Ілан Маск паказаў машыну Tesla, якая ў студзені мае паляцець на Марс
Уладальнік фірмы Space X Ілан Маск апублікаваў сёння у сваім твітар-акаўнце фота электрамабіля Tesla сваёй вытворчасці, які мае ўжо ў студзені будучага года адправіцца ў падарожжа ў адзін канец на арбіту Марса.
Электрамабіль стане адзіным «пасажырам» тэставага палёту ракеты «Falcon Heavy». Пасля набліжэння да Марса яе галаўная частка мае ўвайсці на эліптычную арбіту, і заставацца там неакрэслена доўгі час. Палёт патрэбны для адпрацоўкі элементаў марсіянскай праграмы Space X, якая, паводле Маска, мае пачацца паміж 2022 і 2024 годам.
«Грузам стане мая вішнёвая Tesla Roadster, у якой будзе граць «Space Oddity» (Дэвіда Боўі — Рэд.). І яна застанецца ў глыбокім космасе з мільярд год, калі не выбухне падчас старту», — напісаў Маск у твітары анансуючы пуск.
Дакладная дата запуску пакуль не вызначаная. Аднак ракету ўжо пачалі рыхтаваць у ангары на мысе Канаверал у штаце Фларыда.
Каментары