Алесь Бяляцкі заклікаў ААН «абараняць жыццёвую прастору для грамадзянскай супольнасці»
Рада па правах чалавека (РПЧ) ААН павінен абараняць жыццёвую прастору для грамадзянскай супольнасці, выкарыстоўваючы для гэтага ўсе наяўныя ў яго распараджэнні сродкі, аказваць націск на тых, хто злоўжывае ўладай, і заклікаць іх да адказнасці.
Пра гэта заявіў беларускі праваабаронца Алесь Бяляцкі, выступаючы 5 сакавіка на 28-й сесіі РПЧ у Жэневе.
Віцэ-прэзідэнт Міжнароднай федэрацыі за правы чалавека, старшыня закрытага беларускімі ўладамі праваабарончага цэнтра «Вясна» Бяляцкі зазначыў, што ў шматлікіх краінах, у тым ліку ў Беларусі, праваабаронцам не даюць дзейнічаць. «Наш голас заглушаны і не чутны, — падкрэсліў ён.
«Праваабаронцы сутыкаюцца са шматлікімі перашкодамі ў сваёй дзейнасці: пагрозы, напады, жорсткае абыходжанне, забойствы, гвалтоўныя знікненні, незаконнае сачэнне, адвольныя затрыманні, — заявіў Бяляцкі. — Супраць іх скіраваныя законы, якія вызначаюць іх легітымную дзейнасць як антыдзяржаўную і навешваюць на іх зневажальны хлуслівы ярлык замежных агентаў, як гэта робіцца ў Расіі. Ім перакрываюць доступ да фінансавання ці крыміналізуюць легітымную дзейнасць».
Паводле слоў Бяляцкага, нягледзячы на міжнародныя стандарты, прастора для дзейнасці грамадзянскай супольнасці і праваабаронцаў у свеце «знаходзіцца пад пагрозай ці скарачаецца», а «рэпрэсіўныя рэжымы кідаюць за краты мірных актывістаў па розных сфабрыкаваных абвінавачаннях».
Бяляцкі нагадаў, што Камітэт па правах чалавека ААН прызнаў яго змяшчэнне пад варту прамым вынікам парушэння яго права на свабоду аб'яднанняў. «Маніпуляцыі з унутраным заканадаўствам краін супраць праваабаронцаў не могуць утаіць ад міжнароднай грамадскасці грубыя парушэнні правоў чалавека», — падкрэсліў Бяляцкі.
Паводле яго слоў, «нападкі на грамадзянскую супольнасць ідуць разам з нападкамі на ўніверсальны характар правоў чалавека пад прыкрыццём захавання традыцый, рэлігіі ці каштоўнасці». «Падтрымліваючы правы на развіццё ўнікальных чалавечых культур, мы выступаем супраць выкарыстання гэтых паняццяў для рэпрэсій, падрыву міжнародных стандартаў і асноўных свабод», — сказаў праваабаронца.
Бяляцкі падкрэсліў: у краінах, дзе праследуюцца правы і свабоды, заявы і рашэнні ААН, якія датычацца правоў чалавека, з'яўляюцца важным палітычным стымулам, які падтрымлівае грамадзян. «Краінавыя мандаты даказалі сваю аб'ектыўнасць і карыснасць у сітуацыі сістэматычных парушэнняў правоў чалавека. Трыбуну і працу краінавых дакладчыкаў ААН неабходна абараняць і заахвочваць», — рэзюмаваў беларускі праваабаронца.
Нагадаем, Алесь Бяляцкі правёў больш за тысячу дзён у папраўчай калоніі і вызваліўся ў чэрвені 2014 года. Яго судзілі за ўтойванне даходаў, але праваабарончыя арганізацыі перакананыя, што прычынай крымінальнага пераследу стала грамадская дзейнасць Бяляцкага, у сувязі з чым ён быў прызнаны палітычным зняволеным.
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню16
Каментары