88 — гадовы ўкраінец Восіп Фірышчак, які падчас ІІ сусьветнай вайны браў удзел у вынішчэньні 100 тысячаў польскіх габрэяў, пазбаўлены грамадзянства ЗША.
Фірышчак эміграваў у ЗША у 1949 годзе й праз пяць гадоў атрымаў амэрыканскае грамадзянства. Амэрыканскі Дэпартамэнт юстыцыі выявіў, што ў ваенны час украінец належыў да «арганізацыі, якая адказвае за адно з найбольш жорсткіх злачынстваў у гісторыі чалавецтва». Фірышчак не пагаджаецца з абвінавачаньнямі й наднаразова зьвяртаўся у суд з апэляцыяй.
Паводле амэрыканскіх сьледчых, падчас вайны Фірышчак служыў ва ўкраінскай паліцыі, якая падпарадкоўвалася немцам. Ён удзельнічаў у вывазе польскіх габрэяў у львоўскае гета. Дэпартамэнт юстыцыі мае таксама зьвесткі, што ўкраінец абкрадаў ахвяраў, а хворых і старэйшых растрэльваў у непадалёкім ад гета лесе. Фірышчак таксама ўдзельнічаў у «паляваньні» за тымі, хто здолеў уцячы з гета, пазьней браў удзел у ліквідацыі львоўскага гета й высылцы габрэяў у канцэнтрацыйныя лягеры.
Амэрыканскі суд сьцьвердзіў, што калі Ўкраіна не пагодзіцца прыняць Фірышчака, то ён будзе перададзены Нямеччыне, Польшчы альбо іншай краіне, якая пагодзіцца яго прыняць.
Каментары