Rasieja pry padtrymcy Eŭraźviazu padpisali dahavor ab pastaŭcy i tranzycie kaśpijskaj nafty. Letaś byłyja ŭkrainskija ŭłady, adnak, admovilisia ad taho dahavoru dy abviaścili ab pahadnieńni z Rasiejaj. Praz try hady hetym trubapravodam pampavałasia b rasiejskaja nafta z Čornaha mora.
Pieramoha Juščanki adradziła pieršapačatkovy plan vykarystańnia trubapravodu. Ukrainski prezydent, darečy, ličycca «baćkam» mahistrali Adesa—Brody, zbudavanaj, kali jon byŭ premjer-ministram krainy (1999—2001).
Dalejšaje budaŭnictva trubapravodu dahetul spyniała nieharantavanaść pastavak syraviny ŭ Adesu. U paniadziełak Juščanka zapeŭniŭ, što nafta budzie.
Pakul budučych mahčymych pastaŭščykoŭ kaśpijskaj nafty ŭ Adesu niekalki. Apošnija niekalki hod siarod ich vyłučajecca amerykanski kancern Chevron Texaco, jaki ekspluatuje vialikija radoviščy ŭ Kazachstanie.
Kali ž trubapravod nie daciahnuć da Płocku, Ukraina maje inšy scenar. Juščanka namiaknuŭ pra mahčymaść budaŭnictva naftapierapracoŭčaha zavodu ŭ Brodach (Lvoŭskaja vobłaść).
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary