Біёлагі знайшлі сувязь паміж нюхам і палітычнымі поглядамі: людзі з вострым нюхам любяць дыктатараў
Нейрафізіёлагі з Універсітэта Стакгольма выявілі незвычайную сувязь паміж вастрынёй нюху і палітычнымі перавагамі: чым вастрэй чалавек рэагуе на пах поту і вылучэнняў іншых людзей, тым пазітыўней ён ставіцца да аўтарытарызму і дыктатараў, гаворыцца ў даследаванні, апублікаваным у Royal Society Open Science.
За апошнія гады нейрафізіёлагі, біёлагі і псіхолагі выявілі мноства намёкаў на тое, што многія сацыяльныя і асабістыя перавагі людзей непарыўна звязаныя з тым, як працуюць іх органы пачуццяў і як працякала эвалюцыя чалавека ў мінулым. Напрыклад, два гады таму было даказана, што людзі схільныя больш давяраць высокім і светласкурым лідарам у часы крызісу.
І вось, навукоўцы выявілі яшчэ адну заканамернасць.
«Мы раскрылі вельмі выразную сувязь паміж тым, як моцна людзі рэагавалі на пахі, і іх жаданнем мець моцнага лідара ці нават дыктатара, здольнага задушваць радыкальныя пратэсты і забяспечваць сацыяльную стабільнасць», — кажа Ёнас Олафсан, адзін з аўтараў даследавання.
Імаверна, наяўнасць падобнай сувязі кажа пра тое, што схільнасць да аўтарытарызму або лібералізму можа быць біялагічна абумоўленай і звязанай з тым, як нашы продкі прыстасоўваліся да жыцця ў вялікіх групах сабе падобных. Рэакцыя агіды, звязаная з пахам поту ці экскрыментаў, магла абараняць іх ад эпідэмій і заразных хваробаў.
У далейшым гэтая рэакцыя і звязаныя з ёй эмоцыі распаўсюдзіліся на астатнія аспекты жыцця чалавека, у тым ліку і на палітыку. У найбліжэйшай будучыні навукоўцы плануюць зразумець, якія пахі могуць падсвядома прымушаць чалавека негатыўна ставіцца да носьбітаў іншых ідэй, і даведацца, ці можна пазбавіцца гэтай рэакцыі.
Цяпер чытаюць
Памёр 50-гадовы спецназавец Буцько. Ён быў удзельнікам выкрадання і забойства Захаранкі і Ганчара27
Каментары