Рубля ня будзе
Беларускі бок афіцыйна паінфармаваў Цэнтрабанк Расеі аб немагчымасьці ўвядзеньня ў краіне расейскага рубля з 1 студзеня 2006 году. Падстава — тэхнічныя прычыны. Пра гэта заявіў 24 траўня ў Маскве намесьнік старшыні ўраду — паўнамоцны прадстаўнік прэзыдэнта Беларусі Васіль Даўгалёў. “Прэзыдэнты, канечне, могуць даць адпаведныя даручэньні, але па лёгіцы мы не ўкладаемся ў тэрміны”. Словы чыноўніка пацьвердзіў і начальнік упраўленьня інфармацыі Нацбанку Анатоль Драздоў.
Для тэхнічнай рэалізацыі ўвядзеньня расейскага рубля патрабуецца шэсьць месяцаў, але перад гэтым трэба падпісаць пагадненьне аб бюджэтнай палітыцы, якое яшчэ не гатова. Новыя тэрміны ўвядзеньня адзінай валюты абмяркуюць у лістападзе.
Камбайн-цуд
Рэспубліканскае ўнітарнае прадпрыемства “ДСКБ па зернеўборачнай і кормаўборачнай тэхніцы” вытворчага аб’яднаньня “Гомсельмаш” стварае новы высокапрадукцыйны камбайн “Ліда-1700”. Беларуская машына будзе аналягам нямецкага камбайну “Лексіён-560”, які мае магутнасьць 360 конскіх сіл і здольны перапрацоўваць да 14 кг зерневай масы ў сэкунду. Гэта дазваляе жаць бяз страт палеткі з ураджайнасьцю 80—150 цэнтнэраў з гектару. Патрэбы Беларусі — ад 50 да 150 машын у год. Да канца 2006 году плянуецца выпусьціць некалькі досьледных узораў, а ў
2007 г. — першую партыю новых супэркамбайнаў. Зьбіраць караблі палёў мяркуюць у Лідзе.
Прамаркіруем усё
Мінфін плянуе пашырыць пералік тавараў, якія падлягаюць абавязковай маркіроўцы. Пералік тавараў, якія будуць маркіравацца, яшчэ невядомы. У сакавіку ўжо сталі маркіраваць піва і маторныя маслы, што дазволіла значна павысіць паступленьні акцызаў у бюджэт: па піве — у 4,1 разу, па маслах — у 3,2 разу.
Валюты паболела
Аб’ём валютнай выручкі, што паступіла на рахункі прадпрыемстваў у беларускіх банках за студзень—красавік, склаў 4,861 млрд даляраў у эквіваленце. Гэта на 37,1% болей, чым на студзень—красавік мінулага году. Паступленьні ад экспарту тавараў павялічыліся на 37,9% (да 4,278 млрд даляраў), выручка ад аказаньня паслуг — на 28,2% (да 524,3 млн даляраў). Валютная выручка, што паступіла з краін СНД, склала 2,214 млрд даляраў, з краін за межамі СНД — 2,647 млрд даляраў.
АГ, afn.by, belta.by, interfax.by
Цяпер чытаюць
Сталі вядомыя падрабязнасці таго, як у В'етнаме затрымалі Верамейчыка16
Каментары