Разумею мужыкоў, якія любяць гэтыя нагоды для ўздыманьня чарак. Але ўсё адно анамальна, што міралюбная сінявокая Беларусь жыве ў каляндарнай стылістыцы аточанай цытадэлі. Піша ў сваім блогу Аляксандар Класкоўскі.
Калі хто ня ведае, дык ведайце: бранявы шчыт нашых узброеных сілаў надзейна захоўвае мір і бясьпеку Рэспублікі Беларусь.
Думаеце, аўтар добра адсьвяткаваў учора Аршанскую бітву? Не, як шкельца. Проста цытую нашага міністра абароны, які віншуе ўсіх з Днём танкістаў.
Таксама "ён адзначыў, што гэтае сьвята ўсталяванае ў 1946 годзе на знак выдатных заслуг бранятанкавых і мэханізаваных войскаў у Вялікай Айчыннай вайне і самаадданай працы танкабудаўнікоў дзеля аснашчэньня ўзброеных сілаў бранятанкавай тэхнікай".
Фармулёўкі сталінскіх часоў, сьвяты неіснуючай савецкай імпэрыі. Даўно стала іншай баявая тактыка. Калі ўжо на тое, то бліцкрыг у Іраку засьведчыў, што славуты "бранявы шчыт" у сучаснай высокатэхналягічнай вайне ратуе ня болей, чым сярэднявечныя дасьпехі ад буйнакалібэрнага кулямёта. Галоўнае ж — ніхто не зьбіраецца на нас нападаць. І бразганьне рыторыкай са старых палітрукоўскіх шпаргалак выглядае проста недарэчным.
Зірнеце на сьпіс айчынных сьвятаў і памятных датаў. Апатэоз мілітарызму! Дзень інжынэрных войскаў, Дзень войскаў супрацьпаветранай абароны, Дзень дэсантнікаў, Дзень чыгуначных войскаў, Дзень вайскова-паветраных сіл, Дзень танкістаў, Дзень ракетных войскаў і артылерыі… Дадайце сьвяты іншых сілавікоў — дні міліцыі, унутраных войскаў, памежніка, супрацоўнікаў пракуратуры, мытніка, супрацоўніка органаў дзяржаўнай бясьпекі. Такім букетам сьвятаў у пагонах ня можа пахваліцца, бадай, ніводная іншая краіна.
Разумею мужыкоў, якія любяць гэтыя нагоды для ўздыманьня чарак. Але ўсё адно анамальна, што міралюбная сінявокая Беларусь жыве ў каляндарнай стылістыцы аточанай цытадэлі.
І разам з тым — ня тое што не ўвекавечылі памяць пра Аршанскую бітву, а 'шчэ й хапаюць за спробу нефармальнага сьвяткаваньня!
Цяперашні рэестар афіцыйна ўсталяваных датаў выразна адлюстроўвае куртатасьць, эклектычнасьць і саўковую подбіўку дзяржаўнай ідэалёгіі. Некалі гэты пярэсты сьпіс давядзецца сур'ёзна рэвізаваць. А пакуль — мо' і ёсьць сярмяжная праўда ў тым Дні танкістаў. Бо глуха як у танку.
ЗЫ. Ня падайце з зэдліка: 10 сьнежня ў нас — афіцыйна зацьверджаны Дзень правоў чалавека.
На здымках: "бранявы шчыт" не ўратаваў Садама; тым часам кемлівыя замежнікі прыдумалі крэсла-танк для інвалідаў.
Цяпер чытаюць
Паветраная гімнастка паказала закуліссе працы ў Белдзяржцырку8
Каментары