Закон пра забарону расьпіцьця піва ў грамадзкіх месцах будзе ўхвалены, але пакіне шмат пытаньняў.
Адмяжоўваючыся ад Захаду, урад набліжае законы да заходніх стандартаў. Забарона піць піва ў грамадзкіх месцах павінна зрабіць Беларусь бліжэйшай па ўзроўні культуры да Эўропы і ЗША.
Сапраўды, ніхто ня п’е на вуліцах Чэхіі з рыльца, бо лёгка знайсьці гасподу з вольным месцам, кандыцыянэрам, музыкай і рознымі зручнасьцямі да бурштынавага напою, накшталт прыбіральні. Пляшкі й бляшанкі — гэта для дому, гасьцей ці якога летніку ў гарах.
У Беларусі пасьля ўвядзеньня пастановы сям-там сутыкнуцца зь непрыемнай рэчаіснасьцю. Так, у Баранавічах улетку цяжка знайсьці вольнае месца сярод піўных навесаў, асабліва пасьля 17-й, калі стомлены электарат вяртаецца з працы. Пра зіму і казаць няма чаго — навесы зьнікаюць пасьля 1 кастрычніка, а піўніц у горадзе з антонаву сьлязу. Пакуль няма ў беларусаў і звычкі (а магчыма, і грошай) купляць піва загадзя скрынямі ды захоўваць у лядоўні.
Магчыма, што закон будзе жыць сваім жыцьцём, а пляшкі піва ў руках цячы сваім. Дзейнічае ж даўно ў нас закон пра забарону п’янства ў грамадзкіх месцах. Але парушаюць яго штодня сотні грамадзян. А ёсьць нават сьвяточныя дні, калі закон той ня дзейнічае зусім. Моладзь тады цёгаецца п’яная па вуліцах, гарэлка прадаецца на плошчах пад вокнамі выканкамаў. Міліцыянты ў парадных мундзірах лагодна пазіраюць на ўсё гэта, разганяючы толькі ўдзельнікаў боек.
У гэтыя сьвяточныя для гандлю дні крамы адбіваюць месячныя выручкі й сплываюць у людзей месячныя заробкі. Такія дні цяперака стануцца гэткімі ж вольнымі для піва. А ў астатнія будні за пляшку піва ў руцэ будуць затрымліваць міліцыянты.
Закон будзе ўхвалены, але пакіне шмат пытаньняў. Напрыклад, пра пакуначкі для бутэлек. Ці будуць яны прадавацца, ці бровары будуць іх прыкладаць да пляшкі? Ці магчыма будзе з тых пакункаў піць у грамадзкіх месцах, ці давядзецца выцягваць бутэльку й паказваць пільнаму міліцыянту свой «Дзюшэс»?..
Баранавічы
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін6
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1919
Каментары