Расійскі газавы гігант «Газпрам» афіцыйна стаў новым спонсарам SEHA-лігі (турніру Паўднёва-ўсходняй гандбольнай асацыяцыі).
Пра гэта было абвешчана 13 красавіка ў Скоп'е падчас спецыяльна скліканай прэс-канферэнцыі.
Таксама стала вядома, што гэты турнір, які аб'ядноўвае каманды Босніі, Харватыі, Чарнагорыі, а таксама па адным клубе Беларусі і Славакіі, будзе ператвораны ў новае спаборніцтва пад назвай «Ліга Паўднёвы паток» (магчымы англамоўны варыянт SEHA Ліга - South Stream),паведамляе сайт Брэсцкага гандбольнага клуба імя Мяшкова.
«Газпрам» абавязаўся аплаціць удзельнікам SEHA-лігі ўсе выдаткі па праезду камандаў да месца гульняў, расходы па пражыванні, а клубы ў сваю чаргу павінны будуць праводзіць дамашнія матчы на спартыўных арэнах, якія змяшчаюць мінімум 2000 гледачоў, а таксама забяспечаць тэлевізійныя трансляцыі 50% гульняў.
У будучым турніры мяркуецца ўдзел 10-12 камандаў. Па два прадстаўнікі будуць мець Македонія, Сербія, Харватыя, Боснія і Герцагавіна, па адным - Чарнагорыя, Славакія, Беларусь, аднак гэты спіс яшчэ будзе ўдакладняцца,і больш канкрэтная інфармацыя з'явіцца ў канцы мая. Сваю зацікаўленасць ва ўдзеле ў гэтых спаборніцтвах выказала федэрацыя гандбола Венгрыі, якая заявіла аб жаданні дэлегаваць тры клубы і праводзіць «Фінал чатырох» у сваёй краіне раз у два гады.
Новы спонсар заснаваў прызавы фонд агульным памерам 80 000 еўра: пераможца атрымае 35 тыс., другі фіналіст - 25 тыс., каманды, якія занялі трэцяе і чацвёртае месцы, адпаведна 15 тыс. і 5 тыс. еўра.
На прэс-канферэнцыі таксама было абвешчана, што кіраўніцтва лігі ў бліжэйшыя гады будзе прыкладаць намаганні, каб Еўрапейская гандбольная федэрацыя (ЕГФ) дала пераможцу гэтага турніру месца ў Лізе Чэмпіёнаў.
У сёлетнім турніры SEHA-лігі бралі ўдзел 10 камандаў. Беларускі БГК заняў у рэгулярным чэмпіянаце 1-е месца,г.зн. прайшоўшы ў «фінал чатырох». Але ў самім фінале, які зараз праходзіць у Скоп'е, у паўфінале прайграў харвацкаму «Заграбу» 29:31 і цяпер згуляе ў матчы за 3-е месца.
Цяпер чытаюць
Антон чатыры гады хаваўся ад лукашыстаў у родных Баранавічах — затрымалі, калі вырашыў здаць на правы4
Каментары