Каму належыць спадчына ВКЛ?

Чытайце пра гэта ў новым нумары часопісу «ARCHE».

Таксама ў «ARCHE» №10‑2007 — аналіз Ірыны Віданавай «Апантаныя надзеяй: Беларуская моладзь пасьля выбараў 2006 году», артыкул Аляксандра Чубрыка аб новай эканамічнай палітыцы аўтарытарнага рэжыму, Пётры Рудкоўскага — аб вяртаньні біскупа Кандрусевіча і этнічных чыстках у беларускім Касьцёле, працяг параўнальнага дасьледаваньня эўрапейскіх нацыянальных рухаў ХІХ ст. чэскага гісторыка Міраслава Гроха. Таксама ў нумары — Алесь Анціпенка, Алена Гапава, Віктар Жыбуль, Віталь Сіліцкі.

На дэсэрт — падборка вершаў Андрэя Хадановіча.

Андрэй Хадановіч. Музэй дзяўчатаў

Хораша гопніцы, добра эстэтцы
ў Нацыянальнай Бібліятэцы.

Вось Юля: такія вабноты
сустрэнеш ня ў кожным кіно ты.
На ейным стале “Сто гадоў адзіноты”
і нейкія ноты.

Вось Воля, сяброўка Юліна.
На месцы пупа – пірсінгавая адтуліна.
Чытае Бураўкіна і Барадуліна.

У Алі прыгожыя кудзеры.
Калекцыянуе скутэры.
Чытае раманы Кундэры.

У Варвары-красы
фарбаваныя валасы.
Чытае”Каласы
пад сярпом тваім”.
Робіць вочы адразу дваім.

Мая —
фрызуру чырвоную мае
і патрыманы “Запар”.
Чытае ўсё запар.

Студэнтка з Амэрыкі Эрыка
праглядае каталёгі з ваннамі “Эўрыка!”,
“Сэрца цемры” і Велета Цемрыка.

Брунэтку Іру
засьпяваем з чацьвертым том “Вайны і міру”.
Бляндынку Тому —
на сярэдзіне трэцяга тому.
Ксюша —
добры слых, прыгожыя вушы —
чытае “Імёны Ружы і Грушы”
й жаночую энцыкляпэдыю
“Тысяча спосабаў ня думаць аб мужы”.
Ася
чытае кніжку “Каляда Югася.
“Галоўная памылка Афанасія”.
Афанасій – галоўная Асіна пасія.
Яна зь Янава
чытае вершы Разанава.
Не ўрубаецца. Перачытвае занава.
Лене з
пантамі інтэлектуалкі падабаюцца Вайль і Геніс,
Міры – кніга пра “Мірны тэніс”.
Віка – чытае “Трэнас”.
Нону
выхавалі ў павазе да нацыянальнага канону –
аддае перавагу Зянону.
Госьця з Масквы –
замест аўганскай травы
ўжывае кніжкі “Вершnick” і “Вершnick без галавы”.
Вальжына
ў футболцы “Белшына” –
з кніжкай “Добры дзень, мая шыпшына!”
Клава са Шклова
ўсе іншыя творы Арлова
на памяць вучыць адмыслова.
Засталася прыблізна палова.
У Соні – чытанак сотні,
ды ўлюбёныя “Хрыстос прызямліўся ў Гародні”
і “Беларусь Сегодня”.
Таня
чытае “Дажыць да сьвітаньня”,
Яраслава – “Аблаву”,
Рая – “Воўчую зграю”,
Сьвета – “Трэцюю ракету”,
згаданая Тома – “Доўгую дарогу дадому”,
а ў Лоры – яго вершаваныя творы.
За дадатковую плату – чего не сделаешь ради денег! –
уключу ў гэты сьпіс і цябе, калі ты дзяўчына альбо пісьменьнік.
Шукай абменьнік.

• 0
• 0
• 0
• 0
• 0
• 0
• 0
• 0