Frałoŭ zaklikaŭ hałasavać za Milinkieviča

«Hadzić, hruba kažučy, nikomu nie źbirajusia, — skazaŭ V.Frałoŭ. — Baču troch kandydataŭ, hatovych pieramahčy Łukašenku». Na haradzienskaj kanferencyi najbolš hałasoŭ nabrali Milinkievič i Šuškievič. Siarhiej Maksimovič — z Horadni.

Abłasnaja kanferencyja demakratyčnych siłaŭ adbyłasia ŭ Horadni ŭ niadzielu 24 krasavika. Na joj hałasavali za pretendentaŭ na rolu adzinaha kandydata ad apazycyi na budučych vybarach. Prysutničali 86 z abranych 101 delehata, udzielničali ŭ hałasavańni 83. U haradzienca Alaksandra Milinkieviča 57 hałasoŭ, u Stanisłava Šuškieviča — 49, u Siarhieja Kalakina — 32, u Anatola Labiedźki — 25. Samavyłučency atrymali mieniej čym pa 10 hałasoŭ.

Prykład akademikaŭ

Aproč dvuch lideraŭ, vyniki hałasavańnia, biezumoŭna, paciešyli S.Kalakina, ale nie mahli asabliva zadavolić A.Labiedźku, jaki, darečy, sam adsutničaŭ.

Vystupić na kanferencyi dali taksama adnaasobnikam — Alaksandru Vajtoviču, Uładzimieru Kołasu i haradziencu Valerju Frałovu. Havaryli jany pa dziesiać chvilinaŭ, jak i ŭsie astatnija.

A.Vajtovič skazaŭ, što jahonaja meta — źmiena palityčnaj sytuacyi ŭ krainie. Umovy dla hetaha isnujuć, bo šyrokija słai nasielnictva nie zadavolenyja ciapierašnimi paradkami. A.Vajtovič pryvioŭ prykład ahulnaha schodu Akademii navuk, jaki adbyŭsia ŭ minuły čaćvier. Na ŭdzielnikaŭ byŭ akazany žorstki presinh, kab naviazać źmieny ŭ statucie akademii. Adnak udzielniki nie pabajalisia, adkrytym hałasavańniem vykazalisia suprać. Ale, padkreśliŭ vystupoŭca, nieabchodna skałanuć hramadztva i znajści zhodu pamiž usimi pretendentami, jakija chočuć vystupić kandydatami.

Vopleski hienerału

U.Kołas skazaŭ, što adčuvaje siabie krychu niajomka, bo nie padpisaŭ ahulnaj zajavy pretendentaŭ. Ale, maŭlaŭ, my pavinny adroźnivacca ad režymu, jaki robić presinh na tych, chto nia ź im. Čamu jany, niezaležnyja kandydaty, nia majučy struktur, usio ž iduć u kampaniju? Bo, na jahonuju dumku, u pradstaŭnikoŭ partyj niama vialikich šancaŭ na vybarach. Kołasava pazycyja: treba šukać fihuru neŭtralnuju, jakaja budzie vyklikać sympatyi ŭsiaho hramadztva. U.Kołas pryhadaŭ, što na minułych vybarach haradziency dali adnaho z važkich kandydataŭ… Dalej jon skazaŭ, što, moža, paciśnie ruku tamu, chto z kandydataŭ vyjdzie napierad, ale mahčyma, što jamu samomu praciahnuć ruku. «Budziem razam, i my pieramožam, — skončyŭ U.Kołas. — Žyvie Biełaruś!»

«Krychu dziŭna ŭ jakaści hościa vystupać u rodnym horadzie», — pačaŭ hienerał Valery Frałoŭ. Jon skazaŭ, što dobra viedaje A.Milinkieviča, i zaklikaŭ delehataŭ hałasavać za jaho. Udzielničać u vybarach pavodle dziejnaha kodeksu biessensoŭna, ličyć V.Frałoŭ, tamu jon pasprabuje inicyjavać referendum ab źmienie vybarčaha zakanadaŭstva. «Hadzić, hruba kažučy, nikomu nie źbirajusia, — skazaŭ V.Frałoŭ, — chacia ŭ palitycy siabroŭ niama». Jon skazaŭ, što namiervajecca surjozna pracavać. Darečy, hienerał pieršym atrymaŭ vopleski ŭdzielnikaŭ kanferencyi.

Złomkaŭ adździalić

U kuluarach hienerał Frałoŭ skazaŭ, što bačyć troch čałaviek, zdolnych pieramahčy Łukašenku. Adnak, na jahonuju dumku, hetyja troje majuć mała šancaŭ na vyłučeńnie adzinym kandydatam na Nacyjanalnym kanhresie. Ale kali chtości z hetych troch projdzie, hienerał Frałoŭ hatovy pracavać na jaho.

S.Šuškievič zaklikaŭ vyłučyć tych ludziej, jakija majuć bolšuju imaviernaść vybrańnia, a nia tych, chto padabajecca tabie asabista. Jon taksama zaklikaŭ «złomkaŭ, niedaciop adździalić», vykraślić ź biuleteniaŭ. Kab na kanhresie byli tyja, chto nia budzie psavać… S.Šuškievič nie pahadziŭsia z tymi, chto asudžaje partyi. Pakolki ŭsie represii — na ich, bo jany adkryta zmahajucca za ŭładu i ich stanovišča ciažkaje. Jon skazaŭ, što pra siabie havaryć nia budzie, i zaznačyŭ, što jamu spadabaŭsia vystup A.Vajtoviča. Na ahulnym schodzie Akademii sam S.Šuškievič nia byŭ, ale jamu daspadoby, što jaho ŭdzielniki faktyčna vykazali adkryty pratest.

A.Milinkievič pryznaŭsia, što adčuvaje siabie siarod haradziencaŭ bolš upeŭniena. Jon zrabiŭ ekskurs u 2001 hod — tahačasnyja prezydenckija vybary stali vydatnaj škołaj. Pierad imi była stvorana va ŭsich abłaściach kaalicyja «Rehijanalnaja Biełaruś». A.Milinkievič pryznaŭsia, što sioleta abjechaŭ usiu Biełaruś.

Pierachodnaja fihura

Zamiest adsutnaha z pavažnaj pryčyny A.Labiedźki vystupaŭ Stanisłaŭ Bahdankievič. Jon u peŭnaj stupieni reklamavaŭ A.Labiedźku, havoračy, što toj vystupaje suprać režymu «z adkrytym zabrałam», sprabuje adstojvać demakratyčnyja pazycyi na mižnarodnaj arenie, a taksama dbaje pra toje, kab izalavać režym. «Nia stolki intelektuał patrebien, kolki bajec, trybun, publicyst», — havaryŭ S.Bahdankievič. Jon jašče zaznačyŭ, što heta pavinna być «pierachodnaja fihura». «Mnie padabajecca Labiedźka, bo čysty intelihient maje mienš šancaŭ na pieramohu», — praciahvaŭ vystupoviec. Jon, praŭda, adznačyŭ, što na kanhres treba vyłučyć niekalkich kandydataŭ, i jašče raz nahadaŭ, što A.Labiedźka «hatovy da samaachviarnaści, da baraćby». Darečy, na kanferencyi razdavali drukavany zvarot A.Labiedźki da delehataŭ, a taksama jahony buklet. Moža, heta jakraz spracavała advarotnym čynam.

Svoj niadoŭhi vystup samavyłučeniec dacent ź Miensku Valery Arcišeŭski skončyŭ słovami ab tym, što jon «hatovy ŭ imia taho, kab mara pieratvaryłasia ŭ realnaść, pracavać na luboha kandydata».

Kanhres pad adkrytym niebam

Apošnim vystupaŭ Siarhiej Kalakin. Jon zaznačyŭ, što krainu i narod mohuć vykinuć na abočynu historyi.

«A.Łukašenka razvažaje pra toje, ci budzie jon kiravać u 2015 hodzie. Naša zadača — kab jon pierastaŭ kiravać u 2006 hodzie», — padkreśliŭ S.Kalakin. Na jaho dumku, bolšaść nasielnictva žadaje vybrać inšaha čałavieka. Ale ažyćciavić heta budzie «pa siłach supolnamu kułaku demakratyčnych sił». Jon miarkuje, što 80% demakratyčnych sił uciahnuty ŭ praces i, kali navat 50% buduć pracavać na adzinaha kandydata, budzie mahčymaść pieramahčy. S.Kalakin zaznačyŭ, što lepšych praviłaŭ dla vybarčaj kampanii nia varta čakać, bo Łukašenka «nie samahubca». Ale, «kab łukašyzm skončyŭsia, treba pierastupić cieraz partyjnyja prychilnaści». Kiraŭnik PKB, darečy, taksama atrymaŭ vopleski. Nie ŭ apošniuju čarhu tamu, što nahadaŭ pra dośvied KPZB i partyzanaŭ — asabliva kali Nacyjanalny Kanhres budzie pravodzicca napaŭlehalna.

Usie ŭdzielniki havaryli pra toje, što Kanhres demakratyčnych siłaŭ nieabchodna pravieści čym chutčej, i nie paźniej za lipień—žnivień — kab mieć čas na raskrutku adzinaha kandydata. Pahatoŭ, kali daviadziecca pravodzić kanhres dzieści pad adkrytym niebam, nielha ciahnuć da chaładoŭ i daždžoŭ.

• 0
• 0
• 0
• 0
• 0
• 0
• 0
• 0