Шок для эканомікі Беларусі
«Для эканомікі Беларусі шокам можа стаць магчымае выроўніваньне цэнаў на нафту», — пра гэта заявіў 21 верасьня на брыфінгу ў Менску намесьнік начальніка эўрапейскага дэпартамэнту МВФ Балаж Хорват. Паводле чыноўніка, адзін з складнікаў эканамічнага росту Беларусі — розьніца паміж таннай расейскай нафтай і экспартным коштам на атрыманыя зь яе нафтапрадукты. Сп.Хорват лічыць, што цана на нафту будзе расьці і зь цягам часу дасягне сусьветнага ўзроўню. Яшчэ адным шокам можа стаць скарачэньне эканамічнага актыўнага насельніцтва і росту колькасьці пэнсіянэраў, і гэтая тэндэнцыя будзе ўжо заўважная з 2007 г.
Сьпіс ліквідаваных турфірмаў
Міністэрства спорту й турызму апублікавала сьпіс са 100 кампаніяў, што пазбаўлены ліцэнзіяў на турыстычную дзейнасьць. Большасьць выпадкаў зьвязана зь нясвоечасовай падачай дакумэнтаў, а таксама з адсутнасьцю прапановаў кампаніяў адносна ўязнога турызму.
Цукровая вайна з Расеяй
Міністэрства эканамічнага разьвіцьця Расеі пачало сьледзтва ў дачыненьні да беларускага цукру. Цукравікі Расеі жадаюць, каб расейскі ўрад увёў у дачыненьні да беларускага цукру кампэнсацыйнае мыта — $149 за тону. Такім чынам расейскія вытворцы прапануюць вырашыць праблему канкурэнцыі беларускага цукру з расейскім, доля якога на ўсходнім рынку складае 8%. Апроч таго, беларускі цукар больш танны ($480 за тону, расейскі — $540). Увядзеньне мыты магчыма толькі пасьля таго, як установяць памер шкоды, нанесенай расейскім вытворцам цукру.
Ізноў па ліцэнзію
Прыватныя мэдцэнтры «Нардзін» і «Экамэдсэрвіс» падалі ў Міністэрства аховы здароўя заяўкі на атрыманьне новых ліцэнзій на ажыцьцяўленьне мэдыцынскай дзейнасьці. Цяпер «Экамэдсэрвіс» не працуе, «Нардзін» трымае толькі аптэкі. Іх ліцэнзіі былі скасаваныя калегіяй міністэрства аховы здароўя.
Біржа №3
Да канца году пры канцэрне «Белнафтахім» будзе створаная біржа нафтапрадуктаў. На ёй будзе адзін брокер — Беларускі нафтавы гандлёвы дом, заснавальнікамі біржы будуць дзяржаўныя прадпрыемствы — вытворцы нафтапрадуктаў. На сёньня ў Беларусі дзейнічаюць валютна-фондавая й таварна-сыравінная біржы.
ЗД
Каментары