Апоўдні 24 верасня з будынка на вуліцы Мяснікова, 25, вядомага мінчукам і гасцям сталіцы як «Данькоў- клуб», пачалося высяленне казіно.
Да гмаха спачатку прыбылі ўладальнікі будынка — прадстаўнікі «Беларускага таварыства глухіх», у якога клуб арандаваў 6-павярховы будынак цягам 20 гадоў. Сёння з будынка павінны быць вывезеныя ўсе рэчы арандатара.
Пра тое, што клубу не працягваюць дамову арэнды, жонка цяпер падследнага ўладальніка клуба Юрыя Данькова Наталля даведалася нядаўна.
Для яе стала нечаканасцю тое, што забраць клуб у іх могуць проста падчас следства.
Па словах Мікалая Кулакова (старшыні ПУП «Віток», што ўваходзіць у Беларускае таварыства глухіх), не працягнулі дамову з уладальнікамі «Данькоў-клуба» ўчора.
Прычына — нявыплата арэнды за 2 месяцы.
Паводле Кулакова, усе дакументы па арэндзе будынка знаходзяцца ў следства.
«Агульная запазычанасць — 836 млн рублёў. Акрамя таго, вялікія нараканні да „Данькоў-клуба“ мела пажарная служба. „Данькоў-клуб“ таксама не выканаў прадпісанне Маскоўскага выканкама, па якім трэба было пафарбаваць фасад, азеляніць тэрыторыю і г.д. Яшчэ яны зрабілі рэканструкцыю будынка без нашага дазволу», — сказаў Мікалай Кулакоў.
Паводле яго слоў, будынак цяпер будзе часова належаць ПУП «Віток». Праз месяц, па словах Кулакова, будынак выставяць на аўкцыён.
Нагадаем, год таму, 4 верасня 2012 г., быў затрыманы бізнесмен Юрый Данькоў — уладальнік забаўляльнай установы «Данькоў- клуб» . Праз некалькі дзён яму было прад’яўленае абвінавачванне ў здзяйсненні злачынства, прадугледжанага ч. 2 арт. 171 КК (выкарыстанне заняткам прастытуцыяй або стварэнне ўмоваў для заняткаў прастытуцыяй, учыненыя службовай асобай з выкарыстаннем сваіх службовых паўнамоцтваў).
19 жніўня расследаванне было завершана: канчатковае абвінавачанне прад’яўлена адразу па сямі артыкулах Крымінальнага кодэкса:
ухіленне ад выплаты падаткаў, арганізацыя і ўтрыманне прытону, уцягванне ў прастытуцыю, дэманстрацыя парнаграфіі, падробка дакументаў, фальсіфікацыя доказаў па грамадзянскай справе.
18 верасня над Юрыем Даньковым пачаўся суд, ён праходзіць у закрытым рэжыме.
Каментары