У Нарвегіі падрыхтаваны законапраект аб забароне нашэння жаночага адзення, якая закрывае твар, у дзіцячых садках, школах і універсітэтах. Забарона тлумачыцца тым, што падобнае адзенне абцяжарвае камунікацыю паміж выкладчыкамі і вучнямі, піша ВВС.
Пад забарону не патрапяць іншыя віды жаночага адзення, прынятага ў ісламе, — такія, напрыклад, як галаўныя хусткі.
Гэта першая падобная забарона ў скандынаўскіх краінах. Акрамя паранджы і нікаба заканадаўцы ўключылі ў пералік забароненых у адукацыйных установах галаўных убораў балаклавы і маскі.
Большасць нарвежскіх партый падтрымліваюць гэты законапраект, які, як чакаецца, будзе прыняты ў наступным годзе.
«Падобнае адзенне перашкаджае добрай камунікацыі, якая неабходная для таго, каб навучэнцы маглі атрымліваць якасную адукацыю», — гаворыцца ў заяве нарвежскага міністра адукацыі Торб'ёрна Ісаксена.
Выконваючы абавязкі міністра па справах іміграцыі і інтэграцыі Пер Сандберг заявіў, што магчымасць камунікаваць адно з адным — гэта фундаментальная каштоўнасць.
Рэгіянальныя ўлады ў Нарвегіі цяпер надзеленыя правам ўводзіць забарону на нікабы ў школах, аднак агульнанацыянальных правіл на гэты конт да гэтага часу не было.
У той жа час крытыкі аспрэчваюць неабходнасць увядзення такой меры, бо ісламскае адзенне, якое цалкам закрывае твар, не занадта шырока распаўсюджанае ў Нарвегіі.
«Ёсць вельмі, вельмі невялікая колькасць тых, хто носіць нікаб, так што ў кантэксце інтэграцыі гэта найменшая праблема», — заявіла ў інтэрв'ю тэлерадыёкампаніі NRK Лінда Нор з няўрадавай арганізацыі Minotenk, што факусуецца на праблемах меншасцяў.
У пачатку гэтага года мусульманская арганізацыя «Ісламская рада Нарвегіі» справакавала скандал, узяўшы на працу прэс-сакратарку, якая носіць нікаб.
«Ісламская рада» — арганізацыя, якая існуе на грант урада Нарвегіі і закліканая ўмацоўваць міжрэлігійны дыялог, — трапіла пад агонь крытыкі з боку міністра культуры, мусульман-дэпутатаў нарвежскага парламента і іншых мусульманскіх аб'яднанняў.
Арганізацыя адпрэчыла гэтыя папрокі, заявіўшы, што Лэйла Хасік — найбольш адпаведная кандыдатура на пасаду кіраўніка аддзела па сувязях з грамадскасцю.
Туск заявіў пра гатоўнасць адкрыць Баброўнікі і Кузніцу з лістапада63
Каментары