«Дырэктар заскокнуў на капот, а міліцыя мяне аб’ехала і — гудбай!» — як візіт у аўтасэрвіс скончыўся скандалам ВІДЭА

«99% задаволеных кліентаў!» — паведамляе сайт адной з мінскіх СТА. Аднак прадстаўнік таго 1% незадаволеных звярнуўся ў Рэдакцыю, каб распавесці займальную гісторыю сваіх узаемаадносін з рамонтнікамі.

12 красавіка ў мінчука Сяргея не завёўся яго «Субару Форэстэр».

«У сеціве я знайшоў рамонтнікаў. Патэлефанаваў, дамовіўся, іх эвакуатар прывёз мяне на сэрвіс у Сеніцу. Пакінуў аўто (як аказалася, зламаўся трос аўтаматычнай каробкі перадач). Мне яшчэ трэба было фарбаваць задні бампер і заднія дзверы, і майстар Андрэй Барысавіч угаварыў «абліць» аўто цалкам звонку, — распавёў Сяргей «Нашай Ніве». — 28 красавіка я прыехаў на сэрвіс, часткова аплаціў матэрыялы, дамовіліся, што верх мне пафарбуюць у срэбра (як быў), а ніз — у цёмна-шэры фірмовы колер.

Здаецца, усё ясна і зразумела. Але 6 мая, калі я прыехаў забіраць аўто, адразу кінулася, што ўнізе ўвесь пластык афарбаваны ў светла-блакітны колер. Акрамя таго, паламаных пластыкавых дэталяў і «касякоў» маса».

Сяргей сцвярджае, што дырэктар сэрвісу ўсе недахопы запісаў, па просьбе дырэктара ў рахунку кліент зрабіў пазнаку, што рэшта не аплочаная да ліквідацыі паводле акту.

Згодна з тым актам Сяргей працягваў ездзіць на машыне. 22 мая ён павінен быў прывезці яе на сервіс, каб выправілі недахопы, і праз тры дні — 25 мая — забраць.

«Але пару дзён таму стаў мне майстар названьваць, маўляў, трэба аплаціць слясарныя работы. Я 12 мая прыехаў, аплаціў, але пасля аплаты мяне проста не выпусцілі з СТА. Дырэктар пачаў патрабаваць, каб я аплаціў загадзя і малярныя работы. Я адмовіўся, — кажа Сяргей. — Тады на СТА зачынілі вароты і сказалі, што пакідаюць аўто ў сябе».

Было каля паловы на сёмую вечара. Сяргей выклікаў міліцыю. Але, па яго словах, нават калі прыехалі міліцыянты, дырэктар усё роўна адмаўляўся выпускаць машыну з сэрвіса.

«У выніку, пасля прыкладна трох гадзін перамоў супрацоўнікаў з дырэктарам, перад маёй машынай ўстаў дырэктар і не пусціў мяне. Пасля ён яшчэ скокнуў на капот і саскочыў з яго (калі яшчэ супрацоўнікі былі на тэрыторыі), а міліцыя мяне аб’ехала і — гудбай! — абураецца Сяргей. — Я зноў выклікаў міліцыю. У мясцовым РАУС па тэлефоне мне сказалі, каб я пакідаў аўто і вырашаў усё праз суд. Я паспрабаваў выехаць яшчэ раз, дык дырэктар біў мне ў бакавое шкло, свяціў мне ліхтаром. У выніку мяне падчапілі ззаду за трос і ўтрымлівалі, пакуль усе машыны з сэрвіса не з'ехалі.

Застаўся адзін вартаўнік і я ў машыне перад зачыненымі варотамі».

Сяргей ізноў выклікаў міліцыю. Каля 12 гадзін ночы другі раз прыехалі супрацоўнікі РАУС. «Я зноў напісаў заяву аб тым, што мяне фактычна сілай утрымлівалі і не давалі выехаць. Супрацоўнікі паскардзіліся, як мала ў іх правоў, што ім мяне шкада. А я ў 01.40 пабрыў дадому без машыны, якая належыць мне на правах уласнасці», — кажа Сяргей.

У сэрвісе, у сваю чаргу, абвінавачваюць кліента ў шантажы.

Майстар Андрэй Барысавіч, які займаўся машынай Сяргея, кажа, што той адмаўляўся плаціць, бо патрабаваў зніжку.

Атрымаць каментар дырэктара СТА пакуль не атрымалася.

Хто меў рацыю ў канфлікце, будзе вырашаць міліцыя.

• 0
• 0
• 0
• 0
• 0
• 0
• 0
• 0